İranın "Cənubi Pars" qaz yatağına aviazərbələr endirilib
İranın Əsəluyə şəhərindəki “Cənubi Pars” qaz yatağı aviazərbələrə məruz qalıb, yataqda yanğın baş verib. “Cənubi Pars” dünyada ən böyük təbii qaz mənbəyi sayılır. Xəbəri İran televiziyası martın 18-də yayıb.
Pars Xüsusi İqtisadi Enerji Zonasında yerləşən qaz qurğularının bir hissəsi ABŞ və İsrailin atdığı mərmilərlə hədəfə alınıb, Buşehr əyalətinin vali müavini belə deyib.
Əsəluyə valisi isə İran mediasına deyib ki, "Cənubi Parsda bir neçə faza" hədəfə alınıb, "yanğını nəzarət altına almaq və yayılmasını önləmək üçün istismardan çıxarılıb".
“Cənubi Pars” qaz yatağını İran və Qətər birgə idarə edir. Əsəluyədəki neft emalı zavodlarında yataqdan çıxarılan qaz emal olunur.
Kompleksə 13 neft emalı zavodu daxildir. Buradan İranın milli enerji şəbəkəsinə gündə orta hesabla 600 milyon kubmetrdən çox qaz vurulur, bu isə ölkə üzrə istehlakın təxminən 70 faizi deməkdir. “Cənubi Pars” İranın neft-kimya sənayesi üçün daxili enerji və xammal təminatında mühüm rol oynayır.
Tramp: İranda qrafiki qabaqlamışıq
ABŞ prezidenti Donald Tramp İrana qarşı hərbi əməliyyatın çox çəkməyəcəyini bir daha vurğulayıb. O, Ağ evdə İrlandiyanın baş naziri Maykl Martin ilə görüşdə bu haqda danışıb.
"Bir neçə dəlinin əlində olan nüvə silahları ilə mübarizə üçün qısa missiya gerçəkləşdirməli olduq, bir-iki həftəyə başa çatacaq, çox çəkməyəcək", – Tramp martın 17-də deyib. Prezident daha konkret qrafik açıqlamayıb, "hər şey çox sürətlə irəliləyir", "qrafiki xeyli qabaqlamışıq" deyib.
Martın 18-də ABŞ və İsrailin İrana qarşı hərbi əməliyyatlarının 19-cu günüdür. Pentaqon bunu "Epik qəzəb", İsrail "Nərildəyən şir" əməliyyatı adlandırır.
İran Əli Laricaninin öldürüldüyünü təsdiqləyib
İran ölkənin Ali Milli Təhlükəsizlik Şurasının katibi Əli Laricaninin öldürüldüyünü təsdiqləyib. O, Ali lider Əli Xamenei fevralın 28-də ABŞ və İsrailin hava hücumlarının ilk günündə öldürüləndən bəri həlak olan ən yüksək vəzifəli rəsmidir.
İranın Ali Milli Təhlükəsizlik Şurasının Katibliyi martın 17-də axşam açıqlama yayıb. Əli Laricaninin oğlu Mörtəza, müavini Əlirza Bayat və bir neçə cangüdəni ilə birlikdə öldürüldüyü bildirilir.
İslam İnqilabı Keşikçiləri Korpusu (SEPAH) isə "Bəsic" qüvvələrinin komandiri Qulamrza Süleymaninin ölümünü təsdiqləyib.
Bundan öncə İsrailin Müdafiə Qüvvələri (SAXAL) Süleymani və Laricaninin martın 16-da İrana zərbələr zamanı öldürüldüyünü bildirmişdi.
ABŞ-nin yüksək vəzifəli rəsmisi İran münaqişəsinə görə istefa verib
ABŞ Milli Terrorla Mübarizə Mərkəzinin rəhbəri Cozef Kent İranda hərbi əməliyyatlara görə istefa verdiyini açıqlayıb.
O, prezident Donald Trampa məktubunu martın 19-da X platformasında dərc edib. Məktubda deyilir ki, İsrail rəsmiləri və "Amerika mediasının nüfuzlu üzvləri" Birləşmiş Ştatları "İranın təhlükə yaratdığına inandırmaqla" aldadıblar. Kent əlavə edib ki, Trampın hər üç prezidentlik kampaniyası zamanı barəsində danışdığı dəyərləri və xarici siyasəti dəstəkləyir, amma İranla bağlı mövcud durumu nəzərə alaraq fəaliyyətini davam etdirə bilməz.
"Mən vicdanıma sadiq qalaraq İrandakı müharibəni dəstəkləyə bilmərəm", – Kent bildirib. O, müharibə veteranıdır, həyat yoldaşı dəniz kriptoloqu olub, 2019-cu ildə Suriyada ölüb.
Kent qeyd edib ki, Trampın kursunu dəyişəcəyinə, "xalqımız üçün yeni bir yol çəkəcəyinə" ümid edir.
Kenti bu vəzifəyə Tramp namizəd göstərib, Senat onu təsdiqləyib. O, Tramp administrasiyasından İran müharibəsinə görə istefa verən ən yüksək vəzifəli məmurdur.