Qrossi İranın nüvə obyektlərinin vurulması əlamətinin olmadığını bildirir
İsrail və ABŞ-nin İranın nüvə obyektlərinə hücum etməsinin heç bir əlaməti görünmür. Bunu Beynəlxalq Atom Enerjisi Agentliyinin baş direktoru Rafael Qrossi deyir. Amma o, qurumun indiyədək İranın nüvə rəsmiləri ilə əlaqə saxlaya bilmədiyini də əlavə edib.
"Ümid edirik ki, bu zəruri kommunikasiya kanalı mümkün qədər tez bərpa olunacaq", – o əlavə edib.
Qrossi tərəfləri gərginliyin daha da artmasının qarşısını almaq üçün maksimum təmkin göstərməyə çağırıb.
SEPAH generalı İranın müdafiə naziri vəzifəsini icra edəcək
İran prezidenti Məsud Pezeşkian İslam İnqilabı Keşikçiləri Korpusu (SEPAH) generalı Məcid İbn Əl-Rzanı müvəqqəti müdafiə naziri təyin edib. O, fevralın 28-də İsrailin zərbəsindən həlak olan müdafiə naziri Əziz Nəsirzadənin birinci müavini vəzifəsində çalışıb.
İrana zərbələrdən 555 nəfərin həlak olduğu bildirilir
ABŞ və İsrailin İrana qarşı birgə hücumları nəticəsində indiyədək 555 nəfər həlak olub. Məlumatı İranın Qızıl Aypara Cəmiyyəti martın 1-də yayıb.
İranın 131 şəhərinin hücumlara məruz qaldığı, yaralılara xilasetmə, tibbi yardım xidməti göstərildiyi açıqlanıb.
Fevralın 28-də Hörmüzqan əyalətindəki Şəcərəyi-Təyyibə ibtidai məktəbinə raket zərbəsindən ölənlərin sayının 148-ə çatdığı xəbər verilir. Yerli rəsminin sözlərinə görə, hücumda azı 95 nəfər yaralanıb, çoxu şagirdlərdir.
Bu rəqəmləri müstəqil mənbələrdən dəqiqləşdirmək mümkün olmayıb.