Keçid linkləri

2024, 29 Mart, Cümə, Bakı vaxtı 09:01

Təcili yardımın vaxtında çatmamasından gündə 5-6 nəfər vəfat edir


«Elə olur ki, 35-40 dəqiqəyə çağırılan yerə gedib çıxırıq»
«Elə olur ki, 35-40 dəqiqəyə çağırılan yerə gedib çıxırıq»
«Təcili yardım maşınlarının vaxtında hadisə yerinə gələ bilməməsindən Bakıda gün ərzində beş-altı nəfər dünyasını dəyişir». Bakı Şəhər Təcili və Təxirəsalınmaz Tibbi Yardım Stansiyasında baş həkimin operativ işlər üzrə müavini Mürsəl Həmidov belə deyir: «Sutka ərzində briqadamız 5-6 ölüm hadisəsilə üzləşir. Həkimlərimiz ünvana gedəndə onalara deyirlər ki, təcili yardım çağıranda xəstə hələ sağ idi. Sözsüz ki, gecikmələr nəticəsində belə halar olur».


«Hər bir sürücüdən xahiş etmək istəyirəm ki, təcili yardım maşınlarına yol versinlər, onlar bəzən işdə-yolda olur, bilmirlər, bəlkə elə təcili yardım onların evinə, ailəsinə, yaxınlarının çağırışına gedir»
Cənab Həmidovun dediyinə görə, xüsusən paytaxtın mərkəzi rayonlarındakı tıxaclar təcili yardım maşınlarının hərəkətini çətinləşdirib: «Elə olur ki, 35-40 dəqiqəyə çağırılan yerə gedib çıxırıq».

Onun dediyinə görə, əslində, həkimlər çağırış alandan ən geci 20 dəqiqə ərzində xəstənin yanında olmalıdırlar. Amma tıxaca görə, xəstənin yanına vaxtında çata bilməyən həkimlərlə vətəndaşlar arasında demək olar ki, hər gün mübahisə düşür.


Mürsəl Həmidov bildirir ki, əvvəllər əksər prospektlərdə təcili yardım maşınları yolu iki hissəyə bölən ağ zolağın üzərilə hərəkət edirdi və bu, çağırılan ünvana vaxtında çatmağa imkan verirdi. Amma indi enli magistralların əksəriyyəti ikiyə bölünüb və yolları işıqlandırmaq üçün həmin xətt boyunca elektrik dirəkləri basdırılıb. Belə olan halda təcili tibbi yardım maşınları gözləmək məcburiyyətində qalırlar. Həkimləri narahat edən ən ciddi problemlərdən biri də sürücülərin təcili yardım maşınlarına yol verməməsidir: «Hər bir sürücüdən xahiş etmək istəyirəm ki, təcili yardım maşınlarına yol versinlər, onlar bəzən işdə-yolda olur, bilmirlər, bəlkə elə təcili yardım onların evinə, ailəsinə, yaxınlarının çağırışına gedir».


Paytaxtın baş planını hazırlayan memarlardan biri Feyzulla Quliyev deyir ki, tıxacları aradan qaldırmaq üçün doqquz körpünün tikintisinə indi başlanılsa da, əslində, baş plana görə, 2005-ci ilə qədər Bakıda 100 körpü tikilib başa çatdırılmalı, metro stansiyaları artırılmalı, iri tutumlu avtobuslar gətirilməliydi. Cənab Quliyev deyir ki, sadalanan bu işlər vaxtında görülmədiyindən indi belə problemlər yaranıb.


AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

XS
SM
MD
LG