Rus estrada müğənnisi Joseph Kobzon rus televiziyaları və radiolarını vətənpərvərlik mövzusunda musiqi verilişlərini yayımlanmağa vadar etmək gərəkdiyini bildirib. Bu haqda o Rusiyanın "TASS" xəbər agentliyinə müsahibəsidnə deyib.
Müğənninin sözlərinə görə bunun üçün dövlətin pul ayırması bəs edər.
Buna da bax: Kobzon:"ABŞ-la əlaqələr dayandırılmalıdır"
"Regionlarımızda bədii özfəaliyyət kollektivləri var və daim yeniləri yaranır. Ancaq onlara imkan yaratmaq üçün siyasi qərar lazımdır, kanalları maliyyələşdirmək və keyfiyyətli məhsul vermələrini tələb etmək lazımdır", - deyə Kobzon bildirib.
O bu cür sistemin Fransada da olduğunu qeyd edib, onun sözlərinə görə Fransa televiziyası və radiosunun minimum 80 faiz proqramlarında vətənpərvərlik mövzusunun əks olunması qanunla tələb olunur.
"Bizə də belə qanun lazımdır, çünki televiziyalarda dinləməyə bir şey yoxdur" - deyə müğənni bildirib.
Xatırladaq ki, bir neçə gün bundan öncə Rusiya Dövlət Dumasının "Ədalətli Rusiya" partiyasından olan deputatı Oleg Nilov "Eurovision" (Avroviziya) musiqi yarışmasının rus analoqu "Dobrovidenie"ni yaratmağı təklif etmişdi. Bu layihənin yaradıcılarından və ideya müəlliflərindən biri isə Dövlət Dumasının digər deputatı Joseph Kobzondur.
Buna da bax: Rusiyanın 'Eurovision'da iştirakı sual altındadır
Bundan öncə "Eurovision-2017" yarışmasında Rusiyanı təmsil edəcək Julia Samojlova Ukrayna Təhlükəsizlik Xidməti tərəfindən ölkəyə buraxılmayanda, Kobzon beynəlxalq müsabiqəni boykot etməyə çağırmışdı.
