İran və 2015-ci ildə onunla nüvə sazişi razılaşmasında iştirak edən 5 aparıcı dünya ölkəsinin xarici işlər nazirləri iyulun 6-da Vyanada bir araya gələcəklər.
AzadlıqRadiosunun İran mətbuatına istinadla verdiyi məlumata görə, onlar ABŞ-ın bu razılaşmadan çıxmasından sonra sazişin qorunması yollarını müzakirə edəcəklər.
Böyük Britaniya, Fransa, Almaniya,Çin və Rusiya hə də bu sazişə sadiq qaldıqlarını bildirirlər.
Görüşdə əsasən razılaşmanın qorunub saxlanması ilə bağlı “Avropanın təklif etdiyi tədbirlər paketi” müzakirə olunacaq.
Qeyd edək ki, bu İran prezidenti Hassan Rohani-nin İsveçrəyə səfəri fonunda baş verir. Rohani İsveçrədən qonşu Avstriyaya yollanacaq.
İran prezidenti Avropa ölkələrinin bu tədbirlər paketini qəbul edəcəklərinə ümidlə yanaşdığını bildirib.
Prezident Donald Trump bu ilin mayında ABŞ-ın İranla nüvə sazişindən çıxdığını və ona qarşı sanksiyaların bərpa ediləcəyini bəyan elədi.
Buna da bax: "ABŞ İran neftinin dünya boyunca idxalını dayandırmaq istəyir"
Bundan sonra İran valyutası sürətlə dəyərdən düşməyə başlayıb.
İranla nüvə sazişindən sonra ona qarşı beynəlxalq sanksiyalar aradan qaldırılıb.
Amma Avropa ölkələri sazişə əməl edəcəklərini bəyan ediblər.
İran nüvə sazişi və sanksiyaların qaldırılması əvəzində özünün nüvə proqramını dondurub.
