SEPAH-ın kəşfiyyat rəhbəri öldürülüb
İranın İslam İnqilabı Keşikçiləri Korpusu (SEPAH) bildirib ki, Kəşfiyyat İdarəsinin rəhbəri, briqada generalı Məcid Xadəmi öldürülüb.
SEPAH bu haqda aprelin 6-da açıqlama yayıb, amma onun harada, necə öldürüldüyü bildirilmir.
Xadəmi bu vəzifəyə ötən yay, İsraillə 12 günlük müharibədə Məhəmməd Kazımi qətlə yetiriləndən sonra təyin olunub.
ABŞ Maliyyə Nazirliyi onu yanvarın 30-da sanksiya siyahısına salıb. Xəzinədarlıq bildirib ki, SEPAH-ın Kəşfiyyat İdarəsi "İran təhlükəsizlik qüvvələrinin etiraz hərəkatını boğmaq məqsədi güdən kütləvi zorakılıq, əsassız həbslər və qorxutma kampaniyasını dəstəkləyib".
SEPAH-ın Kəşfiyyat İdarəsi qurum daxilində əks-kəşfiyyata cavabdehdir, sızmaların qarşısını alır, məxfi məlumatları qoruyur, şəxsi heyət üzərində siyasi-təhlükəsizlik nəzarətini həyata keçirir.
Media: Pakistan təcili atəşkəs planı üzrə vasitəçilik edir
İran və ABŞ müharibəni dayandırmaq və Hörmüz boğazını yenidən açmaq üçün Pakistanın vasitəçiliyi ilə hazırlanmış təklif alıblar. Bu haqda "Reuters"ə danışıqlardan xəbərdar mənbə danışıb. Təklifin dərhal atəşkəs elan olunması, sonradan daha geniş razılaşmanı nəzərdə tutduğu deyilir.
Mənbə aprelin 6-da bildirib ki, "bütün elementlər bu gün razılaşdırılmalıdır". Onun sözlərinə görə, ilkin razılaşma anlaşma memorandumu formatında olacaq, Pakistan vasitəsilə elektron şəkildə yekunlaşdırılacaq. Pakistanın tərəflər arasında yeganə kommunikasiya kanalı kimi çıxış etdiyi bildirilir.
Şərti adı "İslamabad razılaşması" olan təklifə əsasən, atəşkəs qısa müddətdə qüvvəyə minəcək, daha geniş razılaşma üçün 15-20 gün vaxt veriləcək.
"Axios" daha öncə ABŞ, İran və region rəsmilərinin 45 günlük mümkün atəşkəsi müzakirə etdiyini yazmışdı.
"Reuters"in məlumatına görə, Pakistan ordusunun baş komandanı Asim Munir ABŞ və İranın yüksəkvəzifəli rəsmiləri, eləcə də xarici işlər naziri Abbas Əraqçi ilə bütün gecə əlaqə saxlayıb.
ABŞ və İran rəsmiləri hələlik xəbəri şərh etməyiblər.
Livandakı BMT qüvvələrindən xəbərdarlıq: 'Cavab atəşi açıla bilər'
BMT-nin Livandakı Müvəqqəti Qüvvələri (UNIFIL) aprelin 5-də bildirib ki, İsrail və "Hizbullah"ın onların mövqeləri yaxınlığında hücumları cavab atəşinə səbəb olar.
UNIFIL tərəfləri silahları yerə qoymağa, atəşkəs üçün ciddi işləməyə çağırıb.
UNIFIL onu da bildirib ki, ABŞ və İsrail İranla müharibəyə başlayandan onların üç sülhməramlısı həlak olub.
İsrail Livanla sərhəd boyunca, Livan ərazisində "Hizbullah"a zərbələr endirir. İsrail və ABŞ İranın dəstəklədiyi bu qruplaşmanı terror təşkilatı sayır.
UNIFIL Livanın cənubunda fəaliyyət göstərən sülhməramlı missiyadır, 1978-ci ildə onu BMT Təhlükəsizlik Şurası yaradıb. Missiyanın əsas vəzifələrindən biri hərbi əməliyyatların dayandırılmasına nəzarətdir. UNIFIL 50-yə yaxın ölkədən 8 min 500 sülhməramlısı olduğunu bildirir.
ABŞ İranda vurulan F-15-in ikinci ekipaj üzvünü də xilas edib
Aprelin 5-i səhər ABŞ hərbçiləri İranda vurulan F-15 qırıcısının ikinci ekipaj üzvünü xilas ediblər.
"F-15E Strike Eagle" qırıcısı aprelin 3-də vurulub. Bu, beş həftəlik münaqişədə İran üzərində vurulan ilk Amerika təyyarəsidir.
Ekipajın birinci üzvü zədələnmiş təyyarədən katapult etdikdən bir neçə saat sonra qurtarılmışdı.
Silah zabiti olan ikinci ekipaj üzvü ABŞ xüsusi təyinatlı qüvvələri və digər hərbi bölmələrin iştirakı ilə mürəkkəb, çoxmərhələli xilasetmə əməliyyatı zamanı xilas edilib.
"Axios" mənbələrə istinadən yazır ki, zabit katapult etdikdən sonra yaralanıb, lakin yenə də yeriyə bilib və 24 saatdan çox dağlarda gizlənib.