Bu gün, aprelin 28-də Azərbaycan Xalq Hərəkatının bir qrup fəalı Rusiyanın Azərbaycandakı səfirliyinin qarşısında etiraz aksiyası keçirib. Etirazçıların sözlərinə görə, aksiya Azərbaycanı 1920-ci il aprelin 28-də XI Qızıl ordunun işğalı günü ilə əlaqədardır.

İştirakçılar "Rusiya ordusu Azərbaycandan çıxarılsın!" və başqa şüarlar yazılmış plakat qaldırıblar. Eyni zamanda, Rusiya və bu ölkənin prezident Vladimir Putin haqqında müxtəlif ittihamlar səsləndiriblər.

Aksiya iştirakçıları bildirib ki, onlar Rusiya ordusunun Qarabağdan çıxarılmasını tələb edirlər. "Onlar sülhməramlı deyil. Əgər Rusiya ordusu Şuşaya "İskəndər-M" raketi atıbsa, bu ordunu sülhməramlı adlandırmaq olmaz. Biz istəyirik ki, Rusiya ordusunu Türkiyə ordusu əvəz etsin", - aksiyada vurğulanıb.

Əraziyə cəlb olunmuş polis qüvvələri plakatları etirazçıların əlindən alaraq özlərini də ərazidən uzaqlaşdırıblar. Amma buna qədər iştirakçılardan biri aksiyanin qətnaməsini oxuyub. Qətnamədə bildirilir ki, üçtərəfli bəyanatların bir çox bəndləri yerinə yetirilmir.

Aksiyada habelə vurğulanıb ki, ermənilər bölgəyə qaytarılsa da, həmin ərazidən didərgin düşmüş azərbaycanlıların qaytarılması üçün real addımlar atılmır.

Aksiya zamanı bir nəfərin saxlandığı bildirilsə də, sonradan onun da sərbəst buraxıldığı açıqlanıb.

Aksiyaya, hələlik, Rusiya səfirliyindən, Azərbaycanın Daxili İşlər Nazirliyi və başqa rəsmi qurumlarından münasibət almaq mümkün olmayıb.

Düz 101 il əvvəl Rusiyanin XI qızıl ordusu Azərbaycanın müstəqilliyinə son qoyub. Azərbaycan bir də 1991-ci ildə öz müstəqilliyinə qovuşub.

Bu yaxınlarda isə Azərbaycanın rəsmi qurumları işğaldan yeni azad edilən Şuşada "İskəndər-M" raketinin qalıqlarının aşkarlandığını bildiriblər və bununla bağlı Rusiyaya sorğu veriblər. Rusiya Müdafiə Nazirliyi isə "İskəndər-M" raketinin Şuşaya atılmasının müəyyən edilmədiyini bildiriblər.

Xatırlatma

Ötən il Azərbaycanla Ermənistan silahlı qüvvələrinin təmas xəttində başlayan 44 günlük müharibə, sonrakı razılaşma nəticəsində rəsmi Bakı Dağlıq Qarabağın bir hissəsinə və ətraf 7 rayona nəzarəti ələ alıb.

Həmin il 10 noyabr razılaşmasına (Azərbaycan, Ermənistan və Rusiya rəhbərləri arasında) əsasən, Laçın dəhlizində və təmas xəttində Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir. Bu il yanvarın 11-də də Moskvada növbəti üçtərəfli bəyanat imzalanıb. Orda isə regionda nəqliyyat infrastrukturunun, iqtisadi əlaqələrin bərpa və genişləndirilməsi nəzərdə tutulur.

Qarabağ münaqişəsi Ermənistanın Azərbaycana ərazi iddiaları ilə 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.

Yeni layihəyə əsasən, aqrar sektorda uzun illərdir qüvvədə olan 100 faizlik tam vergi azadolması ləğv olunur və onu 2027-ci il yanvarın 1-dən 5 il müddətinə 90 faizlik güzəşt mexanizmi əvəz edir.

Noyabrın 6-da Dövlət Vergi Xidmətinin rəisi Orxan Nəzərli Milli Məclisin İqtisadi siyasət, sənaye və sahibkarlıq komitəsinin iclasında çıxış edib.

AZƏRTAC-ın məlumatına görə, o, Vergi Məcəlləsindəki dəyişikliklərlə bağlı bildirib ki, istehsalçıların qazandığı gəlir və ya mənfəətin cəmi 10 faizi ümumi qaydada vergiyə cəlb ediləcək: "Bundan başqa, sadələşdirilmiş vergi üzrə tam vergi azadolması müəyyən edilmiş şərtlər daxilində daha 5 il müddətinə saxlanılacaq. Kənd təsərrüfatı güzəştlərindən istifadə Elektron Kənd Təsərrüfatı İnformasiya Sistemində (EKTİS) uçota alınma və əməliyyatların vergi hesabatlarında bəyan edilməsi ilə şərtləndiriləcək".

Son illər Azərbaycanda dövlət büdcəsinin vergi daxilolmaları durmadan artır. Layihə ilə bağlı Maliyyə Nazirliyinin ilkin açıqlamasında vurğulanırdı ki, 2027-ci ildə Dövlət Vergi Xidmətinin xətti ilə daxilolmalar dövlət büdcəsi gəlirlərinin 47 faizini və ya 18 milyard 430 milyon manat təşkil edəcək: "Bu da cari ilin təsdiq olunmuş göstəricisindən 1 milyard 520 milyon manat (9 faiz), 2025-ci ilin icra göstəricisindən isə 2 milyard 74.8 milyon manat (12.7 faiz) çoxdur. Dövlət Vergi Xidmətinin xətti ilə daxilolmaların 80.6 faizi (14 milyard 850 milyon manat) qeyri-neft-qaz sektorunun, 19.4 faizi (3 milyard 580 milyon manat) isə neft-qaz sektorunun payına düşür".

Məsələ burasındadır ki, bu ildən Azərbaycanda özəl sektorda 7 illik güzəşt müddəti başa çatıb və bu sahədə çalışanların əmək haqları yenidən gəlir vergisinə cəlb olunub. Üstəlik, bu vergi dərəcəsi 2027–2028-ci illərdə mərhələli şəkildə artacaq.

Eləcə də, bəzi istiqamətlər üzrə vergi güzəştləri müəyyən səviyyədə ya ləğv edilir, ya da tamamilə yeni formada tətbiq olunur.

Müstəqil iqtisadçılar isə bu addımı düzgün hesab etmirlər. Onlar bildirirlər ki, bu il neft kəskin bahalaşsa da, ümumi daxili məhsul (ÜDM) cəmi 1.5 faiz artıb. İqtisadçıların fikrincə, bu, real iqtisadi inkişaf demək deyil və əgər vergi siyasəti sərtləşdirilməkdə davam edərsə, bunun biznesə mənfi təsirləri qaçılmaz olacaq.

"AbzasMedia işi" üzrə 9 il müddətinə azadlıqdan məhrum edilən araşdırmaçı jurnalist Hafiz Babalıya cəzaçəkmə müəssisəsində lazımi dərmanların verilmədiyi deyilir.

Yaxınlarının sözlərinə görə, o, artıq bir ay yarımdır ki, zəruri dərmanlarını ala bilmir. Ədliyyə Nazirliyinin Baş Tibb İdarəsinin 2 saylı Cəzaçəkmə Müəssisəsində saxlanılan 55 yaşlı jurnalistin dərman təminatını dayandırdığı iddia olunur.

Yaxınları əlavə ediblər ki, damar xəstəliyindən əziyyət çəkən jurnalistin həm də üçüncü qrup görmə əlilliyi var. Onun hətta həkimin təyin etdiyi göz təzyiqini aşağı salan xüsusi dərmanı da əldə edə bilmədiyi söylənir.

Müəssisənin tibb-sanitar hissəsi isə dərmanların verilməməsini satınalma müsabiqəsinin hələ keçirilməməsi ilə izah edib.

Hələlik səsləndirilən bu iddialarla bağlı nə cəzaçəkmə müəssisəsindən, nə də bütövlükdə Penitensiar Xidmətdən münasibət öyrənmək mümkün olub.

Bundan əvvəl də həbsdə olan bir çox jurnalist və ictimai fəalın lazımi müayinə və müalicədən məhrum qalmaları ilə bağlı çoxsaylı şikayətlər yayılıb. Amma rəsmi qurumlar bu qəbildən olan müraciətlərin araşdırılması barədə hər hansı açıqlama verməyiblər.

Xatırlatma

H.Babalı 2023-cü ilin dekabrında "AbzasMedia işi" çərçivəsində saxlanılıb. Eyni iş üzrə "AbzasMedia"nın direktoru Ülvi Həsənli, baş redaktoru Sevinc Vaqifqızı, layihə koordinatoru Məhəmməd Kekalov, jurnalistlər Elnarə Qasımova və Nərgiz Absalamova, eləcə də AzadlıqRadiosunun əməkdaşı, iqtisadçı Fərid Mehralızadə həbs olunublar.

2025-ci il iyunun 20-də Bakı Ağır Cinayətlər Məhkəməsi Ü.Həsənlini, S.Vaqifqızını, H.Babalını və F.Mehralızadəni 9 il, N.Absalamova ilə E.Qasımovanı 8 il, M.Kekalovu isə 7 il 6 ay müddətinə azadlıqdan məhrum edib. Onlara qarşı qaçaqmalçılıq və müxtəlif maliyyə pozuntuları ilə bağlı ittihamlar irəli sürülsə də, məhkumlar bu iddiaları qəbul etmirlər.

Hüquq müdafiəçilərinin hazırladığı siyahıya əsasən, hazırda Azərbaycanda 322 siyasi məhbus var. Rəsmi qurumlar isə ölkədə siyasi məhbusların olması fikrini rədd edir və həmin şəxslərin törətdikləri konkret əməllərə görə ədalətli mühakimə olunduqlarını bildirirlər.

Azərbaycan Xalq Cəbhəsi Partiyasının (AXCP) Sabirabad şöbəsinin fəalı Mircəmil Ağayevin 30 sutkalıq inzibati həbs olunduğu bildirilir. Noyabrın 4-də AXCP-nin yaydığı bu məlumatda hadisənin detalları açıqlanmır.

Partiyadan bildirilib ki, fəal bir gün əvvəl — noyabrın 3-də AXCP sədri Əli Kərimli və müavini Məmməd İbrahimin məhkəməsində iştirak etmək üçün Bakıya gəlibmiş. Əlavə edildiyinə görə, elə həmin gün Sabirabada qayıdan M.Ağayevi evinin qarşısında mülki geyimli şəxslər saxlayaraq naməlum istiqamətə aparıblar. Partiya fəalın şərləndiyini iddia edir. Rəsmi qurumlardan isə hələlik bu məsələyə hər hansı münasibət almaq mümkün olmayıb.

Son illər AXCP-nin bir çox üzvü vaxtaşırı olaraq inzibati qaydada həbs edilir. Hazırda partiyanın 20 civarında üzvü, eləcə də təşkilatın sədri Əli Kərimli uzun müddətdir ki, həbsdədir. Onlara qarşı müxtəlif ittihamlar irəli sürülsə də, AXCP bu həbslərin siyasi sifariş olduğunu bəyan edir.

Ə.Kərimli və M.İbrahim Cinayət Məcəlləsinin 278.1-ci (hakimiyyəti zorla ələ keçirməyə yönələn hərəkətlər) maddəsi ilə ittiham olunurlar. Bu maddə 12 ildən 20 ilədək və ya ömürlük azadlıqdan məhrumetmə cəzasını nəzərdə tutur. Hər iki siyasətçi ittihamları əsassız və siyasi motivli sayır.

Hüquq müdafiəçilərinin son hesabatlarına görə, Azərbaycan həbsxanalarında 322 siyasi məhbus var. Rəsmilər isə ölkədə siyasi baxışlarına görə həbslərin olması barədə iddiaları rədd edir və həmin şəxslərin törətdikləri konkret cinayət əməllərinə görə cəzalandırıldıqlarını bildirirlər.

Gələn il dövlət borcuna xidmət xərclərinin 2.2 milyard manat olacağı gözlənilir ki, bu da ümumi büdcə xərclərinin 5.2 faizini təşkil edir.

Bu rəqəm "Azərbaycan Respublikasının 2027-ci il dövlət büdcəsi haqqında" qanun layihəsində öz əksini tapıb.

Noyabrın 4-də parlamentin İqtisadi siyasət, sənaye və sahibkarlıq komitəsinin iclasında layihənin təqdimatı keçirilib.

Rəsmi qurumlar bu rəqəmin dünyadakı orta göstəricidən xeyli yaxşı olduğunu bildirirlər.

Layihəyə əsasən, daxili borcun ödənilməsi üçün 772 milyon manat, xarici borc üçün isə 1 milyard 427 milyon manat vəsait nəzərdə tutulur.

Borcların qaytarılmasına ayrılan bu pul İcbari Tibbi Sığorta Fonduna ayrılan vəsaitdən düz iki dəfə çoxdur. Belə ki, büdcə layihəsində fond üçün cəmi 1 milyard 100 milyon manat ayrılıb.

Qanun layihəsində 2027-ci il dövlət büdcəsinin gəlirləri 39 milyard 254 milyon manat, xərcləri isə 42 milyard 400 milyon manat həcmində planlaşdırılır.

Lakin müstəqil iqtisadçılar rəsmilərlə eyni fikirdə deyillər və borclara bu qədər böyük vəsaitin ayrılmasını ölkə vətəndaşları üçün müsbət hal hesab etmirlər. Onlar vurğulayırlar ki, Azərbaycanın xarici dövlət borcunun 3 milyard 52 milyon 700 min dolları, yəni təxminən 67.7 faizi məhz qarşıdakı 5 il ərzində ödənilməlidir.

Maliyyə Nazirliyinin açıqlamasına görə, bu ilin ilk doqquz ayında ölkənin ümumi dövlət borcu təxminən 2 milyard manat (8 faiz) azalaraq 23.8 milyard manata düşüb. Bunun üçdə biri — 7.6 milyard manatı (4.5 milyard dolları) xarici borcun payına düşür.

Bu il oktyabrın 1-nə olan məlumata görə, ölkənin strateji valyuta ehtiyatları 89.4 milyard ABŞ dolları həcmindədir.

Milli Məclisin bu gün, noyabrın 3-də keçirilən iclasında "Azərbaycan Respublikasının İnsan hüquqları üzrə müvəkkilinin (Ombudsmanın) seçilməsi haqqında" məsələ müzakirəyə çıxarılıb. Müzakirələrdən sonra keçirilən səsvermədə Səbinə Əliyeva səs çoxluğu ilə növbəti müddətə Azərbaycanın İnsan Hüquqları üzrə Müvəkkili (Ombudsman) seçilib.

Bu vəzifəyə prezident İlham Əliyevin Milli Məclisə göndərdiyi sənəddə üç nəfərin namizədliyi irəli sürülmüşdü. Namizədlər Səbinə Əliyeva, Ceyhun Qaracayev və Elşanə Vəliyeva idi.

Ceyhun Yasinali oğlu Qaracayev 2010-2025-ci illərdə Azərbaycan Konstitusiya Məhkəməsinin hakimi olub.2016-cı ildən CPT-nin (İşgəncələrin və qeyri-insani və ya ləyaqəti alçaldan rəftarın və ya cəzanın qarşısının alınması üzrə Avropa Komitəsinin) müstəqil ekspertidir (mandatı 2028-ci ilədəkdir).

Elşanə Rafiq qızı Vəliyeva isə Ali Məhkəməsinin hakimi, Hakimlərin Seçki Komitəsinin üzvüdür.
Amma bir çox təhlilçilər digər namizədlərin formal xarakter daşıdığını və S.Əliyevanın seçiləcəyini qabaqcadan deyirdilər. Onlar bunu onun hakimiyyətin gerçək seçimi olması ilə izah edirdilər.

Ombudsman 7 il müddətinə seçilir və eyni şəxs bu vəzifəyə iki dəfədən artıq seçilə bilməz.

Xatırlatma

Azərbaycanda Ombudsman Aparatı 2002-ci ildən fəaliyyət göstərir. Bu quruma 17 il ərzində Elmira Süleymanova rəhbərlik edib. Hətta o dövrdə qanunla müəyyən olunmuş vəzifə müddətinin aşıldığı bildirilirdi.

2019-cu ildən onu S.Əliyeva əvəz edir. O, Milli Məclisin komitə sədri, hakim Yeni Azərbaycan Partiyasının (YAP) təmsilçilərindən olan Siyavuş Novruzovun həyat yoldaşıdır.

Hüquq müdafiəçiləri, bir qayda olaraq, Ombudsmanın illik hesabatlarını tənqidlə qarşılayırlar. Bu tənqidlərdə əsasən hesabatda təcridxanalardakı konkret işgəncə halları ilə bağlı şikayətlərə toxunulmaması qabardılır. Ombudsman Aparatı isə bu tənqidləri əsassız sayır.

“Şəki Yaylası" istirahət mərkəzində 2 nəfərin ölümü ilə nəticələnən hadisəyə görə sahibkar və digər bir şəxs həbs olunub.

Bu barədə noyabrın 2-də Baş Prokurorluğun Mətbuat xidməti məlumat yayıb.

Məlumatda bildirilir ki, istintaqla sahibkarlıq fəaliyyəti ilə məşğul olan Ramiz Hüseynovun istirahət mərkəzini idarə etdiyi müddətdə işə “laqeyd münasibət göstərərək” iki nəfərin ehtiyatsızlıqdan ölümünə səbəb olan səhlənkarlıq etməsinə əsaslı şübhələr müəyyən edilib:

“'Zipline' kanat yolu üçün nəzərdə tutulmuş qüllənin inşasını bu sahədə müvafiq lisenziyası və xüsusi təhsili olmayan Abasət Paşayevə şifahi qaydada həvalə edən Ramiz Hüseynov öz rəhbərliyi və birbaşa göstərişləri ilə qülləni qanunsuz inşa etdirib. Qüllənin üzərindəki dəmir konstruksiyanın deformasiyaya uğraması nəticəsində kanatlarda dalğalanma yaranıb və sürüşməni təmin edən əsas zipline qurğusu kanatdan çıxıb”.

Əlavə edildiyinə görə, kustar üsulla hazırlanmış tormozlama və əlavə təhlükəsizlik vasitəsinin plastik boru hissəsinin kanata keçirilməsi səbəbindən kanatın titrəməsi nəticəsində həmin qurğunun parça hissəsi cırılıb, nəticədə, kanatdan istifadə edən Ucal Bayramovla Coşqun Məmmədzadə hündürlükdən yıxılaraq aldıqları xəsarətlərdən hadisə yerində vəfat ediblər.

Noyabrın 2-də Ramiz Hüseynov Cinayət Məcəlləsinin 314.3-cü (iki şəxsin ölümünə səbəb olan səhlənkarlıq), Abasət Paşayev isə 124.2-ci (ehtiyatsızlıqdan iki və ya daha çox şəxsi öldürmə) maddələri ilə təqsirləndirilən şəxs qismində cəlb edilərək onlara ittihamlar elan edilib. Şəki rayon Məhkəməsinin qərarları ilə təqsirləndirilən şəxslərin hər ikisi barəsində həbs qətimkan tədbiri seçilib.

Hələlik, rəsmi açıqlamaya həbs edilən şəxslərdən və onların yaxınlarından münasibət almaq mümkün olmayıb,
Həmin ittiihamlarla şəxslərə üç ildən yeddi ilədək (sahibkara verilən ittiham üzrə) və iki ildən altı ilədək (digər şəxsə) həbs cəzası verilə bilər.

10.09.2026

Şəkidə iki nəfərin öldüyü hadisə ilə bağlı cinayət işi başlanıb

Şəkinin Baş Küngüt kəndi ərazisindəki "Şəki yaylası" istirahət mərkəzində iki şəxsin hündürlükdən yıxılaraq ölməsi faktı ilə bağlı cinayət işi başlanıb.

Rəsmi açıqlamaya görə, ilkin araşdırma zamanı müəyyən edilib ki, 1999-cu il təvəllüdlü B.U.A. və 1995-ci il təvəllüdlü M.C.C. "Zipline" əyləncəsindən istifadə edərkən kanat sisteminin bərkidildiyi metal qurğu əyilərək formasını itirdiyi üçün əsas mexanizm kanatdan çıxıb və təhlükəsizlik avadanlığı zədələnib.

Nəticədə hər iki şəxsin hündürlükdən yerə düşərək hadisə yerindəcə həyatını itirdiyi bildirilir.

Faktla bağlı Şəki rayon Prokurorluğunda Cinayət Məcəlləsinin 314.3-cü (iki şəxsin ölümünə səbəb olan səhlənkarlıq) maddəsi ilə cinayət işi başlanıb və ibtidai istintaq aparılır.

Bu maddə üzrə təqsiri sübuta yetirilən şəxsləri 3 ildən 7 ilədək müddətə azadlıqdan məhrum etmə cəzası gözləyir.

Rəsmi açıqlamaya sözügedən istirahət mərkəzinin rəhbərliyi və həlak olan şəxslərin yaxınlarından münasibət almaq mümkün olmayıb.

9 sentyabr

FHN ölümə səbəb olan qurğunun onun nəzarətində olmadığını bildirib. Suallar açıq qalır

Fövqəladə Hallar Nazirliyi (FHN) Şəki rayonunda ölümə səbəb olan qurğuya nəzarətin onların səlahiyyətinə aid olmadığını bildirib.

Qurumdan APA-nın sorğusuna cavab olaraq deyilib: "Mexanikləşdirilmiş, yəni elektrik mühərriki və ya ötürücü bucurqad vasitəsilə hərəkət etdirilən qurğu olmadığından təhlükə potensiallı obyektlərin siyahısına daxil deyil. Bu səbəbdən FHN Sənayedə İşlərin Təhlükəsiz Görülməsi və Dağ-Mədən Nəzarəti Dövlət Agentliyinin nəzarət sahəsinə aid deyil".

Bu açıqlamaya, hələlik, istirahət mərkəzinin rəhbərliyindən münasibət almaq mümkün olmayıb.

FHN-in açıqlamasında onun nəzarət etmədiyi bir qurğunun istirahət mərkəzində quraşdırılmasına və istifadəsinə görə hansı qurumun konkret məsuliyyət daşıdığından bəhs edilmir. Hələlik, ölümlərlə bağlı hər hansı başqa versiya da səslənmir.

Üstəlik, istirahət mərkəzlərində texniki təhlükəsizlik məsələlərinin vaxtaşırı gözdən keçirilib-keçirilmədiyi sualı da açıq qalır.

8 sentyabr

Şəkidə kanatın trosu qırılıb, iki nəfər ölüb

Sentyabrın 8-də Şəki rayonundakı istirahət mərkəzlərinin birində bədbəxt hadisə olub, iki nəfər ölüb.

İlkin məlumata görə, mərkəzdəki əyləncə qurğusunda texniki nasazlıq baş verib və iki nəfər hündürlükdən yıxılaraq həyatını itirib.

Faktla bağlı araşdırma aparılır.

Hələlik məsələyə istirahət mərkəzinin rəhbərliyindən və ölənlərin yaxınlarından münasibət almaq mümkün olmayıb.

Bu, ölkədəki istirahət yerlərində baş verən ilk belə hadisə deyil. Əvvəllər də oxşar qəzalarda ölənlər olub.

Digər tərəfdən, bəzi ekspertlərin qənaətinə görə, istintaq zamanı faciəni doğuran real səbəblərin üstündən çox vaxt sükutla keçilir.

2026-cı ilin üçüncü rübündə Azərbaycan Dövlət Neft Şirkətinin (SOCAR) qazma işlərinin həcmi ötən ilin eyni dövrü ilə müqayisədə 74.3 faiz artıb.

Bu barədə noyabrın 2-də şirkət özü məlumat yayıb.

Məlumata görə, bu ilin üçüncü rübündə SOCAR 21 min metrdən çox qazma işi həyata keçirib və bu göstərici ötən ilin müvafiq dövrü ilə müqayisədə 74.3 faiz çoxdur.

Habelə bildirilir ki, 2026-cı ilin üçüncü rübündə Azərbaycanda SOCAR üzrə 6.6 milyon ton xam neft hasil edilib.

Bir qədər əvvəl isə Energetika Nazirliyi 2026-cı ilin yanvar-sentyabr aylarında Azərbaycanda ümumilikdə 19.9 milyon ton neft (kondensatla birlikdə) hasil edildiyini açıqlamışdı. Həmin həcmə SOCAR-la yanaşı, "Azəri-Çıraq-Günəşli", "Şahdəniz" və "Abşeron" yataqlarından əldə olunan hasilat da daxil idi.

Bununla da neft hasilatının ötən ilin eyni dövrü ilə müqayisədə 3.86 faiz azaldığı bildirilirdi.

Bu il Yaxın Şərqdə vəziyyətin gərginləşməsi səbəbindən Azərbaycanın "qara qızıl"ı 70 faizdən çox bahalaşıb.

Son illər Azərbaycanda neft hasilatı kəskin azalıb; belə ki, 2010-cu ildə 50.83 milyon ton olan bu rəqəm ötən il 28 milyon tona belə çatmayıb.

Müstəqil iqtisadçılar hesab edirlər ki, Azərbaycan hökuməti qazma işlərini artırmaqla yanaşı, real iqtisadi şaxələndirməyə diqqəti gücləndirməlidir. Onların fikrincə, əks halda dayanıqlı iqtisadiyyat qurmaq istəyi sadəcə söz olaraq qalacaq.

Həbsdə olan ictimai fəal Bəxtiyar Hacıyev saxlandığı 6 saylı Cəzaçəkmə Müəssisəsinin rəhbərliyi və nəzarətçilərindən şikayətçidir.

Bu barədə onun qardaşı Vüqar Hacıyev sosial şəbəkə hesabında məlumat yayıb.

V.Hacıyevin sözlərinə görə, qardaşı cəzaçəkmə müəssisəsindəki qeyri-insani rəftardan şikayət edir.

O vurğulayıb ki, B.Hacıyev Penitensiar Xidmətin yeni təyin olunmuş rəisi, ədliyyə general-mayoru Sahib Rzayevə müraciət edərək nümayəndə göndərilməsini və şikayətinin araşdırılmasını istəyib.

Amma bu pis rəftarın konkret nədən ibarət olduğu barədə əlavə məlumat verilməyib.

Hələlik bu açıqlamaya Penitensiar Xidmətin yeni rəhbərliyindən və sözügedən müəssisədən münasibət almaq mümkün olmayıb.

S.Rzayev oktyabrın 27-də prezident İlham Əliyevin sərəncamı ilə ədliyyə nazirinin müavini – Penitensiar Xidmətin rəisi vəzifəsinə təyin edilib. O, bu vəzifədə Mirsaleh Seyidovu əvəz edib.

B.Hacıyev bundan əvvəl də 6 saylı Cəzaçəkmə Müəssisəsində hüquqlarının pozulduğunu bildirmişdi.

O vaxt Hacıyevin vəkillə və Ombudsman Aparatı ilə əlaqə saxlamaqda, həmçinin lazımi tibbi yardım almaqda çətinlik çəkdiyi bildirilirdi.

Həmin vaxt da rəsmilərdən konkret bu şikayətə münasibət almaq mümkün olmamışdı. Amma Penitensiar Xidmət bundan əvvəl oxşar şikayətlərə münasibət bildirərkən məhbuslara qarşı heç bir ayrı-seçkilik edilmədiyini və onlarla qanun çərçivəsində davranıldığını açıqlayıb.

Xatırlatma

B.Hacıyev 2022-ci il dekabrın 9-dan həbsdədir. Həbs edilərkən ona Cinayət Məcəlləsinin 221.2.2-ci (vəzifəsini yerinə yetirən şəxsə qarşı müqavimət göstərməklə xuliqanlıq) və 289.1-ci (məhkəməyə sayqısızlıq) maddələri ilə ittiham irəli sürülmüşdü.

İstintaqın gedişində B.Hacıyevə qarşı qanunsuz sahibkarlıq, cinayət yolu ilə əldə olunmuş vəsaitlərin leqallaşdırılması, qaçaqmalçılıq, saxta sənədlərdən istifadə, vergidən yayınma və s. kimi əlavə ittihamlar da irəli sürülüb.

Ötən ilin yanvarında Bakı Ağır Cinayətlər Məhkəməsi B.Hacıyevə 10 il həbs cəzası kəsib, onun mənzilinin və bank hesabındakı vəsaitin müsadirə olunması barədə qərar çıxarıb. Bakı Apellyasiya Məhkəməsi də bu hökmü qüvvədə saxlayıb.

B.Hacıyev özünü təqsirli bilmir və bu ittihamların hamısının əsassız olduğunu vurğulayır.

2026-cı ilin ötən dövründə Azərbaycanın valyuta bazarında təklif tələbi əhəmiyyətli dərəcədə üstələyib. Bu tendensiya özünü həm nağd, həm də qeyri-nağd seqmentdə aydın büruzə verib.

Mərkəzi Bankın oktyabrın 29-da yaydığı məlumatda deyilir: "2026-cı ilin 9 ayında mübadilə məntəqələrinin müştərilərdən aldığı nağd xarici valyutanın həcmi satışı 759 milyon ABŞ dolları qədər üstələyib. Rezident fiziki şəxslərin əmanətlərində dollarlaşma səviyyəsi son bir ildə 3.3 faiz bəndi azalaraq, 2026-cı ilin sentyabrında 25.7 faizə enib".

Mərkəzi Bank əlavə edib ki, valyuta bazarında tələbin kəskin azaldığı, təklifin isə artdığı bir şəraitdə qurum valyuta alışları həyata keçirib: "9 ay ərzində Mərkəzi Bankın valyuta ehtiyatları 33.4 faiz artaraq 15.4 milyard ABŞ dollarına yüksəlib".

Müstəqil iqtisadçılar isə bildirirlər ki, bu il Yaxın Şərqdə gərginliyin artması fonunda neftin bahalaşması ölkənin gəlirlərinə müsbət təsir göstərib. Bununla belə, ekspertlər bu müsbət amilə rəğmən, ölkədə iqtisadi fəallığın xeyli aşağı düşdüyünü və Ümumi Daxili Məhsulda (ÜDM) artımın cüzi olduğunu (bu ilin 9 ayında cəmi 1.5 faiz) vurğulayırlar.

İqtisadçıların fikrincə, mövcud vəziyyət devalvasiya riskini müəyyən müddətə aradan qaldırsa da, ölkədə davamlı iqtisadi inkişafın təmin olunacağına dair şübhələri artırır.

Azərbaycanda 2027-ci il üçün yaşayış minimumunun 14 manat artırılması nəzərdə tutulur. Bu dəyişiklik "Azərbaycan Respublikasının 2027-ci il dövlət büdcəsi haqqında" qanun layihəsində öz əksini tapıb.

Layihəyə əsasən, gələn il ölkə üzrə yaşayış minimumu 314 manat təşkil edəcək. Bu göstərici əməkqabiliyyətli əhali üçün 334 manat, pensiyaçılar üçün 258 manat, uşaqlar üçün isə 274 manat olaraq müəyyən edilib. Eyni zamanda, ehtiyac meyarının həddinin də 314 manata çatdırılması proqnozlaşdırılır.

Lakin nəzərdə tutulan 14 manatlıq bu artım rəsmi inflyasiya tempindən aşağıdır. Dövlət Statistika Komitəsinin məlumatına görə, 2026-cı ilin yanvar-sentyabr aylarında istehlak qiymətləri ötən ilin eyni dövrü ilə müqayisədə 5.7 faiz yüksəlib. Bununla belə, müstəqil iqtisadçılar rəsmi statistikanın doğruluğuna şübhə edir və son bir ildə real inflyasiyanın ikirəqəmli olduğunu bildirirlər.

Qanun layihəsinin gələn həftə deputatların müzakirəsinə çıxarılacağı gözlənilir.

Embed paylaş

4 nəfərlik ailənin başçısı: 'Ayda min manat ölməmək üçün bəs edər'

Mənbə: AzadlıqRadiosu

Embed paylaş

Kod yaddaşa götürüldü

---

en px hündürlük px

---

Link kopyalandı

No media source currently available

0:00 0:02:57 0:00

Azərbaycanda bütün ixtisaslar üzrə həkimlərin sayı son bir ildə (2024-2025-ci illərdə) 35 min 233-dən 34 min 776 nəfərə, orta tibb işçilərinin sayı isə 57 min 663-dən 55 min 314 nəfərə düşüb.

Bu barədə Dövlət Statistika Komitəsinin oktyabrın 27-də dərc etdiyi "Azərbaycanda qadınlar və kişilər – 2026" statistik məcmuəsində bəhs edilir.

Azalma əsasən qadın tibb işçiləri ilə bağlıdır. Belə ki, onların sayı 54 min 466-dan 52 min 126 nəfərə geriləyib.

Rəsmi qurumlar, hələlik, bu azalmanın səbəbini izah etməyiblər.

Amma son bir ildə Azərbaycanda bir çox həkimlərin, xüsusilə də stomatoloqların ixtisarlarla bağlı şikayətləri eşidilib.

Cavabdeh rəsmi qurumlar isə həmin şikayətlərə cavab olaraq optimallaşdırma tədbirlərinin görüldüyünü diqqətə çatdırıblar.

Mirsaleh Seyidov Azərbaycan ədliyyə nazirinin müavini - Penitensiar Xidmətin rəisi vəzifəsindən azad olunub. Prezident İlham Əliyev oktyabrın 27-də bununla bağlı sərəncam imzalayıb. M.Seyidov 2023-cü ildən bu vəzifəni icra edirdi.

Onun fəaliyyəti ölkədə birmənalı qarşılanmayıb. Xüsusilə siyasi məhbus hesab olunan şəxslər cəzaçəkmə müəssisələrindəki işgəncə şikayətlərinin obyektiv araşdırılmaması, müayinə və müalicə imkanlarının məhdudluğu, eləcə də ümumi saxlanma şəraiti ilə bağlı tez-tez tənqidi fikirlər səsləndiriblər. Penitensiar Xidmət isə bu qəbildən olan tənqidləri əsassız sayıb.

Bəzi hüquq müdafiəçiləri isə hesab edirlər ki, Azərbaycandakı cəzaçəkmə müəssisələrində yaşanan bu çatışmazlıqlar sırf Penitensiar Xidmət rəhbərliyinin idarəçiliyindən qaynaqlanmır, bu daha çox sistemin problemidir.

Prezidentin digər bir sərəncamı ilə onun yerinə Sahib Rzayev təyin edilib.

Yeni rəisi kimdir

S.Rzayev də sələfi ilə eyni yaşdadır, o, 1977-ci ildə doğulub. 2001-ci ildə Bakı Dövlət Universitetinin hüquqşünaslıq ixtisası üzrə bakalavr dərəcəsi alıb. O, 2006-cı ilə qədər daxili işlər orqanlarında müstəntiq, 2006–2023-cü illərdə isə Fövqəladə Hallar Nazirliyində şöbə, idarə və baş idarə rəisi vəzifələrində çalışıb.

2025-ci ilin yanvarından Ədliyyə Nazirliyinin İstintaq idarəsinin rəis müavini, daha sonra isə həmin idarənin rəisi vəzifəsində işləyib.

Azərbaycanda vaxtı keçmiş kreditlərin həcmi yenə artmaqda davam edir. Mərkəzi Bankın bu gün, oktyabrın 27-də açıqladığı hesabata görə, bu il oktyabrın 1-nə ölkə banklarında vaxtı keçmiş kreditlərin məbləği 754.3 milyon manata çatıb.

Son bir ildə problemli kreditlərin həcmində – bəzi aylar (ötən ilin dekabrı, bu ilin iyun və avqust ayları) istisna olmaqla – davamlı artım müşahidə edilib. Problemli kreditlər ilin əvvəli ilə müqayisədə 35, bir il əvvəlki dövrlə nisbətdə isə 42 faizdən çox artıb.

Rəsmi qurumlar problemli kreditlərdəki bu artım tendensiyasını hələlik şərh etməyiblər. Müstəqil ekspertlər isə bu prosesi birbaşa əhalinin maddi durumunun və alıcılıq qabiliyyətinin getdikcə pisləşməsi ilə əlaqələndirirlər.

Xatırlatma

Azərbaycanda 2015-ci ildə iki devalvasiya baş vermiş, nəticədə manat iki dəfədən çox dəyər itirmişdi. O dövrdə problemli kreditlərin məbləğinin 2 milyard manata yaxınlaşdığı açıqlanmışdı. 2019-cu il fevralın 19-da isə prezident fiziki şəxslərin xarici valyutada olan problemli kreditlərinin həlli ilə bağlı fərman imzaladı. Həmin fərmana əsasən, 10 min dollara qədər kredit götürmüş fiziki şəxslərin 2015-ci il devalvasiyaları nəticəsində yaranmış borc fərqini dövlət ödədi. Bu addımdan sonra problemli kreditlərin həcmi azaldı.

2021-ci ilin əvvəlində vaxtı keçmiş kreditlərin yenidən artdığı açıqlandı və bu tendensiya koronavirus pandemiyası ilə əlaqələndirildi. 2022-ci ildə isə problemli kreditlərin azaldığı vurğulanırdı. Amma son bir ildə, əsasən, tam əks proses müşahidə edilir.

Müxalif Azərbaycan Xalq Cəbhəsi Partiyasının (AXCP) Suraxanı rayon şöbəsinin üzvü Layiq Rəşidovun 10 sutka inzibati həbs cəzası aldığı deyilir. AXCP onun əsassız yerə həbs olunduğunu hesab edir.
Partiyadan bildirilir ki, O, Xətai Rayonunun 35-ci Polis Bölməsinə aparılıb və sosial şəbəkələrdəki paylaşımlarına görə, İnzibati Xətalar Məcəlləsinin 388-1.1.1-ci maddəsi ilə günahlandırılıb.

Həmin maddə internetdə və ya informasiya-telekommunikasiya şəbəkəsində qanunla yayılması qadağan edilən məlumatların yerləşdirilməsi ilə bağlıdır. Maddəyə əsasən, fiziki şəxslər 500 manatdan 1000 manatadək cərimə edilə bilər. Qanunvericilikdə nəzərdə tutulan hallarda bir ayadək inzibati həbs də tətbiq oluna bilər.

Lakin, partiyadan başqa detallar açıqlanmayıb.AXCP-nin vurğulamasına görə, bu, 2026-cı ildə partiya üzvlərinin üzləşdiyi 10-cu inzibati həbsdir. Hələlik partiyanın bu açıqlamasını rəsmi qurumlardan dəqiqləşdirmək və onlardan münasibət almaq mümkün olmayıb.

L.Rəşidov iki gün əvvəl "Facebook" səhifəsində partiyanın həbsdə olan rəhbər şəxslərin müdafiəsi ilə bağlı paylaşım etmişdi.

Xatırlatma

Son illər AXCP-nin bir çox üzvü vaxtaşırı inzibati qaydada həbs edilir. Hazırda partiyanın 20 civarında üzvü isə uzunmüddətli həbsdədir. Onların arasında AXCP sədri Əli Kərimli də var. Həmin şəxslər müxtəlif ittihamlarla üzləşsələr də, partiya onların siyasi sifarişlə həbs edildiyini açıqlayıb.

Hüquq müdafiəçilərinin hazırladığı son siyahıya əsasən, hazırda Azərbaycan həbsxanalarında ümumilikdə 322 siyasi məhbus var. Lakin rəsmi qurumlar, bir qayda olaraq, ölkədə siyasi fəaliyyətinə görə həbslərin olması ilə bağlı iddiaları əsassız sayırlar. Onlar mühakimə olunan şəxslərin sırf törətdikləri konkret cinayət əməllərinə görə məsuliyyətə cəlb edildiyini vurğulayırlar.

Moskvada Azərbaycan ilə Rusiya arasında enerji əməkdaşlığının gündəliyində duran aktual məsələlər müzakirə olunub. Bu barədə Azərbaycanın energetika naziri Pərviz Şahbazov özünün "X" sosial şəbəkə hesabında məlumat verib.

Nazir bildirib ki, Qaz İxrac Edən Ölkələr Forumunun (GECF) 28-ci Nazirlər Görüşü və 8-ci Sammiti çərçivəsində rusiyalı həmkarı Sergey Tsivilyovla görüşüb. Görüş zamanı həm GECF çərçivəsində tərəfdaşlıq, həm də Azərbaycan-Rusiya enerji əməkdaşlığının aktual bəndləri ətrafında fikir mübadiləsi aparılıb.

Bir sıra kütləvi informasiya vasitələrinin yaydığı məlumatlara görə, rəsmi Bakı Rusiyanın "Qazprom" şirkətindən yenidən qaz almaq niyyətindədir. Azərbaycan 2022-ci ildə də sözügedən şirkətlə qaz tədarükünə dair müqavilə imzalamışdı. Həmin razılaşmaya əsasən, 2022-ci ilin noyabrından 2023-cü ilin martına qədər Rusiyadan Azərbaycana 1 milyard kubmetrə yaxın qazın nəqli nəzərdə tutulurdu. Lakin son illərdə Azərbaycanın sanksiyalar altında olan şimal qonşusundan qaz idxalını əhəmiyyətli dərəcədə azaltdığı bildirilirdi.

Xatırlatma

Rusiya 2022-ci il fevralın 24-də Ukraynaya qarşı genişmiqyaslı hərbi təcavüzə başlayıb, bundan səkkiz il əvvəl isə Ukraynanın Krım yarımadasını ilhaq etmişdi. Yeni müharibənin başlaması ilə Qərb ölkələri və bir sıra digər dövlətlər Rusiyaya qarşı sanksiyaları daha da sərtləşdiriblər. Azərbaycan bu sanksiyalara qoşulmasa da, rəsmi Bakı Ukraynanın ərazi bütövlüyünü dəstəklədiyini və bu ölkəyə humanitar yardım göstərdiyini dəfələrlə bəyan edib.