Tramp: İranın potensial yeni liderlərinin sonu ölümlə bitir
ABŞ prezidenti Donald Tramp deyir ki, İranın yeni lideri olmaq istəyən rəsmilərin "sonu ölümlə bitir". Prezident ABŞ ilə İsrailin İrana qarşı hərbi əməliyyatları davam etdirməyə and içib.
"Hazırda çox güclü mövqedəyik, onların rəhbərliyi sürətlə yoxa çıxır. Lider olmaq istəyən hər kəsin sonu ölümlə bitir", – Tramp martın 4-də Ağ evdə texnologiya sektorunun rəhbərləri ilə görüşdə deyib.
"Müharibə cəbhəsində işimiz, yumşaq desək, yaxşı gedir. Kimsə soruşdu ki, 10 ballıq şkala ilə bunu necə qiymətləndirərdiniz? Dedim ki, təxminən 15", – Tramp bildirib.
O, Tehranın ballistik raket arsenalının sürətlə məhv edildiyini vurğulayıb.
ABŞ prezidenti bir daha qeyd edib ki, fevralın 28-də başlayan hücumun əsas səbəblərindən biri Tehranın nüvə silahı hazırlamaq imkanını aradan qaldırmaqdır.
"Dəli adamların əlində nüvə silahı olanda pis şeylər baş verir", – Tramp deyib.
Tramp, İsrailin baş naziri Binyamin Netanyahu, Qərbdə digərləri İranı nüvə silahı hazırlamaq cəhdində ittiham etsələr də, Tehran nüvə proqramının dinc məqsədi olduğunu bildirir.
Vaşinqton və Tehran Omanın vasitəçiliyi ilə dolayı danışıqlar aparıb iştirak edirdi. Trampın dediyinə görə, Tehranın razılaşmanı qəbul etməyəcəyi qənaətinə gəldiyi üçün İrana qarşı genişmiqyaslı hava kampaniyasına başlamaq qərarı verib.
'Azərbaycanlıları 'pis' ilə 'daha pis' arasında seçimə məcbur edirlər' – Sorğu
İranın Ali lideri Əli Xameneinin ölümünə bəzi iranlılar kədərlənir, bəziləri sevinir. ABŞ rəhbərliyi İrana hücumun İran xalqına rejimi dəyişmək imkanı tanıdığını deyir. Bəs İrandan olan etnik azərbaycanlılar nə düşünür?
Türkiyə Müdafiə Nazirliyi İrandan atılan ballistik raketin vurulduğunu bildirir
NATO-nun Şərqi Aralıq dənizindəki hava və raketdən müdafiə bölmələri İrandan atılan ballistik raketi vurub. Türkiyə Müdafiə Nazirliyi bildirib ki, raket İraq və Suriya hava məkanını keçdikdən sonra onların ərazisinə doğru uçurdu.
Zenit tutucu-raketinin qalıqları Türkiyənin Hatay əyalətinin Dörtyol rayonuna düşüb.
"Hadisə nəticəsində heç kim xəsarət almayıb", -açıqlamada deyilir.
Türkiyə Müdafiə Nazirliyi bütün tərəfləri regionda münaqişəni gərginləşdirə biləcək hərəkətlərdən çəkinməyə çağırıb. "Xatırladırıq ki, ölkəmizə qarşı istənilən düşmən münasibətə cavab vermək hüququmuz var", - qurumdan vurğulanıb.
İranın kürd müxalifətinin İraqdakı bazası vurulub
Martın 4-də İraq Kürdüstanının Dekala şəhərindəki İran kürd müxalifət qruplaşmasının qərargahındakı silah anbarına dron hücumu olub, iki yaraqlı yaralanıb. Bu barədə "Reuters"ə təhlükəsizlik mənbələri bildiriblər.
İran uzun müddətdir muxtar kürd bölgəsini İslam Respublikasına hücumlarda iştirak edən yaraqlıları gizlətməkdə günahlandırır, bazalarına dəfələrlə zərbələr endirib.
Məlumatlara görə, İraq Kürdüstanında yerləşən İran kürd silahlı qruplaşmaları son günlərdə ABŞ rəsmiləri ilə İranın qərbindəki təhlükəsizlik qüvvələrinə hücum imkanı müzakirə ediblər.