Keçid linkləri

2024, 21 İyun, Cümə, Bakı vaxtı 01:47

Səfirlik: 'ABŞ Dağlıq Qarabağ rejimini tanımır'


Robert Sekuta
Robert Sekuta

«ABŞ Dağlıq Qarabağ rejimini tanımır».

«Turan» agentliyinin xəbərinə görə, ABŞ-ın Bakıdakı səfirliyi Qarabağ separatçılarının lideri Bako Saakyanın Vaşinqtona səfəri ilə əlaqədar Azərbaycan Xarici İşlər Nazirliyinin (XİN) etiraz notası ilə bağlı sorğunun cavabında belə bildirib.

***Buna da bax-Səfir: 'ABŞ şəffaf seçkilərin tərəfdarıdır'

«ABŞ-ın mövqeyi dəyişməyib. ABŞ, o cümlədən Ermənistan da daxil olmaqla digər ölkələr de-fakto Dağlıq Qarabağ rejimini tanımır. Birləşmiş Ştatlar ATƏT-in Minsk qrupu həmsədrlərinin prosesini dəstəkləyir. Münaqişənin Helsinki Yekun Aktının prinsipləri: gücdən istifadə olunmaması, ərazi bütövlüyü, bərabər hüquqlar və xalqların öz müqəddəratını təyinetməyə əsaslanan danışıqlar yolu ilə həll olunmasından ötrü səylərini davam etdirəcək», – səfirliyin şərhində vurğulanır.

ABŞ səfiri XİN-ə çağrılıb

ABŞ-ın Bakıdakı səfiri Robert Sekuta Azərbaycan Xarici İşlər Nazirliyinə (XİN) çağrılıb. Ona Azərbaycanın işğal olunmuş ərazilərində yaradılan separatçı rejimin prezidenti Bako Saakyanın ABŞ-a səfərinə razılıq verilməsi ilə əlaqədar etiraz notası təqdim edilib.

AzərTAC-ın xəbərinə görə, bu haqda XİN-nin Mətbuat xidmətinin rəhbəri Hikmət Hacıyev məlumat verib.

Xarici İşlər Nazirliyinin notası ABŞ Dövlət Departamentinə ünvanlanıb. Notada vurğulanır ki, B.Saakyanın Azərbaycan ərazilərinin işğalını dəstəkləməkdən ötrü ABŞ-da maliyyə toplamaq məqsədi daşıyan tədbirlər keçirməsinə icazə verilməsi beynəlxalq hüquqa, Azərbaycan və ABŞ arasında imzalanmış ikitərəfli sənədlərə ziddir.

***Buna da bax-Sarkisyan: 'Deyirsiz ki, Qarabağ sizə ermənilərsiz lazımdır. Bu, heç vaxt olmayacaq'

Sənəddə ABŞ-ın bu addımı ikili standartların təzahürü kimi qiymətləndirilib.

«Bir tərəfdən münaqişənin danışıqlar yolu ilə həllinə çağırış, digər tərəfdən qondarma rejimin təbliğinə imkan yaratması və Azərbaycanın işğal olunmuş ərazilərində qeyri-qanuni əməllərə göz yumması ABŞ-ın obyektivliyi barədə ciddi suallar yaradır», - H.Hacıyev bildirib.

Onun fikrincə, bu addım danışıqlar prosesinə ciddi şəkildə xələl gətirir, regionda gərginliyin artmasına xidmət edir.

B.Saakyanın Vaşinqtona səfərinin yaxın günlərdə gerçəkləşəcəyi gözlənir.

Xatırlatma

Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi, ona bitişik 7 rayon və bəzi əlavə kəndlər işğal edilib.

Dağlıq Qarabağ münaqişəsinin həlli ilə bağlı sülh danışıqları ATƏT-in Minsk qrupu həmsədrlərinin vasitəçiliyi ilə aparılır. ABŞ, Rusiya və Fransa həmsədr dövlətlərdir.

Azərbaycan və dünyanın heç bir ölkəsi Dağlıq Qarabağda yaranan separatçı rejimi rəsmən tanımır.

AzadlıqRadiosunu Rusiya hökuməti "arzuolunmaz təşkilat" elan edib

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG