SEPAH-dan elektrik stansiyaları ilə bağlı xəbərdarlıq
İranın elektrik stansiyalarına hücum olarsa, Tehran İsraildə və regionda ABŞ bazalarını elektrik enerjisi ilə təmin edən obyektləri hədəf götürəcək. Bunu İran İslam İnqilabı Keşikçiləri Korpusu (SEPAH) bəyan edib.
ABŞ prezidenti Donald Tramp martın 21-də Tehrandan Hörmüz boğazını 48 saat ərzində tam açmağı tələb edib, əks halda, İranın elektrik stansiyalarının vurulub məhv ediləcəyini deyib.
Bu arada "The Wall Street Journal" qəzetinin yazdığına görə, Körfəzdəki ərəb dövlətləri ABŞ administrasiyasına xəbərdarlıq edib ki, İranın elektrik stansiyalarının hədəfə alınması onların enerji və su obyektlərinə qarşı qisas tədbirlərinə yol açar.
Netanyahu: SEPAH komandirləri şəxsən təqib olunacaq
İsrailin baş naziri Binyamin Netanyahu martın 22-də bildirib ki, İran İslam İnqilabı Keşikçiləri Korpusunun (SEPAH) yüksəkrütbəli komandirləri şəxsən təqib ediləcək.
"Biz rejimi təqib edirik. SEPAH-ı, bu cinayətkar dəstəni təqib edirik", – Netanyahu ölkənin cənubundakı Arad şəhərinə İranın raket zərbəsindən bir gün sonra etdiyi səfəri zamanı deyib.
"Onları, onların liderlərini, obyektlərini, iqtisadi aktivlərini şəxsən təqib edirik", – o əlavə edib.
İsrail ordusu bildirib ki, İran müharibənin ilk üç həftəsi ərzində İsrailə 400-dən çox ballistik raket atıb, onların təxminən 92 faizi zərərsizləşdirilib.
İran radiostansiyasına aviazərbə bir nəfərin həyatına son qoyub
İranın Bəndər Abbas limanındakı radiostansiyasına aviazərbə nəticəsində azı bir nəfər həlak olub. Xəbəri martın 23-də İran dövlət televiziyası yayıb.
"Fars Körfəzi Radio və Televiziya Mərkəzinin 100 kilovatlıq AM ötürücüsünə Amerika-sionist terrorçu ordusu hücum edib", – İran dövlət televiziyası bildirib.
"Beynəlxalq qanunlara zidd olan bu hücumda mərkəzin təhlükəsizlik əməkdaşlarından biri şəhid olub, daha bir nəfər yaralanıb", – xəbərdə deyilir.
İsrail hərbçisi İrana casusluq ittihamı ilə həbs edilib
İsrailin "Dəmir Qübbə" kimi tanınan hava hücumundan müdafiə sistemini idarə edən ehtiyatda olan hərbçi İrana məlumat ötürməsi şübhəsi ilə həbs olunub. Onun 26-yaşlı Qüds sakini Raz Koen olduğu müəyyən edilib.
Rəsmi versiyaya görə, o, bir neçə ay İran kəşfiyyatı agentləri ilə əlaqə saxlayıb və onların göstərişi ilə məxfi məlumatların ötürülməsi də daxil, təhlükəsizliklə bağlı müxtəlif tapşırıqları yerinə yetirib.
"The Times of Israel" yazır ki, Koen Telegram vasitəsilə "verbovka" olunub, bazaların koordinatlarını və məsul şəxslərin adlarını ötürüb.