Keçid linkləri

2024, 28 Mart, Cümə axşamı, Bakı vaxtı 13:09

Sərhəddəki gərginlilkə bağlı fərqli yozumlar...


Azərbaycan-Ermənistan sərhəddi, Azərbaycan sərhəd məntəqəsi, 3 fevral 2021
Azərbaycan-Ermənistan sərhəddi, Azərbaycan sərhəd məntəqəsi, 3 fevral 2021

Son həftələr Azərbaycan-Ermənistan sərhədində vəziyyət gərginləşib.
Bu il mayın 12-də Ermənistan rəsmi qurumları bildirmişdilər ki, Azərbaycan silahlı qüvvələri onların sərhədlərini pozaraq bir neçə kilometr ərazilərinə daxil olub. Azərbaycan isə bunu təkzib edib. Tərəflər bir-birlərini atəşkəsi pozmaqda da ittiham edib.
Ermənistan tərəfi iki hərbi quluqçusunun həlak olduğunu açıqlayıb. Azərbaycan Müdafiə Nazirliyi isə bəyan edib ki, qarşı tərəfə atəş açmayıb.

Azərbaycan Müdafiə Nazirliyi daha sonra bildirib ki, Ermənistan mayın 27-də səhər saatlarında dövlət sərhədinin Kəlbəcər rayonu istiqamətində təxribata əl atıb.

Nazirliyin məlumatına görə, onlar Azərbaycan ordusunun sərhəddə yerləşən mövqelərinə aparan təchizat yolunu minalayarkən qarşı tərəfin altı hərbi qulluqçusu mühasirəyə alınaraq əsir götürülüb.

Ermənistan baş nazirinin səlahiyyətlərini icra edən Nikol Paşinyan isə hərbçilərin Ermənistan ərazisindən oğurlandığını iddia edir. Dünən, mayın 28-də də Azərbaycan Naxçıvan istiqamətində bir hərbi qulluqçunun yaralandığını açıqlayıb.

Öz növbəsində Ermənistan Müdafiə Nazirliyi isə Naxçıvan ərazisini atəşə tutmaları barədə Azərbaycan tərəfinin açıqlamasını təkzib edərək, bildirib ki, belə bir hal baş verməyib.

Prezident: «Təxribat cavabsız qalmamalı idi və qalmadı»

İlham Əliyev, 10 may 2021, Naxçıvan
İlham Əliyev, 10 may 2021, Naxçıvan

Mayın 28-də Prezident İlham Əliyev də Ağdam şəhərinin bərpasının təməl daşının qoyulması mərasimində çıxışında bildirib ki, Ermənistan tərəfi öz təxribatçı əməllərindən əl çəkmir :

« Onlar da bizim gücümüzü bilirlər və görürlər. Ona görə son günlər ərzində Azərbaycan-Ermənistan sərhədi ərazisində Ermənistan ordusu tərəfindən törədilmiş təxribat cavabsız qalmamalı idi və qalmadı».

Petrosyan:Müharibəni ona görə uduzduq ki, zamanın gedişatını anlamadıq
Gözlə

No media source currently available

0:00 0:02:05 0:00

Milli Məclisin Müdafiə, Təhlükəsizlik və Korrupsiya ilə mübarizə Komitəsinin üzvü Elman Məmmədov «Turan» İnformsiya Agentliyinə bildirib ki, gərginliyin yaranmasının müxtəlif versiyaları var :

«Ermənistan 30 ilə yaxın idi ki, Azərbaycan ərazilərini işğal etmişdi və ermənilər orada məskunlaşmışdı. Bu ərazinin xeyli hissəsi Azərbaycan-Ermənistan sərhəd bölgəsidir. İndi Azərbaycan öz tarixi sərhədlərini bərpa edir. Ermənilər bunu qəbul etmir».

«Bunların xəritələri və digər sənədləri, arxivi, əsası var»

Azərbaycan və Ermənistan sərhəddinin bir hissəsini göstərən xəritə
Azərbaycan və Ermənistan sərhəddinin bir hissəsini göstərən xəritə

Deputat qeyd edib ki, bu sərhədlər hələ sovet dönəmində müəyyən olunub:

«Bunların xəritələri və digər sənədləri, arxivi, əsası var. Bu xəritələr Moskvada da, Azərbaycanda da, Ermənistanda da var. Sadəcə olaraq bu, onların növbəti təxribatı və hay-küyüdür».

Komitə üzvü vurğulayıb ki, Ermənistan Beynəlxalq təşkilatlara müraciət edir :

«Deyirlər ki, Azərbaycan bizim ərazilərimizə daxil olub, köməyə gəlin. Lakin həmin təşkilatlar xəritəyə baxırlar, peyklərdən baxırlar və müəyyən edirlər ki, Azərbaycan Ermənistan ərazisində daxil olmayıb.»

Deputatdan versiyalar...

Elman Məmmədov, 13 iyul 2010
Elman Məmmədov, 13 iyul 2010

Deputatın fikrincə, hadisələrin digər mümkün səbəb kimi Ermənistanda iyun ayında keçiriləcək parlament seçkiləridir:

« N.Paşinyanla R.Köçaryan (keçmiş Prezident) arasında gedən mübarizə də səbəb ola bilər. Bir versiya var ki, N.Paşinyan qəsdən bu məsələləri qızışdırır ki, diqqət onun seçki kampaniyasından yayınsın. Digər tərəfdən bu gün Ermənistan ordusunda qalmaqda olan Köçaryan, Sərkisyan (keçmiş Prezident) tərəfdarları Paşinyanın mövqelərini daha da zəiflətmək üçün bunu qəsdən edirlər».

E.Məmmədov hesab edir ki, bu vəziyyətdə Azərbaycan öz ərazi bütövlüyünü qorumalıdır.Deputat hesab edir ki, Azərbaycanın bir qarış torpağın belə onlarda qalmasına imkan verməyəcəyik.

«Bunun başlıca səbəbi Ermənistanda seçkilərə hazırlıqdır»

Ərəstun Oruclu, 25 dekabr 2010
Ərəstun Oruclu, 25 dekabr 2010

Politoloq Ərəstun Oruclu isə AzadlıqRadiosuna bildirib ki, Azərbaycan-Ermənistan sərhədində və Şuşa ətrafında vəziyyətin gərginləşməsi yaxşı perspektivdən xəbər vermir :

«Bunun başlıca səbəbi Ermənistanda seçkilərə hazırlıqdır. Biz görürük ki, Paşinyan birmənalı şəkildə qərbpərəst mövqe nümayiş etdirir və hətta ABŞ müşahidəçiləri sərhədə yerləşdirməsini təklif edir. Bu mövqe və Paşinyanın qalib gəlməsi ehtimalı Rusiyanı narahat etməyə bilməz».

«Rusiya hər iki tərəfə təsir edərək müəyyən gərginliklər yaratmağa çalışır»

Ekspert qeyd edib ki, bu səbəbdən Rusiya hər iki tərəfə təsir edərək müəyyən gərginliklər yaratmağa çalışır :

«Ola bilsin ki, hansısa lokal konfliktlər təhrik etməyi düşünür. Çünki kiçik uğursuzluq belə Paşinyanın seçkilər nəticələrinə mənfi təsir göstərəcək. Çox təəssüf ki, Azərbaycan tərəf də bu addımlara dəstək verir».

Ə.Oruclunun fikrincə, digər səbəb Rusiyanın Yaxın Şərqə çıxışını əldə etməsi üçün yolları açmaq istəyidir :

«Rusiya gəldi və dalana düşdü. Rusiyanın İrana nə Cəbrayıl istiqamətindən çıxışı var, nə, hələlik, Zəngəzur dəhlizi (Ermənistanın Sünik bölgəsi ) yoxdur, onun olub-olmayacağı sual altındadır. Ona görə də Moskva Xudafərin keçidini nəzarətə götürmək istəyir.».
Ekspert vurğulayıb ki, müharibə təhlükəsi artır.

Xatırlatma

2020-ci ildə, 44 günlük İkinci Qarabağ müharibəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti ələ alıb.

Onda 10 noyabr razılaşmasına (Azərbaycan, Ermənistan və Rusiya rəhbərləri arasında) əsasən, döyüşlər dayandırılıb, Laçın dəhlizində və qoşunların təmas xəttində Rusiya sülhməramlıları yerləşdirilib.

Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir. Bu il yanvarın 11-də də Moskvada Azərbaycan, Rusiya prezidentləri və Ermənistanın baş naziri üçtərəfli bəyanat imzalayıblar.

Həmin bəyanat isə əsasən, regionda nəqliyyat infrastrukturunun, iqtisadi əlaqələrin bərpa və genişləndirilməsini nəzərdə tutur.

Qarabağ münaqişəsi Ermənistanın Azərbaycana ərazi iddiaları ilə 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG