İran ordusu Trampın danışıqlarla bağlı dediklərini təkzib edir
İran ordusu prezident Donald Trampın ABŞ-nin müharibəni bitirmək üçün danışıqlar aparması haqda dediklərini rədd edib, Vaşinqtonun özü ilə danışıq apardığını deyib.
"Daxili çəkişməniz o həddə çatıb ki, siz (Tramp) özünüzlə danışıq aparırsız?", – İranın birgə hərbi komandanlığının baş sözçüsü İbrahim Zülfüqari İranın dövlət televiziyasına deyib.
"Həmişə demişik, bizim kimi heç kəs sizinlə razılaşma əldə etməz. İndi yox. Heç vaxt", – sözçü əlavə edib.
İran rəhbərliyi daha öncə bildirmişdi ki, ABŞ ilə danışıq apara bilməz, çünki bu ölkə son iki ildə danışıqlar gedən müddətdə İrana iki dəfə hücum edib.
Media: ABŞ müharibənin bitməsi üçün İrana 15-bəndlik plan göndərib
ABŞ və İsrail mediası ABŞ-nin İrana Yaxın Şərqdəki münaqişənin həlli üçün 15-bəndlik plan göndərdiyini bildirir. Müharibə artıq beşinci həftədir davam edir. ABŞ və İsrail fevralın 28-də İrana havadan zərbələr endirməyə başlayıb.
"The New York Times" qəzeti martın 24-də adını çəkmədiyi iki rəsmiyə istinadla yazıb ki, plan Pakistan vasitəsilə çatdırılıb. Qəzetin yazdığına görə, planın İran rəsmiləri arasında nə qədər geniş paylaşıldığı və ya İsrailin bu plana qoşulub-qoşulmadığı bəlli deyil.
İsrailin "12-ci Kanal"ı üç mənbəyə istinadla bildirib ki, ABŞ planı müzakirə etmək üçün bir aylıq atəşkəs istəyir. Plana Hörmüz boğazının açıq saxlanılması, İranın nüvə proqramının ləğvi, proksi qruplara dəstəyin dayandırılması və Tehrana qarşı bütün sanksiyaların aradan qaldırılması daxildir.
ABŞ prezidenti Donald Tramp martın 24-də bildirib ki, ABŞ müharibəyə son qoyacaq razılaşma barədə İranda "lazımi insanlar" ilə danışır: "Hazırda danışıqlar aparırıq". Amma o, detalları açıqlamayıb. İranın yüksəkvəzifəli şəxsləri isə bir gün öncə İranın ABŞ ilə danışıqlar aparmadığını bildiriblər.
İran: Düşmən olmayan ölkələrin gəmiləri Hörmüzdən keçə bilər
İran düşmən olmayan ölkələrin gəmilərinin Hörmüz boğazından keçə biləcəyini bildirib. Bu haqda Beynəlxalq Dəniz Təşkilatına (IMO) ötürülən bəyanatda deyilir: "Düşmən olmayan ölkələrin gəmiləri... səlahiyyətli orqanlarla koordinasiya edərək Hörmüz boğazından təhlükəsiz keçiddən faydalana bilər. Bir şərtlə ki, heç vaxt İrana qarşı təcavüz aktlarında iştirak etməsinlər, yaxud belə aktları dəstəkləməsinlər, təhlükəsizlik qaydalarına tam əməl etsinlər".
IMO bildirib ki, 22 mart tarixli kommünikeni İran Xarici İşlər Nazirliyi verib, IMO-nun onu yayması xahiş edilib. IMO onu üzv dövlətlər və QHT-lərlə paylaşdığını bildirir.
Bu arada Donald Tramp İranın ABŞ və İsrailin hava hücumlarına son qoymaq üçün razılığa gəlməyə can atdığını iddia edib. İran bu zərbələrə cavab olaraq ticarət gəmilərinin Hörmüz boğazından keçməsini əngəlləyib, bununla da Yaxın Şərqdən dünya bazarlarına neft və qaz ixracını dayandırıb. Bu da, öz növbəsində, qlobal enerji qiymətlərini qaldırıb.
İran onu da bildirib ki, son açıqlama ABŞ və İsrailə məxsus gəmilərə və avadanlıqlara, təcavüzün digər iştirakçılarına aid deyil.
Tramp: İranda 'lazımi insanlar' ilə danışıqlar aparırıq
ABŞ prezidenti Donald Tramp deyir ki, Amerika administrasiyası döyüşlərə son qoyacaq razılaşma üçün İrandakı "lazımi insanlar" ilə danışıqlar aparır.
Trampın sözlərinə görə, iranlılar razılığa gəlməyə can atırlar. "Lazım olan insanlarla danışıqlar aparırıq və onlar razılaşma bağlamağı çox istəyirlər, bunu nə qədər istədiklərini bir bilsəydiz", - o, Ağ evdə jurnalistlərə bildirib.
Trampın vurğulamasına görə, İran energetika sahəsində Birləşmiş Ştatlara böyük güzəşt edib. ABŞ prezidenti bunu "müsbət hadisə" adlandırıb, güzəştin Fars körfəzi ölkələrindən dünya bazarına neft tədarükü üçün əsas marşrut - Hörmüz boğazı ilə bağlı olduğuna eyham vurub. İran fevralın sonlarında ABŞ-İsrail hücumu başlanandan boğazı faktiki olaraq bağlayıb.
"Onlar bizə hədiyyə etdilər və bu, çox böyük məbləğdə pul dəyərində çox səxavətli bir hədiyyə idi. Nüvə enerjisi ilə əlaqəli deyil, neft və qazla bağlıdır, bu onlar tərəfindən çox yaxşı hərəkətdir", - Tramp əlavə edib.
"Reuters" yazır ki, Tramp elçiləri - Stiv Uitkoff və Cared Kuşnerin bu həftə danışıqlar planlaşdırıb-planlaşdırmadığına aydınlıq gətirməyib. Pakistan ABŞ və İran arasında danışıqlara ev sahibliyi etməyə hazır olduğunu bildirib.
İsrailin "Ynet" nəşri mənbələrə istinadən xəbər verir ki, müharibənin dördüncü günündən Vaşinqton və Tehran arasında gizli rabitə kanalı fəaliyyət göstərib, lakin uzun müddət nəticəsi olmayıb. Məqalədə deyilir ki, İranın xarici işlər naziri Abbas Əraqçi ilə Uitkoff arasında telefon danışığı dönüş nöqtəsi olub.
Martın 23-də D.Tramp Tehranla "çox yaxşı və məhsuldar" danışıqlar apardığını bəyan edib və İranın enerji infrastrukturuna zərbələri beş gün təxirə salmağı tapşırıb. Tehran rəsmi olaraq danışıqların mövcudluğunu inkar edir.