Keçid linkləri

2017, 18 Dekabr, Bazar ertəsi, Bakı vaxtı 01:42

«Azərbaycan, Türkiyə və Pakistan arasında üçtərəfli formatda görüşün keçirilməsi bu dövlətlərin bir-birinə inamından irəli gələn məsələdir».

Azərbaycan Xarici İşlər Nazirliyi (XIN) mətbuat xidmətinin rəhbəri Hikmət Hacıyev bu gün, noyabrın 30-u Bakıda keçirilməsi nəzərdə tutulan Azərbaycan, Türkiyə və Pakistan xarici işlər nazirlərinin görüşünü belə dəyərləndirib.

H.Hacıyev bildirib ki, Azərbaycan üçtərəfli formatlarda iştirakda maraqlı olan dövlətdir. Digər tərəfdən, istər Türkiyə-Pakistan, istər Azərbaycan-Pakistan və istərsə də Azərbaycan-Türkiyə arasında isti münasibətlər mövcuddur:

«Elə həmin münasibətlərin də nəticəsi indi haqqında danışılan üçtərəfli formatın yaradılmasına səbəb olub. Bu formatda görüşlərin nəticələri həm bu ölkələrin, həm də bütünlükdə regionun xeyrinə olacaq».

Bu gün, noyabrın 30-da Bakıda İstanbul Prosesi çərçivəsində «Gücləndirilmiş Asiyanın Qəlbi regionuna doğru təhlükəsizlik və iqtisadi bağlantılar» mövzusunda VII nazirlər konfransının İşçi Qrupunun toplantısı keçiriləcək. Dekabrın 1-də isə nazirlər səviyyəsində konfrans olmalıdır.

«Asiyanın Qəlbi» - İstanbul Prosesinə Əfqanıstan, Azərbaycan, Çin, Hindistan, İran, Qazaxıstan, Qırğızıstan, Rusiya, Səudiyyə Ərəbistanı Krallığı, Tacikistan, Türkiyə, Türkmənistan, Birləşmiş Ərəb Əmirlikləri və BMT daxildir.

Adıçəkilən konfransın əsası 2011-ci ildə İstanbulda qoyulub, Azərbaycan isə bu prosesə 2012-ci ildən qoşulub.

Pakistan və Türkiyə xarici işlər nazirləri də bu çərçivədə Azərbaycana gəliblər. Azərbaycan, Pakistan və Türkiyə xarici işlər nazirlərinin isə ayrıca görüşü nəzərdə tutulur.

Günün bütün mövzuları

XS
SM
MD
LG