CPJ həbsdə olan jurnalistlərin təhlükəsizliyi ilə bağlı xəbərdarlıq edir
Jurnalistləri Müdafiə Komitəsi (CPJ) İranda həbsdə saxlanılan jurnalistlərin təhlükəsizliyi ilə bağlı ciddi narahatlığını bildirib. Qurum regionda artan gərginlik fonunda İran hakimiyyətini jurnalistləri dərhal və qeyd-şərtsiz azad etməyə çağırıb.
CPJ İranda azı 15 jurnalistin həbsdə olduğunu bildirir. İranlı-amerikalı Rza Vəlizadə, yapon jurnalist Şinnosuke Kavaşima və Məhəmməd Zare Fuməni Tehrandakı Evin həbsxanasında saxlanılırlar.
İsrail ordusu bu həbsxananın yerləşdiyi ərazinin sakinlərinə oradan çıxmaq göstərişi verib. Bu isə Evindəki məhbusların təhlükəsizliyi sarıdan narahatlıqları artırır.
İnsan haqları qurumları, məhbus yaxınları Evin həbsxanasında şəraitin pisləşdiyini, ərzaq çatışmadığını deyirlər. Həbsxana rəsmilərinin müəssisəni tərk etməsi haqda da məlumatlar gəlir.
İran ABŞ-nin Yaxın Şərqdə ən böyük bazasını vurub
İranın atdığı ballistik raket Qətərdəki Əl-Udeyd hərbi hava bazasını vurub. Bu, ABŞ-nin Yaxın Şərqdə ən böyük hərbi bazasıdır.
Qətərin Müdafiə Nazirliyi bildirir ki, martın 3-də axşam İrandan Qətərə doğru iki ballistik raket buraxılıb. Havadan müdafiə sistemləri onlardan birini tutsa da, digəri bazaya düşüb, amma itki olmayıb.
Əl-Udeyd bazasından Qətər və Britaniya qüvvələri də istifadə edir. Bu baza Qətərin paytaxtı Doha yaxınlığında yerləşir. Ötən il ABŞ İranın nüvə obyektlərini bombalayanda Tehran bu bazanı hədəfə almışdı.
Bu bazada 10 min hərbi və mülki personalın yerləşdiyi bildirilir. Baza Vaşinqtonun regiondakı hərbi əməliyyatları üçün komandanlıq mərkəzi rolunu oynayır.
Qətər həmçinin İslam İnqilab Keşikçiləri Korpusuna bağlı iki casus şəbəkəsini ifşa etdiyini, 10 nəfəri saxladığını bildirib.
