Medvedev: NATO sülhməramlılarını Ukraynaya buraxmayacağıq
20 avqust
Rusiya NATO qoşunlarının Ukraynada olmasına imkan verməyəcək, lakin "beyinsiz Qall xoruzu" inadla bu ideyadan yapışır. Bu barədə Rusiya Təhlükəsizlik Şurasının sədr müavini Dmitri Medvedev bildirib.
"Beyinsiz Qall xoruzu "Ukrayna"ya qoşun yeritmək fikrindən əl çəkə bilmir. Deyilib axı: NATO qoşunları sülhməramlı ola bilməz. Rusiya belə bir "təhlükəsizlik zəmanəti"ni qəbul etməyəcək", - o, "X" hesabında yazıb.
Sülhməramlılar ideyasını Fransa prezidenti Emmanuel Makron milli televiziyadakı çıxışında səsləndirib. O, Rusiyanı "Avropa üçün təhlükə" adlandırıb.
Bundan əvvəl Rusiya xarici işlər naziri Sergey Lavrov 2022-ci il "İstanbul formatı"na qayıtmağın mümkün olduğunu bildirib. İstanbul razılaşmalarına görə, təhlükəsizliyin təminatçısı kimi BMT Təhlükəsizlik Şurasının daimi üzvləri - Rusiya, Çin, ABŞ, Böyük Britaniya və Fransa çıxış etməli idi.
Tramp: Putin Zelenski ilə görüşə razılıq verib
19 avqust
Rusiya prezidenti Vladimir Putin avqustun 18-i gecə telefon danışığı zamanı Ukrayna prezidenti Volodimir Zelenski ilə görüşməyə razılıq verib. Bu barədə "Fox News"a onunla zəngləşən ABŞ prezidenti Donald Tramp bildirib.
Tramp deyib ki, Putin və Zelenski "bir-birləri ilə əvvəl düşündüyündən bir az daha yaxşı yola gedirlər" və buna görə də əvvəlcə təkbətək, daha sonra onunla danışıqlar aparacaqlar. "Hərçənd, mən onların nə vaxtsa yaxşı dost olacağını deməzdim", - o əlavə edib.
"Ümid edirəm ki, Putin özünü yaxşı aparacaq", - Tramp deyib. "Əks təqdirdə çətin vəziyyətə düşəcəyik".
Tramp Putinə zəng etdi
18 avqust
Rusiya prezidenti Vladimir Putinlə ABŞ prezidenti Donald Tramp arasında telefon danışığı olub. O, təxminən 40 dəqiqə davam edib, - bu barədə Putinin köməkçisi Yuri Uşakov məlumat verib.
Tramp Putini Ağ evdə Ukrayna prezidenti Volodimir Zelenski və Avropa ölkələrinin liderləri ilə danışıqları barədə məlumatlandırıb.
Uşakovun sözlərinə görə, söhbət zamanı liderlər Rusiya və Ukrayna nümayəndə heyətləri arasında birbaşa danışıqlara dəstək ifadə ediblər. Həmçinin bu danışıqlarda Moskva və Kiyev nümayəndələrinin səviyyəsinin yüksəldilməsi ideyasını müzakirə ediblər.
Tramp-Zelenski-Avropa liderləri bir arada
18 avqust
Trampın Avropa liderləri ilə çoxtərəfli görüşü Oval kabinetdə deyil, Ağ evin banket zalında baş tutub. Tramp və Zelenski ora bir yerdə gəliblər.
Aİ liderləri ilə danışıqlardan əvvəl Tramp Zelenski ilə təkbətək görüş keçirib.