ABŞ prezidenti Donald Trump yanvarın 10-da Şimali Koreyayla diplomatik açılımla bağlı nikbinliyini bildirib. Bu həftə Pxenyanla Cənub Koreyanın danışıqlarının regionda gərginliyi azaltmaqdan ötrü daha geniş dialoqa aparacağına ümid yaranıb.
BMT-nin Təhlükəsizlik Şurası da “Koreya yarımadasında inam yaratma imkanlarını” alqışlayıb.
“Şimali Koreyayla müəyyən problemlərimiz var, amma hazırda xeyli yaxşı danışıqlar gedir. Xeyli yaxşı enerji sərf olunur… Ümid edirik bu, təkcə ölkəmizə deyil, bütün dünyaya uğur gətirəcək. Bunun haraya aparacağını kim bilir?”, – Trump mətbuat konfransında deyib.
TRUMP DA DANIŞIQLARA “HƏ” DEYİR
Yanvarın 9-da Şimali və Cənubi Koreyalar danışıqları başlatmağa, Pxenyandan idmançıların Pxençandan Qış Olimpiya Oyunlarında iştirakına razılaşıblar.
Cənubi Koreya prezidenti Moon Jae-in-in idarəsi yanvarın 10-da bildirib ki, Trump telefon söhbətində bir məqamı vurğulayıb – iki Koreya danışıqlar apardıqca hər hansı hərbi addıma əl atılmayacaq.
*** Buna da bax: Pxenyan Olimpiya oyunlarına idmançılarını göndərəcək
Ağ Evin bəyanatına görə, Moon-la Trump razılaşıblar ki, Pxenyan nüvə fəaliyyətinin məhdudlaşdırılmasının müzakirəsindən imtina etdikcə, qlobal ictimaiyyət ona sərt sanksiyalarla “maksimum təzyiq göstərsin”. Sanksiyaları bu il BMT-nin Təhlükəsizlik Şurası qoyub.
Trump həmçinin Şimali Koreyayla danışıqların uyğun vaxtda, düzgün şəraitdə keçirilməsinə açıqlığını dilə gətirib.
ABŞ prezidenti daha öncə Pxenyanla danışıqları mənasız sayırdı. Tərəflər bir-birini yox etməklə hədələyirdi.
Cənubi Koreya prezidentinin fikrincə, Pxenyana sanksiyaların məqsədi onu danışıqlar masasına gətirməkdir, “daha güclü sanksiyalar gərginliyi artırar və təsadüfi silahlı münaqişələrə gətirər”.