ABŞ prezidenti Donald Trump yanvarın 30-da Konqresdə ilk illik müraciətini edəcək. O, artıq bir ildən çoxdur vəzifədədir.
Ağ ev rəsmilərinin deməsinə görə, çıxışın mövzusu “təhlükəsiz, güclü və qürurlu Amerika yaratmaqdır”.
Trump-ın ötən il yanvarın 20-də prezident postuna keçəndən ABŞ iqtisadiyyatının göstəricilərindən – ABŞ səhm bazarlarında son rekord artımdan, işsizlik səviyyəsinin azalmasından söz açacağı gözlənir.
Respublikaçı prezidentin bu yaxınlarda qəbul olunmuş vergi qanunvericiliyini tərifləyəcəyi, ölkədə immiqrasiya siyasətinin sərtləşdirilməsi çağırışlarını vurğulayacağı bildirilir.
*** Buna da bax: Trump: “Biz Talibanla danışmaq istəmirik”
Trump yanvarın 28-də Twitter-də yazıb ki, ABŞ iqtisadiyyatı “bir çox onilliklərdə olduğundan daha yaxşıdır. Şirkətlər daha öncə heç vaxt olmamış kimi Amerikaya qayıdırlar”.
İZLƏNƏSİ MƏSƏLƏLƏR
Xarici siyasətə gəlincə, Trump-ın Trans-Sakit Okean Tərəfdaşlıq ticarət sazişi və Paris İqlim Sazişiylə bağlı atdığı addımlardan, eləcə də İraqda və Suriyada İslam Dövləti (İŞİD) yaraqlılarını məğlub etməsindən; Şimali Koreyaya nüvə silahları və ballistik raket proqramlarına görə sərt yanaşmasından; Qüdsü İsrailin paytaxtı kimi tanımasından söz açacağı bildirilir.
Təhlilçilər prezidentin Şimali Koreya, İran və Əfqanıstanla bağlı yeni nəsə açıqlayacağını, yoxsa indiyədək bəlli sərt-xəttini bir daha dilə gətirəcəyinə izləyəcəklər.
Yanvarın 29-da BMT-nin Təhlükəsizlik Şurasının təmsilçiləri ilə naharda Trump yaxın gələcəkdə Taliban silahlı qruplaşmasıyla danışıqlara getmək ehtimalını rədd edib. Son günlər Əfqanıstanda bir-birinin ardınca ölümcül hücumlar törədilib.
Trump-ın Çinlə Rusiya barədə nə deyəcəyi də maraqla izlənir, özəlliklə də Rusiya qurumlarının və fərdlərinin gələcəkdə sanksiyaya məruz qalıb-qalmayacağı.
*** Buna da bax: ABŞ 'Putin siyahısını' açıqladı
ABŞ Xəzinədarlığı yanvarın 30-da Rusiya prezidenti Vladimir Putin hökumətinə yaxın, gələcəkdə sanksiya qoyula biləcək 210 nəfərin siyahısını açıqlayıb.
Trump-ın xalqa müraciətindən sonra Nümayəndələr Palatasının üzvü Joe Kennedy demokratların ona reaksiyasını çatdıracaq.
O, keçmiş senator və ABŞ-ın baş prokuroru Robert F. Kennedy-nin nəvəsi, keçmiş konqresmen II Joseph Kennedy-nin oğludur.
Azı beş demokrat konqresmensə Trump-ın çıxışını boykot edəcəyini bildirib.