WSJ: ABŞ Hörmüzün blokadasına azı 15 gəmi cəlb edib
Hörmüz boğazının blokadası əməliyyatını dəstəkləmək üçün azı 15 ABŞ hərbi gəmisi cəlb edilib. Bu barədə "The Wall Street Journal" yüksəkrütbəli məmura istinadən yazır.
Qrupa təyyarədaşıyan gəmi, idarəolunan raketli bir neçə esmines, desant gəmisi və regiondakı digər döyüş gəmiləri daxildir. Helikopterlər bu gəmilərdən qalxaraq tankerlərin göyərtəsinə desant endirə bilir.
BBC peyk görüntülərinə istinadən xəbər verir ki, Birləşmiş Ştatların "Abraham Lincoln" atom aviadaşıyıcısı aprelin 11-də İran sahillərindən 200 km cənubda, Oman körfəzində lövbər salıb. Təyyarədaşıyanın yaxınlığında iki gəmi də görünür, ölçüsünə və formasına görə onlar idarəolunan raketlərlə təchiz olunmuş esmineslərə uyğun gəlir.
ABŞ prezidenti Donald Tramp xəbərdarlıq edib ki, blokadaçı donanmaya yaxınlaşan İran hücum gəmiləri vurulacaq. ABŞ prezidenti İslamabadda danışıqların pozulmasından sonra aprelin 12-də Hörmüz boğazının blokadaya alındığını elan edib.
Tehran bəyan edib ki, ABŞ-nin boğazı bağlamaq cəhdləri "uğursuzluğa məhkumdur" və İran buna yol verməyəcək.
İspaniya Tehrandakı səfirliyini yenidən açıb
İspaniyanın Tehrandakı səfirliyi yenidən fəaliyyətə başlayıb. ABŞ və İsrailin İranla müharibəsindən sonra diplomatik missiya təhlükəsizlik səbəbi ilə müvəqqəti bağlanmışdı.
İranın xəbər agentliklərinə görə, səfirlik aprelin 13-də işini bərpa edib. Məqsədin aprelin 8-də qüvvəyə minmiş ikihəftəlik atəşkəsdən sonra vasitəçilik səylərini dəstəkləmək olduğu bildirilir.
İspaniyanın səfiri bir gün öncə İrana gəlib. O bildirib ki, bütün tərəflərdən sülh səylərini dəstəkləməyə çalışacaq.
Müharibə başlayandan İspaniya ABŞ və İsraili ən çox tənqid edən Qərb ölkələrindən biri olub.
Aprelin 8-də İsrailin Livana zərbələrindən sonra İspaniyanın xarici işlər naziri Xose Manuel Albares deyib ki, bu zərbələr atəşkəsi və beynəlxalq hüququ pozur. ABŞ, İran və İsrail arasında atəşkəsin Livana şamil olunub-olunmaması ilə bağlı fərqli mövqedədirlər.
İranda hökumətyönlü qüvvələrin axşam saatlarında küçələrə çıxaraq İspaniya bayraqları qaldırdıqları bildirilir. AzadlıqRadiosu bu məlumatları təsdiqlədə bilməyib.
İrandan xəbərdarlıq: ABŞ blokadaya başlasa, Körfəzdə təhlükəsiz liman qalmayacaq
ABŞ-nin İran limanlarına qarşı dəniz blokadasına başlarsa, "Fars körfəzi və Oman körfəzində heç bir liman təhlükəsiz olmayacaq". Aprelin 13-də İran silahlı qüvvələrinin "Xatəm əl-Ənbiya" mərkəzi əməliyyat qərargahı belə bir xəbərdarlıq səsləndirib.
Qurum qeyd edib ki, ABŞ-nin beynəlxalq sularda gəmilərin hərəkətinə məhdudiyyətlər tətbiq etməsi "qanunsuz addım və piratlıq nümunəsidir".
Həftəsonu Pakistanda sülh danışıqları uğursuz bitəndən sonra prezident Donald Tramp bildirib ki, aprelin 13-ü Bakı vaxtı ilə saat 18:00-dan İran limanlarına daxil olan və çıxan gəmiləri blokadaya salacaq.
İran hərbi qərargahının sözçüsü əlavə edib ki, "Fars körfəzi və Oman körfəzində limanların təhlükəsizliyi ya hamı üçündür, ya da heç kim üçün".
"Düşmənlə əlaqəli gəmilərin Hörmüz boğazından keçmək hüququ yoxdur və olmayacaq. Digər gəmilərə İran İslam Respublikasının silahlı qüvvələrinin qaydalarına uyğun olaraq boğazdan keçməyə icazə veriləcək", – sözçü bildirib.
Münaqişə başlayandan İran Hörmüz boğazından dəniz nəqliyyatını ciddi məhdudlaşdırıb. Bu isə qlobal enerji qiymətlərində kəskin artıma səbəb olub. Tehran bəyan edib ki, bu dar keçiddən keçmək istəyən gəmilərdən rüsum tələb edəcək.
Britaniya ABŞ-nin İran limanlarının blokadasına dəstək verməyəcək
Böyük Britaniya ABŞ-nin İran limanlarına tətbiq edəcəyi blokadanı dəstəkləməyəcək. Bunu baş nazir Kir Starmer deyib. O əlavə edib ki, əsas diqqəti Hörmüz boğazının tam açılmasına yönəlib.
Starmer aprelin 13-də "BBC Radio 5 Live" efirində çıxış edib. "Boğazın açıq və tam açıq olması həyati əhəmiyyət daşıyır, bütün səylərimizi məhz buna yönəltmişik... bunu davam etdirəcəyik", – o deyib.
Prezident Donald Tramp bildirib ki, ABŞ ordusu aprelin 13-ü Bakı vaxtı ilə 18:00-da Fars körfəzində İran limanlarına və sahil zonalarına daxil olan və çıxan bütün dəniz nəqliyyatını bloklayacaq.
Bu bəyanat həftəsonu İslamabadda İranla sülh danışıqları uğursuz bitəndən sonra verilib.
ABŞ ordusu bildirib ki, Hörmüz boğazından qeyri-İran limanlarına gedən-gələn gəmilərin hərəkətinə mane olmayacaq.