"Mən bilmirəm, Azərbaycan hakimiyyəti nə düşünür"
ABŞ-ın Bakıdakı keçmiş səfiri Richard Kauzlarich Turan-ın Vaşinqton müxbirinə müsahibəsində efv-dən sonra yaranmış vəziyyəti və hadisələrin mümkün inkişafını təhlil edib.
Sual: Azərbaycanda insan hüquqlarının vəziyyəti və ABŞ ilə hazırki münasibətlər fonunda sonuncu əfv fərmanını necə qiymətləndirirsiniz?
Cavab: Bu, Azərbaycan üçün vəziyyəti yaxşıya doğru dəyişməklə bağlı həqiqətən itirilmiş imkandır. Bu həm də mənim uzun müddət söylədiklərimi təsdiqləyir: Bakının repressiv rejimi Qərblə yaxınlığı özü üçün təhlükə kimi görür.
Bakı rejimi Avropa və ABŞ üçün çox vacib olan insan hüquqları sahəsindəki öhdəliklərini yerinə yetirmək istəmir.
Mən bilmirəm Azərbaycan hakimiyyəti nə düşünür, ancaq belə görünür ki, onlar Qərbə göstərmək istərirlər ki, yaxşı münasibətlərdə maraqlı deyillər. Ancaq bu, onların öz seçimidir.
İki Ali Hərbi məktəb niyə bağlandı?
Azərbaycan Ali Hərbi Təyyarəçilik Məktəbi və Azərbaycan Ali Hərbi Dənizçilik Məktəbinin ləğvinə hərbi ekspertlər fərqli münasibətlər bəsləyirlər. Yada salaq ki, prezident İlham Əliyevin bu günlər verdiyi sərəncamla bu iki hərbi məktəb Ali Hərbi Məktəbdə yaradılacaq uyğun fakültələrlə əvəz ediləcək.
Hərbi ekspert Üzeyir Cəfərov AzadlıqRadiosuna deyib ki, o, prezidentin belə bir sərəncam verəcəyini çoxdan gözləyirmiş:
«Azərbaycan kimi ölkədə bu qədər hərbi məktəbə ehtiyac yoxdur. Yəni sərəncamla büdcədə xeyli vəsaitə qənaət ediləcək».
Twitter trollar və “cihadçılar”la mübarizəni gücləndirir
Şosial şəbəkə “özünü yaxşı aparmayan” hesablardan telefon təsdiqi istəyir.
“Twitter” sosial şəbəkəsi trollar və “İslam cihadçıları” ilə mübarizəni gücləndirdiyini bildirib.
Şirkətin Avropa üzrə direktoru Bruce Daisley bu barədə “Independent” qəzetinə danışıb. O, saytın etibarlılığını sarsıdan trollar və İslam qruplaşmalarıyla mübarizədə gördükləri işdən söz açıb.
Trollar - internetdəki saxta hesablardan qəsdən təxribat xarakterli, qızışdırıcı, qalmaqallı, sataşmaq niyyətli yazı və şərhlər yayan adamlardır. İndi onlar istifadəçiləri çox olan sosial şəbəkələrdə daha fəaldırlar.
On ilə yaxındır fəaliyyətə başlayan “Twitter”də istifadəçi sayı 320 milyona çatıb. Ancaq bugünədək trol ucbatından hesablarını bağlayanlar da az deyil.
"Bankdan kənar maliyyə axınını nəzarətə götürməyə cəhd edilir"
İqtisadi Təşəbbüslərə Yardım Mərkəzinin eksperti Samir Əliyev AzadlıqRadiosuna dollar ətrafında yaranmış vəziyyəti şərh edir:
– Valyutadəyişmə məntəqələrinin bağlanacağı ilə bağlı xəbərləri mən də eşitmişəm. Hələ ki, rəsmi təsdiqini tapmayan xəbərdir. Ancaq güman edirəm ki, hökumət bununla manata təzyiqi azaltmaq istəyir. Valyutadəyişmə məntəqələrinin sayı həddindən artıq çoxdur. Bu gün böyük həcmdə dollar vəsaiti valyutadəyişmə məntəqələri vasitəsilə satılır və ya alınır. Düşünürəm ki, valyutadəyişmə məntəqələrinin sayının azaldılmasına gedilsin və valyuta dəyişmə bank filiallarında, kiçik bank şöbələrində həyata keçirilsin. Məqsəd də maliyyə axınına nəzarəti gücləndirməkdir. Xüsusilə də, bankdan kənar maliyyə axınını nəzarətə götürmək cəhdidir. Bununla da ölkədən kapital axınını məhdudlaşdırmaq məqsədi güdülür.