Keçid linkləri

Təcili xəbərlər
2018, 15 Dekabr, şənbə, Bakı vaxtı 04:31

SOCAR və 'Statoil' iki saziş imzalayıb


Xəzərdə neft platforması

Azərbaycan Dövlət Neft Şirkəti (SOCAR) ilə «Statoil» (Equinor) şirkətlərinin yeni kəşfiyyat və hasilat layihələri haqqında sazişlər imzaladığı bildirilir.

Bu haqda SOCAR-ın məlumatında yazılır.

Məlumata görə, mayın 30-da SOCAR-la Norveçin «Equinor» qrupunun bir hissəsi olan «Statoil Azərbaycan» şirkəti arasında 2 saziş imzalanıb. Həmin sazişlər «Xəzər dənizinin Azərbaycan sektorunda «Qarabağ» neft yatağının işlənməsi ilə əlaqədar risk xidməti» (RXS) və «Əşrəfi-Dan Ulduzu-Aypara» sahəsinin kəşfiyyatı, işlənməsi, hasilatın pay bölgüsü» (HPBS) haqqındadır.

««Qarabağ» yatağında kəşfiyyat qazması cari ildə planlaşdırılır. Hazırkı Risk Xidməti Sazişinə əsasən, yataqda platformanın quraşdırılması və ilk hasilat 2021-ci ildə nəzərdə tutulur. HPBS çərçivəsində isə seysmik kəşfiyyat işlərinin yerinə yetirilməsi və ilk kəşfiyyat quyusunun qazılması nəzərdə tutulur. Layihələrin icrasından ötrü «Statoil» və SOCAR 50/50 birgə əməliyyat şirkəti yaradacaq», - şirkətin məlumatında vurğulanır.

Xatırlatma

«Qarabağ» perspektivli dəniz strukturu kimi 1959-cu ildə seysmik kəşfiyyat işləri nəticəsində aşkar edilib. Yataqda neft və qazın olması 1997-1998-ci illərdə kəşfiyyat qazması nəticəsində təsdiqlənib. Yataq Bakıdan 120 kilometr aralı, açıq dənizin 150-200 metr dərinliyində yerləşir.

«Dan Ulduzu» və «Əşrəfi» perspektiv strukturları isə Bakıdan 100-110 kilometr məsafədə yerləşir. Orda dənizin dərinliyinin 80-180 metr olduğu bildirilir. «Aypara» sahəsi isə Bakının 90 kilometrliyindədir.

SOCAR və «Statoil» (Equinor) şirkətləri 1992-ci ildən «Azəri»,«Çıraq» və dərinsulu «Günəşli» (AÇG) neft yataqlarının işlənilməsi layihəsində əməkdaşlıq edir. AÇG layihəsində SOCAR-ın payı 25, «Statoil Azərbaycan» şirkətinin payı isə 7.27 faizdir.

«Statoil Azərbaycan» şirkətinin bu yaxınlarda adı dəyişdirilmiş «Equinor Group»un (keçmiş «Statoil Group») bir hissəsi olduğu bildirilir.

Günün bütün mövzuları

XS
SM
MD
LG