Tramp Ukrayna ilə bağlı 'çox vacib' qərarın anonsunu verdi
22 avqust
ABŞ prezidenti Donald Tramp yaxın iki həftə ərzində Rusiya və Ukrayna ilə bağlı mövqeyini müəyyənləşdirəcəyini bildirib. "Düşünürəm ki, iki həftədən sonra Rusiyanın və, düzünü desəm, Ukraynanın münasibətini anlayacağam.... Düşünürəm ki, nə edəcəyimizlə bağlı qərar verəcəyəm. Və bu, çox vacib bir qərar olacaq. İrimiqyaslı sanksiyalar da ola bilər, böyük tariflər də və ya hər ikisi. Ya da heç nə etməyəcəyəm və "bu, sizin müharibənizdir" deyəcəyəm", - Tramp Ağ evdə FIFA prezidenti Canni İnfantino ilə görüş zamanı jurnalistlərin suallarını cavablandırarkən deyib.
Onun sözlərinə görə, Putin və Zelenskinin sammitində iştirak edə bilərdi, lakin "çoxları bu görüşdən heç nə çıxmayacağını düşünür".
"Politico" yazır ki, Tramp danışıqlarda Moskvaya təzyiq göstərmək niyyətində deyil, hesab edir ki, Qərbin yardımından asılı olan Kiyev güzəştə getməli və sövdələşməyə razı olmalıdır.
Putin-Zelenski görüşü planlaşdırılmır - Lavrov
22 avqust
Putin və Zelenskinin görüşü, hələlik, planlaşdırılmayıb. Bunu NBC telekanalına müsahibəsində Rusiya xarici işlər naziri Sergey Lavrov deyib.
"Prezident Putin aydın şəkildə deyib ki, o, görüşə hazırdır, bir şərtlə ki, bu görüşün həqiqətən gündəliyi, prezident gündəliyi olsun. Hələ ki, o, yoxdur ", - Lavrov bildirib.
Nazirin sözlərinə görə, Alyaskada Putin və Tramp arasındakı görüşdə Rusiya bəzi məsələlərdə "çeviklik" nümayiş etdirib, lakin "Zelenski hər şeyə "yox" deyib". Lavrov Zelenskinin rədd etdiyi şərtlər arasında Ukraynanın NATO-ya üzvlüyündən imtina, ərazi məsələlərinin müzakirəsi və rus dilindən istifadəyə qoyulan qadağanın ləğvini göstərib.
Zelenski qoşunları Donbasdan çıxarmaqdan imtina edir
21 avqust
Ukrayna Donbasdan qoşunlarını çıxarmaq və ərazilərin itirilməsini hüquqi olaraq tanımaq niyyətində deyil. Bu barədə Volodimir Zelenski jurnalistlərlə görüşündə bildirib.
"Bunu edə bilmərik", - o, qoşunların Donbasdan çıxarılması ilə bağlı sualı cavablandırarkən deyib. "Məsələ təkcə konstitusiyada deyil. Bu, ölkəmizin sağ qalması məsələsidir, ən güclü müdafiə xətləri, sənaye mərkəzlərinə qədər olan məsafə məsələsidir".
ABŞ prezidenti Donald Tramp daha əvvəl Zelenskinin ərazi məsələləri ilə bağlı açıqlamalarından narazılığını ifadə edib və "bəzi" ərazi mübadiləsinin olacağını vurğulayıb.
Lavrov Putinin Zelenski ilə görüşməsi üçün şərtləri açıqlayıb
21 avqust
Putin bütün məsələlər hərtərəfli işləndikdən və Ukrayna hakimiyyətinin legitimliyi məsələsi həll olunduqdan sonra Zelenski ilə görüşməyə hazırdır, - Rusiya XİN rəhbəri bildirib.
"Bizim prezidentimiz dəfələrlə deyib ki, o, cənab Zelenski ilə də görüşməyə hazırdır. Ancaq bu, yalnız o halda mümkündür ki, yüksək səviyyədə nəzərdən keçirilməsi tələb olunan bütün məsələlər yaxşı işlənsin, ekspertlər və nazirlər müvafiq tövsiyələr hazırlasınlar", - Lavrov vurğulayıb.
"Və təbii ki, gələcəkdə razılığa gəlinəcəyi təqdirdə, Ukrayna tərəfindən bu razılaşmalara imza atacaq şəxsin legitimliyi məsələsi də həll olunmalıdır", - o əlavə edib.
Zelenskinin Ukrayna prezidenti kimi 5 illik səlahiyyət müddəti 2024-cü il mayın 20-də başa çatıb. Seçkilər ötən il martın 31-də keçirilməli idi, lakin Rusiya təcavüzü başlayandan ölkədə hərbi vəziyyət tətbiq olunduğu üçün ləğv edilib.