Keçid linkləri

Təcili xəbərlər
2022, 05 İyul, çərşənbə axşamı, Bakı vaxtı 19:12

Dünya xəbərləri

​Obama xarici siyasətdən danışacaq

Barack Obama


Mayın 28-də ABŞ Prezidenti Barack Obama xarici siyasətə dair çıxış edəcək. O, Nyu Yorkda ABŞ Hərbi Akademiyasında mərasimdə danışacaq. Prezidentin çıxışında ABŞ-ın dünyadakı rolu, İranın nüvə proqramı, Suriyanın kimyəvi silahları, Rusiya və Ukrayna məsələlərinə toxunacağı gözlənir.

Bir gün əvvəl Obama 2014-cü ildən sonra Əfqanıstanda 9.800 ABŞ əsgərinin qalması planını elan edib.

Milli Təhlükəsizlik Müşavirinin köməkçisi Ben Rhodes mayın 25-də deyib ki, “xarici siyasətimiz irəliyə doğru xeyli fərqli görünəcək”.

Bütün xəbərləri izləyin

'McDonald's' Qazaxıstanda işini dayandırıb

McDonald's

Qazaxıstanda bütün "McDonald's" restoranlarının fəaliyyəti dayandırılıb. Buna aid elan şirkətin "Instagram" səhifəsində yer alıb.

Məlumatda bildirilir ki, dayanma texniki səbəblərə - fiskal məlumat operatoru tərəfində problemlərə görə baş verib. Restoranların nə vaxt açılacağı barədə, hələlik, məlumat yoxdur.

"McDonald's" 2016-cı ildən Qazaxıstanda fəaliyyət göstərir. 2022-ci ilin yazında ölkənin altı şəhərində 23 ona aid restoran olub.

"Forbes" jurnalı daha əvvəl yazmışdı ki, Rusiyada "McDonald's" fəaliyyətini dayandırdıqdan sonra Qazaxıstandakı şəbəkə çətinliklərlə üzləşə bilər. Çünki Qazaxıstan restoranlarının öz məhsullarının yarıdan çoxunu Rusiyadakı tədarükçülərdən aldığı bildirilirdi.

"McDonald's"ın Rusiya şəbəkəsi Ukraynaya təcavüz (fevraın 24-də) səbəbindən Rusiyanı tərk edib. Şirkətin Rusiya biznesini Novokuznetskdən olan sahibkar Aleksandr Qovor alıb. Yeni restoranlar şəbəkəsi "Vkusno – i toçka" adlanır.

Eyfel qülləsinin təmirə ehtiyacı var

Eyfel qülləsi

Parisin əsas görməli yerlərindən biri sayılan Eyfel qülləsi paslanıb və əsaslı təmirə ehtiyacı var. Lakin əvəzində Parisdə 2024-cü ildə keçiriləcək Yay Olimpiya Oyunları ərəfəsində onu yenidən rəngləyirlər.

Bu barədə Fransanın "Marianne" jurnalı öz mənbələrinə istinadən yazıb.

Jurnalın əldə etdiyi gizli hesabatlarda yer alan iddialara görə, Eyfel qülləsində çatlar və paslar hələ 2014-cü ildə aşkar edilib. Bildirildiyinə görə, 2016-cı ildə qüllədə 884, o cümlədən "quruluşun dayanıqlığına təhlükə yaradan" 68 zədə qeydə alınıb.

Qüllənin adının açıqlanmasını istəməyən meneceri jurnala deyib: "Əgər [qüllə mühəndisi] Qustav Eyfel bu yeri ziyarət etsəydi, infarkt keçirərdi".

Qüllə indi 2024-cü ildə Parisdə keçiriləcək Yay Olimpiya Oyunlarına hazırlıq məqsədilə 20-ci dəfə rənglənir. Abidənin kosmetik təmirinin dəyəri 60 milyon avrodur. Ehtimal olunurdu ki, qüllənin üçdə birindəki boya soyulacaq, bundan sonra ona iki yeni qat çəkiləcək. Bununla belə, COVID-19 pandemiyası səbəbindən işlərin dayandırılması və köhnə boyada qurğuşun olması ona gətirib ki, abidənin yalnız 5 faizində boyanın tam soyulacağı gözlənir.

Jurnalın danışdırdığı ekspertlər hesab edirlər ki, qüllədən köhnə boya tamamilə silinməli və yalnız bundan sonra yenidən rənglənməlidir. Onlar deyiblər ki, köhnənin üzərinə yeni boya vurulması korroziyanı daha da gücləndirir. Lakin jurnalda yazılanlara görə, qülləni idarə edən və 99 faiz Paris meriyasına məxsus şirkət turizm gəlirlərini itirdiyi üçün abidəni uzun müddət bağlamaq istəmir.

Hündürlüyü 324 metr, çəkisi 7 min 300 ton olan bu dəmir qüllə 1889-cu il Dünya Sərgisi üçün tikilmişdi. Açılışdan əvvəl dörd qat sülügən (tərkibində qurğuşun olan mineral) ilə örtülmüşdü. İndi o qadağandır, lakin o dönəmdə korroziyaya qarşı ən yaxşı maddə hesab edilirdi. Eyfel özü hesab edirdi ki, boya qüllənin davamlılığına zəmanət verir və "ən əsası pasın qarşısını alacaq".

Eyfelin düşüncəsinə görə, qüllə 20 il dayanmalı, bundan sonra sökülməli idi. Lakin diqqətli qulluq sayəsində qüllə hələ də ayaqdadır və Fransanın simvollarından biri hesab edilir.

Eyfel qülləsini hər il təxminən 6 milyon turist ziyarət edir. Bu, "Disneylend", Luvr və Versal Sarayından sonra Fransada ən çox ziyarət edilən dördüncü mədəniyyət məkanıdır.

Alp dağlarında buzlaq uçub, ölənlər var

Dolomit Alplarında "Marmolada" buzlağı uçub

İtaliyanın Alp dağlarında böyük bir buzlaq axıb. Qar laylarının altında qalan ən azı 7 nəfər həlak olub, 15 nəfər itkin düşüb. Əlavə 8 nəfər yaralanıb, onlardan 2-sinin vəziyyəti ağırdır.

Fəlakət yerində helikopter və axtarış itləri vasitəsilə xilasetmə işləri davam etdirilir.

"Marmolada" adlı buzlaq eyniadlı dağın yamacında yerləşirdi. Bu, İtaliyanın şimal-qərbindəki Dolomit Alpları silsiləsində ən yüksək dağdır.

"Marmolada"nın hündürlüyü 3 min 300 metrdir. Dolomit Alpları həm xizək sürərkən qışda, həm də yayda turizm üçün tanınan yerdir. Ölən və yaralananlar arasında müxtəlif ölkələrdən gələn turistlər var.

Yerli xilasetmə xidmətinin nümayəndəsi Valter Milan deyib ki, faciənin səbəbi hələ müəyyən edilməyib. Amma onun bildirməsinə görə, güman edilir ki, son vaxtlar İtaliyada müşahidə olunan anomal istilər səbəbindən buzlaq əriməyə və dağılmağa başlayıb. V.Milanın deməsinə görə, adətən, buz və qarın ərimədiyi üç kilometr yüksəklikdə belə, son günlər havanın temperaturu +10 dərəcə civarında olub.

Təbii fəlakət yerinə gələn İtaliyanın Baş naziri Mario Draqi də bildirib ki, buzların əriməsinə səbəb olan anomal istilər son illərdə Avropada daha çox hiss olunan iqlim dəyişikliyi ilə bağlıdır. "Belə təbii hadisələrin təkrarlanma ehtimalını minimuma endirmək üçün hökumət tədbirlər görməlidir", - o deyib.

Türkiyə, İran, Rusiya birgə avtomobil buraxacaqlar?

Tehran avtomobil zavodu

İran, Rusiya və Türkiyənin sənaye rəsmiləri bildiriblər ki, avtomobillərin dizaynı və istehsalı üzrə birgə şirkət yaratmağı planlaşdırırlar

İran, Rusiya və Türkiyənin sənaye rəsmiləri bildiriblər ki, avtomobillərin dizaynı və istehsalı üzrə birgə şirkət yaratmağı planlaşdırırlar.

Hazırda İran və Rusiya sanksiyalar altındadır.

İran avtomobil hissələri istehsalçıları və təchizatçıları assosiasiyasının rəhbəri Məhəmmədrza Nəcəfi-Maneş deyib ki, bu sahədə üç ölkənin işbirliyi üçün böyük imkanlar var.

Nəcəfi-Maneş əlavə edib ki, hazırda avtomobil məhsulu üçün geniş bazar mövcuddur.

İran rəsmisi bildirib ki, bu təşəbbüsü Türkiyə irəli sürüb və Rusiya layihəyə maraq göstərib.

ABŞ və Qərb Ukraynaya müdaxiləsinə görə Rusiyanın üzərinə ağır iqtisadi sanksiyalar qoyublar.

İran da 2018-ci ildən bəri ABŞ sanksiyaları altındadır.

Son 20 ildə bir çox Qərb avtomobil .şirlkətləri Rusiya boyunca yığma zavodları açmışdılar.

Lakin Ukraynada müharibə başlanandan bəri əksər Qərb şirkətləri Rusiyanı tərk ediblər.

Putin Rusiya ordusunun Luhanskda qələbəsini elan edir

Vladdimir Putin və Sergey Şoyqu

Rusiya prezidenti Vladdimir Putin iyulun 4-də Rusiya ordusunu Ukraynanın Luhansk vilayətinin “azad edilməsi” münasibətilə təbrik edib.

Televiziya ilə çıxışında müdafiə naziri Sergey Şoyqu deyib ki, Luhansk regionunu zəbt etmiş qoşun hissələri istirahət edəcək, lakin Ukrayna ərazisindəki başqa Rusiya qüvvələri əməliyyatları davam etdirəcək.

Associated Press agentliyi bildirir ki, Luhanskda Ukraynanın sonuncu istehkamı olan Lisiçansk şəhərindən çıxan Ukrayna əsgərləri cəbhə xəttindəki vəziyyəti “cəhənnəm” adlandırıblar.

Onlar deyirlər ki, Rusiya qüvvələri şəhər üzərinə aramsız olaraq artilleriya mərmiləri yağdırıb.

Ukrayna prezidenti Volodimir Zelenski Ukrayna qoşunlarının Lisiçanskdan çxımasını şərh edərkən deyib ki, onun qoşunları şəhər üzərində nəzarəti bərpa edəcək.

Prezident deyib ki, Qərbdən gələn müasir silahlar və ordunun taktikası buna imkan verir:

"Ukrayna heç nəyini vermir. Orada, Moskvada Luhansk barədə məruzə edənlər fevralın 24-dən əvvəl, müdaxilənin ilk günlərində, yazda və indi verdikləri vədləri xatırlasınlar. Qoy realistcəsinə təhlil etsinlər, bu vaxtadək nəyə nail olublar, bunu nə qədər vaxta ediblər və itkiləri nə qədər olub. Onların indiki məruzələri də o məruzələr kimi puç olacaq”.

İyulun 3-də Ukrayna Silahlı Qüvvələrinin qərargaı bildirmişdi ki, düşmənin dəfələrlə üstün qüvvələrinin hücumu şəraitində Lisiçansk şəhərini tərk etmək qərara alınıb.

Zelenski bu barədə deyib:

"Biz döyüşçülərimizin, insanlarımızın həyatını qoruyuruq. Divarları yenidən tikərik, torpağı geri alarıq, amma ən çox insanları qorumaq lazımdır”.

Qaraqalpaqıstan etirazlarında 18 nəfər ölüb

Özbəkistanın Qaraqalpaq bölgəsində etiraz aksiyası, 1 iyul 2022

Qarqalpaqıstan sakinləri bölgənin suverenliyinin məhdudlaşdırılması planlarına etiraz edirdilər

Özbəkistan Baş Prokurorluğunun iyulun 4-də açıqlanmış bəyanatında deyilir ki, Qaraqalpaqıstanda ötən həftə başlanmış etirazların gedişində 18 nəfər həlak olub.

Qarqalpaqıstan sakinləri bölgənin suverenliyinin məhdudlaşdırılması planlarına etiraz edirdilər.

Prokurorun məlumatında deyilir ki, Nukus şəhərində iğtişaşlar zamanı aldıqları ağır xəsarətlərdən 18 nəfər ölüb.

Bu da xəbər verilir ki, etiraz aksiyasının dağıdılması zamanı 500-dən çox saxlanan olub.

Özbəkistan Milli Qvardiyası bildirir ki, saxlananların çoxu artıq sərbəst buraxılıb.

Bundan başqa 240 nəfərin xəsarət aldığı, onlardan 90-nın xəstəxanaya aparıldığı xəbər verilir.

Özbəkistan prezidenti Şavkat Mirziyoyev iyulun 2-də deyib ki, Konstitusiyanın yeni mətnində Qaraqalpaqıstanın suverenliyi və Özbəkistanın tərkibindən çıxmaq hüququna dair müddəalar saxlanacaq.

Mirziyoyevin iyulun 3-də yayılmış bəyanatında iğtişaşlar zamanı ölənlərin arasında hüquq-mühafizə əməkdaşlarının olduğu bildirilir.

Başqa məlumatlara görə aksiyada minədək xəsarət alan olub.

Qaraqalpaq bölgəsində bir aylıq fövqəladə vəziyyət elan edilib

Qaraqalpaqıstan Muxtar Respublikasının paytaxtı Nukus şəhərinə səfər edən Özbəkistan prezidenti Şavkat Mirziyoyev ölkə Konstitusiyasında muxtariyyətin suverenliyi ilə bağlı bəndin saxlanmasını təklif edib.

Bu barədə prezidentin mətbuat katibi Şerzod Əsədov məlumat verib.

Onun teleqram kanalında yazdığına görə, dövlət başçısı digər məsələlərlə yanaşı, həm də Qaraqalpaqıstan sakinlərinin fikirlərinin təhlilini də əsas sayır, həm də Konstitusiyaya dəyişikliklərin müzakirəsi prosesinin hələ də davam etdiyini nəzərə alır.

Prezident Mirziyoyev iyulun 3-dən avqustun 2-dək Qaraqalpaqıstanda fövqəladə vəziyyət rejimi tətbiq edib.

***

Özbəkistanın Qaraqalpaq bölgəsində (Qaraqalpaqıstan Muxtar Respublikası) hakimiyyət nümayəndələri iyulun 1-də baş verənləri “dövlət orqanlarını ələ keçirməyə cəhd” elan ediblər.

Qaraqalpaqıstanın ali nümayəndəli orqanı olan hökumətin və Daxili İşlər Nazirliyinin iyulun 2-də yaydığı bəyanatında belə deyilir.

Bəyanatda deyilir ki, “iğtişaşların təşkilatçıları” Nukusda (Qaraqalpaqıstan Muxtar Respublikası paytaxtı) vətandaşları inzibati binalar kompleksinin qarşısındakı meydana toplayıblar. Qeyd olunur ki, bununla dövlət qurumlarını nəzarətinə götürməyə və cəmiyyətdə parçalanma yaratmağa, Özbəkistanda ictimai-siyasi sabitliyi pozmağa cəhd göstəriblər”.

Bəyanatda vurğulanır ki, təhlükəsizlik qüvvələri həmin şəxslərin hərəkətinə müdaxiə edib və onlar saxlanılıb. Amma məlumatda hadisələrin səbəbləri, aksiya iştirakçıları və saxlanılanların sayı göstərilmir.

Muxtar Respublika hakimiyyətinin iyulun 2-də yaydığı bəyanatda “xaricdən gələn müəyyən qeyri-sağlam xarici qüvvələrin respublikadakı vəziyyətin inkişafına təsir etmək cəhdləri”ndən, o cümlədən “məqsədli məlumat yaymalarından” bəhs edilir. Amma həmin qüvvələrin hara bağlı olduğu, kim olduğu açıqlanmır.

AzadlıqRadiosunun Özbək xidməti Qaraqalpaq bölgəsində fəaliyyət göstərən alternativ məlumat mənbələrinə çatımlığım məhdudlaşdırıldığını və həmçinin internetə girişdən problemlərin olduğunu yazır.

Hadisələrdən sonra yayılan ilkin məlumatlarda etirazların Konstitusiyaya dəyişikliklər layihəsinin dərcindən sonra başladığı bildirilib.

Bildirilir ki, iyunun 26-da ictimai müzakirəyə çıxarılan Konstitusiya layihəsində indiyə qədər yer almış Qaraqalpaqıstanın suverenliyini və respublika xalqının ümumi referendum əsasında ayrılmaq hüququ ilə bağlı bənd çıxarılıb.

Özbəkistanın Qaraqalpaq bölgəsi, (Xəritədə qırmızı rəngdə)
Özbəkistanın Qaraqalpaq bölgəsi, (Xəritədə qırmızı rəngdə)

Qaraqalpaq Muxtar Vilayəti 1924-cü ildə yaradılıb, 1930-cu ilə qədər Qazaxıstan SSR-in tərkibində olub, sonra çıxarılaraq birbaşa RSFSR-in tabeliyinə verilib. 1936-cı ildə Qara-qalpaq MSSR Özbəkistan SSR-in tərkibinə daxil edilib. Sovet İttifaqının dağılmasından sonra bölgə 1992-ci ildə Qaraqalpaqıstan Respublikasına çevrilib. 1993-cü ildə Qaraqalpaqıstan Respublikasının Özbəkistanın tərkibinə daxil edilməsi haqqında 20 illik müqavilə imzalanıb. Müqavilə muxtar respublikanın referendum keçirməklə Özbəkistanın tərkibindən çıxmaq hüququnu təsbit edir və indi isə ləğv edilməsi təklif olunur.

Tbilisidə Avropaya inteqrasiya tələbi ilə müddətsiz etiraz…

Tbilisidə etiraz aksiyası. 3 iyun 2022

Tbilisidə Gürcüstanın bütün regionlarından on minlərlə insan "Xəcalət" qeyri-hökumət təşkilatı (QHT) rəhbərlərinin hakimiyyətə verdiyi 7 günlük ultimatum bitəndən sonra yenidən mərkəzi Rustaveli prospektində, parlament binasının yaxınlığında toplaşıb. Bir həftə əvvəl məhz onlar "Evə-Avropaya" kütləvi ictimai hərəkatının təşəbbüskarı olublar.

Ultimatuma əsasən, Baş nazir İrakli Qaribaşvili bazar gününə (iyulun 3-ü) qədər istefa, hakim "Gürcü arzusu" partiyası isə Avropa İttifaqının (Aİ) 12 şərtini yerinə yetirmək üçün xalqın etimadına malik "texniki hökumət"in yaradılmasına razılıq verməli idi.

Aksiyada Qaribaşvili hökuməti istefa verənə qədər mitinqin davam etdirilməsi ilə bağlı qərar oxunub. Mitinq dinc şəraitdə, gürcü və Ukrayna mahnılarının sədaları altında keçirilir.

İyunun 17-də Avropa Komissiyasının rəhbəri Ursula von der Layen Ukrayna və Moldovaya Aİ üzvlüyünə namizəd statusunun verildiyini açıqlayıb. Gürcüstana status almaq üçün bir sıra şərtləri yerinə yetirmək tapşırılıb. O cümlədən, siyasi, iqtisadi həyatın deoliqarxizasiyası, depolarizasiya, məhkəmə islahatlarının müstəqilliyinin təmin edilməsi və jurnalistlərin, eləcə də müxtəlif azlıqların hüquqlarının müdafiəsi də daxil, ölkədə bir sıra sistemli islahatlar aparılmalıdır.

Baş nazir Qaribaşvili istefa verməkdən imtina edib, hakim partiyanın sədri İrakli Kobaxidze isə müxalifətə Aİ-nin şərtlərini mərhələli şəkildə yerinə yetirmək üçün bir neçə parlament komissiyası yaratmağı təklif edib.

Müxalifət partiyalarının liderləri, o cümlədən onların ən böyüyü sayılan – Gürcüstanın keçmiş Prezidenti Mixail Saakaşvilinin Vahid Milli Hərəkatı "Gürcü arzusu" ilə istənilən danışıqları "mənasız" hesab edir.

Oğurlanmış Ukrayna taxılını daşıdığı iddia olunan Rusiya gəmisi Türkiyədə saxlanıb

Arxiv foto

Türkiyə oğurlanmış Ukrayna taxılını daşıyan Rusiyaya məxsus yük gəmisini saxlayıb. Reuters xəbər verir ki, bunu Ukraynanın Türkiyədəki səfiri Vasili Bodnar deyib.

Diplomatın sözlərinə görə, Ukrayna tərəfi vəziyyəti aydınlaşdırmaq üçün Türkiyənin gömrük orqanları ilə əlaqədədir. Reuters yük gəmisinin adını və gəldiyi limanın adını açıqlamır.

Əvvəl yayılan məlumatlarda Rusiya bayrağı altında gəminin üzən gəminin Qazaxıstan şirkətinə məxsus "Jibek Joly" (İpək Yolu) gəmisi olduğu qeyd edilib. Satışda Estoniya və Türkiyə şirkətlərinin iştirak etdiyini iddia edilir.

Rusiya ilə Ukrayna arasında gedən müharibə səbəbindən dünya bazarı üçün nəzərdə tutulan milyonlarla ton ərzaq Qara dəniz limanlarında yığılıb qalıb. Tərəflər tədarükün kəsilməsində bir-birini günahlandırlar.

BMT xəbərdarlıq edir ki, məhsullar çıxarılmasa, o zaman Afrika, Asiya və Yaxın Şərqin kasıb ölkələri ciddi aclıqla üzləşəcək.

İyunun 30-da ilk taxıl gəmisi Ukraynanın cənubunda rus qoşunları tərəfindən ələ keçirilən Berdyansk limanını tərk edib. Rusiya tərəfindən təyin edilmiş yerli hakimiyyət onun “dost ölkələrə” göndərildiyini bildirib.

Ukrayna hakimiyyətinin məlumatına görə, irimiqyaslı işğal başlayandan bəri Rusiya işğal etdiyi Ukrayna ərazilərindən ən azı 400 min ton taxıl çıxarıb. Rusiya isə taxılın qanunsuz ixracı ilə bağlı bütün ittihamları rədd edir.

Rusiya fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb.

Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.

Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.

Rusiya sərhəddə COVID-19 ilə bağlı qadağaları götürür

Rusiya-Belarus sərhədi

İyulun 15-dən Rusiya COVID-19-un yayılması ilə əlaqədar sərhəd keçidi ilə bağlı bu ölkədə qoyulmuş bütün məhdudiyyətləri aradan qaldıracaq. Qadağalar pandemiya səbəbindən 2020-ci ilin martından qüvvədədir.

Dəniz və hava keçid məntəqələri ilə girişə qoyulan məhdudiyyətlər hələ iyunun 14-dən götürülüb, indi ölkəyə quru nəqliyyatı ilə də daxil olmaq mümkündür. Eyni zamanda, Belarus vətəndaşları istisna olmaqla, əcnəbilərin daxil olması üçün PCR-testindən keçmək tələbləri qalır.

Hərçənd, Ümumdünya Səhiyyə Təşkilatının (ÜST) məlumatına görə, son bir həftə ərzində COVID-19-a yeni yoluxma halları 18 faiz artıb, dünyada dörd milyondan çox yoluxma qeydə alınıb. Yeni yoluxmaların ən böyük həftəlik artımı Yaxın Şərqdə qeydə alınıb- 47 faiz. Avropada koronavirus infeksiyası ilə xəstələnmə bir həftə ərzində 1/3 dəfə çoxalıb.

2019-cu ilin sonlarında dünyada yeni koronavirus aşkar edilib. 2020-ci il martın 11-də ÜST koronavirusu pandemiya elan edib. Dünyada sürətlə yayılan bu virusdan indiyə qədər 6.3 milyondan çox şəxsin vəfat etdiyi açıqlanıb.

Ukrayna ordusu Lisiçanskdəki mövqelərindən geri çəkilib

Ukrayna xüsusi təyinatlılarının Luhansk regionunda keçirdiyi əməliyyat, may 2022

Ukrayna ordusu Luqansk vilayətinin Lisiçansk şəhərindəki mövqelərindən geri çəkilib.

Bu barədə Ukrayna Silahlı Qüvvələrinin Baş Qərargahı məlumat yayıb. Məlumatda qeyd olunur ki, geri çəkilmə qərarı “işğalçı qüvvələrin artilleriya, aviasiya, reaktiv yaylım atəşi sistemləri, döyüş sursatları və şəxsi heyətin” çoxsaylı üstünlüyü şəraitində qəbul edilib.

Ukrayna Baş Qərargahının fikrincə, şəhərin müdafiəsinin davam etdirilməsi ölümcül nəticələrə gətirib çıxara bilərdi.

Məlumatda qeyd olunur ki, "biz qayıdacağıq və mütləq qalib gələcəyik" Lisiçansk Luqansk vilayətində Ukrayna qoşunlarının nəzarətində olan sonuncu şəhər idi.

***

Şoyqu Putinə 'LNR-nin azad edilməsi haqqında' məruzə edib

Putin və Şoyqu (solda), arxiv foto
Putin və Şoyqu (solda), arxiv foto

“İnterfaks” agentliyi xəbər verir ki, Rusiyanın müdafiə naziri Sergey Şoyqu prezident Vladimir Putinə "Luqansk Xalq Respublikasının" (Ukrayna ərazisində Rusiyanın dəstəklədiyi separatçı bölgə) azad edilməsi” ilə bağlı hesabat verib.

O, həmçinin Putinə Lisiçansk şəhəri üzərində tam nəzarətin ələ keçirildiyi barədə də məlumat verib.

Hələki bu məlumatı Ukrayna tərəfi və müstəqil mənbələr təsdiqləməyib.

Son bir neçə gün ərzində Lisiçanska nəzarət uğrunda şiddətli döyüşlər gedir. İyulun 3-də səhər saatlarında Luqansk hərbi-mülki administrasiyasının rəhbəri Sergey Qaydai bildirib ki, hazırda Rusiya qüvvələri öz mövqelərində cəmlənirlər.

"Yəqin ki, bütün qüvvələr Lisiçanska atılıb"

Onun yazdığına görə, "şəhər əsassız olaraq qəddar taktika ilə hücuma məruz qalıb. Əgər Severodonetskdə bir aylıq küçə döyüşləri nəticəsində şəhər tamamilə dağıdılıbsa, Lisiçanskdə qısa zaman anında eyni administrativ binalar təməlinə qədər dağıdılıb. Burada çoxlu hərbçilər var və çoxsaylı silahlardan istifadə olunur. Eyni zamanda, düşmənin döyüş sursatı olan bir neçə anbarı məhv edilib. Onlar əhəmiyyətli itkilərə məruz qalırlar, lakin inadla irəliləyirlər. Onlar şəhərdə, eləcə də Vernokamenkada sabitlənir və yaşayış məntəqələrini dağıtmaqda davam edirlər" -Qayday yazır.

Rusiya fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb.

Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.

Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.

Rusiyanın Belqorod şəhərində silsilə partlayışların olduğu bildirilir

Rusiya yanğın, arxiv foto

İyulun 3-nə keçən gecə Rusiyanın Ukrayna sərhəddinə yaxın Belqorod şəhərində baş verən silsilə partlayışlar nəticəsində 3 nəfərin öldüyü, daha 4 nəfər yaralandığı xəbər verilir.

Belqorod vilayətinin qubernatoru Vyaçeslav Qladkovun sözlərinə görə, “gecə şəhərdə bir sıra yüksək səslər eşidilib”. "Hadisənin səbəbləri araşdırılır, ehtimal ki, hava hücumundan müdafiə sistemi işləyib", - o, teleqram kanalında yazıb.

İlkin məlumata görə, partlayış nəticəsində ən azı 11 yaşayış binasına 40-a yaxın fərdi ev zədələnib, onlardan beşi tamamilə dağılıb.

Ukraynaya qarşı genişmiqyaslı işğala başlayandan sonra Rusiya Ukrayna ilə həmsərhəd ərazilərində terror təhlükəsinin “sarı” səviyyəsi tətbiq edib.

Rusiya tərəfi bu və digər ərazilərinin Ukrayna tərəfdən atəşə tutulduğunu iddia edir. Ukrayna tərəfi isə bu məlumatları şərh etmir.

Bu arada Rusiyanın Kursk vilayətinin qubernatoru Roman Starovoit öz telegram kanalında Ukraynaya məxsus iki "Strij" pilotsuz aparatın iyulun 3-nə keçən gecə Kurska yaxınlaşarkən vuruluğunu yazıb. O vurulduğu iddia olunan pilotsuz uçuş aparatının fotosunu paylaşıb.

Lukaşenka Ukraynadan Belarusa raket atıldığını iddia edir

A. Lukaşenka Minsk, 19 oktyabr 2021

Lukaşenka iddia edir ki, Minsk Ukraynada müharibəyə sürüklənir və bununla " Rusiya və Belarusla eyni anda məşğul olmaq istəyirlər"

Belarusun avtoritar lideri Aleksandr Lukaşenka hər hansı sübut təqdim etmədən Ukraynadan Belarusa raket atıldığını iddia edib.

O, hadisənin bir neçə gün əvvəl olduğunu və Ukrayna ərazisindən Belarusun hərbi obyektlərinə zərbə endirmək cəhdləri olduğunu deyib. Belarusun dövlət xəbər agentliyi BELTA iyulun 2-də Lukaşenkadan sitat verib :

“Bizi təxribata çəkirlər. Məlumat verməliyəm: üç gün əvvəl, bir az da əvvəl, onlar Ukrayna ərazisindən Belarus ərazisindəki hərbi obyektlərə zərbələr endirməyə cəhd ediblər. Lakin "Pantsir" kompleksləri Ukrayna silahlı qüvvələrinin atdığı bütün raketləri tuta bilib", - Lukaşenka deyib.

“Kommersant” ın yazdığına görə, o, bu iddiaları Belarusun Müstəqillik Günü ilə bağlı tədbirdəki etdiyi çıxışı zamanı səsləndirib.

Lukaşenka iddia edir ki, Minsk Ukraynada müharibəyə sürüklənir və bununla " Rusiya və Belarusla eyni anda məşğul olmaq istəyirlər".

Onun sözlərinə görə, Belarus Ukraynada döyüşmək niyyətində deyil, ancaq hücum olacağı halda döyüşəcək. Lukaşenka qeyd edib ki, o, hərbçilərə “Minsk əleyhdarlarının” qərar qəbuletmə mərkəzlərini “hədəfdə saxlamağı” əmr edib.

O, həmçinin vurğulayıb ki, NATO və Avropa İttifaqı Rusiya və Belarusa qarşı “yeni təxribatlarda maraqlıdır”.

Hələ ki, Ukrayna tərəfdən Lukaşenkanın bu iddialarına şərh verilməyib.

Belarus Ukraynadakı müharibənin birbaşa iştirakçısı olmasa da işğalçı Rusiyaya maddi-texniki dəstək verir. Həmçinin Rusiya qoşunlarının bir hissəsi Ukraynaya Belarus sərhədindən keçməklə daxil olub.

Rusiyanın Ukraynaya təcavüzü ilə əlaqədar qərb ölkələri Belarusa qarşı bir neçə ciddi maliyyə sanksiyaları paketi tətbiq edib.

ABŞ, Aİ ölkələri və bir sıra digər ölkələr 2020-ci ilin avqustunda Belarusda keçirilən prezident seçkilərindən sonra Aleksandr Lukaşenkanı legitim seçilmiş dövlət başçısı kimi tanımır.

Səsvermənin rəsmi nəticələrinə qarşı başlayan kütləvi etirazların yatırılması ilə əlaqədar ona və ətrafına qarşı sanksiyalar tətbiq edilib. Lukaşenka rejimi insan haqlarını kobud şəkildə pozmaqda və müxalifəti təqib etməkdə ittiham olunur.

Rusiya fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb.

Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.

Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.

Avropa Komissiyası Rusiyaya Kalininqrada mal aparmağa icazə verir

Arxiv foto

Avropa Komissiyası (AK) Rusiyaya Kalininqrada sanksiya tətbiq edilən malların idxalına icazə verməyi planlaşdırır. Bu barədə "Şpigel" (Der Spiegel") Avropa Komissiyasındakı mənbələrə istinadən xəbər verir.

Qəbul edilən qərara görə, tranzitə icazə verilən malların dəqiq həcmi Litva gömrük sənədləri ilə müəyyən ediləcək. Xüsusi hallarda, tranzit yükün həcmi normadan çox ola bilər, ancaq bu halda Rusiya hər bir istisnanı sübut etməli olacaq.

Avropa Komissiyasının qəbul etdiyi qərar əsasən Almaniya hökumətinin mövqeyini əks etdirir.

Almaniya kansleri Olaf Şolz dəfələrlə vurğulayıb ki, o, NATO-nun Rusiya və Ukrayna arasında müharibənin tərəfinə çevrilməməsi üçün əlindən gələni edəcək. Alman əsgərləri Litvada yerləşdirilib və mümkün münaqişədə iştirak edə bilərlər.

Danışıqlarla tanış olan Litva nümayəndəsinin sözlərinə görə, Almaniya iyunun 18-dən etibarən Avropa Komissiyasına təzyiq göstərir ki, Kalininqrada tranzit üçün sanksiyalar tətbiq olunmasın. Yaxın günlərdə Avropa Komissiyasının qərarının dərc olunacağı gözlənilir.

Kalininqrad vilayəti Litva və Polşa ilə həmsərhəd olan Rusiyanın anklavıdır. İyunun 17-də Aİ sanksiyalarının daxil olmasından sonra Litva Rusiyanın tikinti materialları və metalının tranzitinə qadağa qoyub. Sərnişin daşınması əvvəlki qaydalara uyğun davam edir.

Litvanın xarici işlər naziri Qabrielius Landsbergis bildirib ki, tranzit Avropa Komissiyası ilə məsləhətləşmələrdən sonra və onun rəhbərliyi altında dayandırılıb. İyunun 20-də Rusiya Xarici İşlər Nazirliyi Litvadan Kalininqrad vilayətinə yüklərin tranzitinə qoyulan qadağanı dərhal aradan qaldırmağı tələb edib. İyunun 21-də Aİ-nin Rusiyadakı səfiri izah edib ki, Kalininqradın blokadasından söhbət gedə bilməz və Aİ sanksiyalarına düşməyən malların tranziti “normal işləyir”.

Avropa İttifaqının 4-cü sanksiyalar paketinə uyğun olaraq iyunun 17-dən Rusiyanın İttifaq ərazisinə polad və dəmir məmulatları idxalına məhdudiyyətlər qoyulub. Bundan başqa iyulun 10-dan sement və spirtin, avqustun 10-dan kömür və digər bərk yanacaq növlərinin, dekabrdan 5-dən neft idxalı qadağan edilir.

Rusiya fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb.

Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.

Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.

Pentaqon: Ukrayna Donbassda HIMARS sistemlərindən uğurla istifadə edir

HIMARS-(High Mobility Artillery Rocket System), Rumuniya,10Apr2021

Ukrayna ordusu ABŞ-ın HIMARS raket sistemlərindən istifadə etməklə döyüş meydanında "əhəmiyyətli uğur" əldə edib.

Bildirilir ki, bunu ABŞ Müdafiə Nazirliyinin-Pentaqonun adının açıqlanmasını istəməyən yüksək rütbəli rəsmisi iyulun 1-də jurnalistlərə açıqlamasında deyib.

“Bu, yüksək dəqiqliyə malik, uzaq mənzilli sistem olduğu üçün ukraynalılar diqqətlə seçilmiş hədəflərə sistemli şəkildə dəqiq zərbələr endirməyə qadirdir və bu Rusiya qüvvələrinin döyüş effektivliyini əhəmiyyətli dərəcədə azaldır”, - ABŞ müdafiə rəsmisi bildirib.

"Wall Street Journal" son iki həftə ərzində ABŞ-ın Ukraynaya bağışladığı dörd HIMARS qurğusundan ilk istifadə edən bölmənin eksklüziv hesabatını dərc edib.

Donbassda qüvvələr balansını dəyişməyə başladıqlarını deyən Ukrayna hərbçilərinin sözlərinə görə, onlar Rusiya ordusunun İzyumdakı qərargahı da daxil olmaqla, on mühüm hərbi obyektini məhv ediblər.

HİMARS-ı atəşə hazırlamaq 2-3 dəqiqə çəkir, raketlər buraxıldıqdan 20 saniyə sonra sistem potensial cavab zərbəsindən yayınaraq yerindən çıxarılır.

O da bildirlir ki, hər biri 155 min dollar olan raketlərlə zərbə endirməzdən əvvəl Ukrayna hərbçiləri vurulacaq hədəflərin koordinatlarını dəqiq müəyyən edirlər.

O da vurğulanır ki, hazırda Ukrayna ordusu daha çox Rusiya ordusunun qərargahlarına, silah anbarlarına və kazarmalarına raket zərbələri endirməyə üstünlük verir.

Məlumata görə, Ukrayna daha dörd HIMARS qurğusunu iyulda almalıdır. Almaniya və Böyük Britaniya Ukraynaya üç belə kompleks verməyə hazır olduqlarını bəyan ediblər.

“The New York Times” qəzeti ABŞ hərbi analitiklərinə istinadla yazır ki, döyüş meydanında üstünlük əldə etmək üçün Ukraynaya altmışdan yüzə qədər təkmil reaktiv yaylım atəşi sistemi lazımdır.

Rusiya bu tip silahların Ukraynaya təhvil verilməsini kəskin tənqid edərək, Rusiya ərazisinə zərbə endirmək üçün reaktiv yaylım atəşindən istifadə ediləcəyi təqdirdə sərt cavab veriləcəyini vəd edib.

Rusiya fevralın 24-də Ukraynaya hücum edib. Bu müddət ərzində ölkənin bir sıra şəhər və qəsəbələri dağıdılıb, minlərə adam həlak olub, milyonlarla insan ölkədən qaçqın düşüb.

Beynəlxalq aləm Rusiyanın bu addımını pisləyir və qoşunlarını Ukraynadan çıxarmağa çağırır.

Rəsmi Moskva isə qonşu Ukraynaya qarşı apardığı müharibəni "xüsusi hərbi əməliyyat" adlandırır. Bundan başqa "müharibə" sözündən istifadə edənlər, "müharibəyə yox" deyənlər, o cümlədən Rusiya müdafiə nazirliyinin rəsmi məlumatlarından fərqli xəbərlər verən fərdlər və KİV-lər cəzalandırılır.

Ankara və Yerevan sərhəd barədə ilkin razılaşma əldə ediblər

Vyana danışıqları

Türkiyə və Ermənistan arasında münasibətlərin normallaşdırılması danışıqlarını aparan Serdar Kılıç və Ruben Rubinyan Vyanada dördüncü görüşlərini keçiriblər

Türkiyə və Ermənistan arasında münasibətlərin normallaşdırılması danışıqlarını aparan Serdar Kılıç və Ruben Rubinyan Vyanada dördüncü görüşlərini keçiriblər.

AzadlıqRadiosunun Erməni xidməti – Azatutyun yazır ki, tərəflər Türkiyə-Ermənistan quru sərhədindən iki ölkəyə gəlmiş üçüncü dövlət vətəndaşlarının qarşılıqlı keçidinin tez bir zamanda təmin edilməsinə dair razılaşma əldə ediblər.

Razılaşmaya görə tərəflər bu istiqamətdə zəruri proseslərə başlamalıdırlar.

Ermənistan XİN-in məlumatında deyilir ki, tərəflər habelə ən qısa müddətdə iki ölkə arasında birbaşa hava yükdaşımalarının başlanması üçün lazımi tədbirlərin görülməsi barədə razılığa gəliblər.

Bundan başqa xüsusi nümayəndələr Ankara və Yerevan arasında münasibətlərin tam normallaşdırılması üçün atılacaq konkret addımları müzakirə ediblər.

Serdar Kılıç və Ruben Rubinyan tənzimləmə prosesinin heç bir ilkin şərt qoyulmadan davam etdiriləməsinə sadiq olduqlarını vurğulayıblar.

Türkiyə tərəfi də görüş barədə buna bənzər məlumat yayıb.

İki xüsusi nümayəndənin bundan əvvəlki iki görüşü Vyanada olub. Danışıqlara yanvar ayında Moskvada keçirilən birinci görüşlə başlanmışdı.

İddia: Rusiyadakı 'Samsunq' zavodu Ermənistan... vasitəsilə işləyəcək

Samsung

Rusiya zavodlarında elektronika istehsalını davam etdirən xarici istehlakçılar onu Avrasiya İqtisadi Birliyi ölkələrinə (Belarus, Qazaxıstan, Ermənistan və Qırğızıstan) göndərməyi, sonra isə paralel idxal yoluyla Rusiyada satmağı düşünürlər. Nəticədə istehsalçı rəsmən Rusiya bazarına tədarükdən imtina olunduğunu bəyan edə və beləliklə, təkrar sanksiyalar riskindən qismən yayına bilər.

Bu haqda "Kommersant"a hökumətə yaxın mənbə bildirib.

Qəzetin məlumatına görə, Cənubi Koreyanın Kaluqa vilayətindəki zavodda televizorlar və digər texnika buraxan "Samsunq" şirkəti artıq bu cür işləməyə başlayıb.

"Candy-Hoover Group"un Rusiya nümayəndəliyinin başçısı Qleb Mişin "Samsung"un Rusiya zavodunun çalışdığını təsdiqləyib. O əlavə edib ki, "amma hansı komponentlərlə məlum deyil, Cənubi Koreya şirkəti hazırda rəsmən ehtiyat hissələri gətirmir".

Onun sözlərinə görə, Rusiyadakı televizor ehtiyatlarını "Samsung" Müstəqil Dövlətlər Birliyi ölkələrinə satır, amma texnikanın paralel idxal yoluyla qaytarılıb-qaytarılmadığını bilmir.

Qəzetin mənbəsinin deməsinə görə, xarici biznes üçün belə sxem yerli müəssisələri satmaqdan daha yaxşıdır. Bununla belə, şirkətlərin Rusiyada zavodlarını satma halları artmaqdadır.

İddialara, hələlik, "Samsunq" şirkəti münasibət bildirməyib.

Ekspertlər isə deyirlər ki, sxem problemin yalnız bir qismini həll edəcək, çünki Rusiyaya gətirmək üçün komplekt hissələrinin oxşarını tapmaq lazım gələcək.

"Xarici komplekt hissələrinin Rusiyaya tədarükü məsələsi paralel idxalın qanuniləşdirilməsinə baxmayaraq, açıq qalır. Ona görə də fəaliyyətlərini sürdürən şirkətlər gec-tez qərar verməli olacaqlar-Rusiyada istehsal qalır-qalmır, qalırsa, hansı formada", - deyə "Kommersant"ın müsahibləri bildirirlər.

2002-ci ilin iyununda Rusiya hakimiyyəti paralel idxalı leqallaşdırıb. Rusiya Ukraynada müharibə başlanandan sonra (2022-ci fevralın 24-ü) sanksiyalarla əlaqədar ölkə ərazisində satışı qadağan olunan malları üçüncü ölkələr vasitəsilə gətirə bilər. Mövcud Rusiya qanunvericiliyi bu ölkə şirkətlərinə istehsalçının razılığı olmadan mal gətirmək və satmaq icazəsi verir.

Ukrayna Rusiya ilə viza rejiminə keçib

Rusiya pasportu

Ukrayna hakimiyyəti iyulun 1-dən Rusiya vətəndaşları üçün viza rejimi tətbiq edib.

Ukraynaya viza almaq üçün Rusiya sakinləri səkkiz şəhərdə "VFS Global" viza mərkəzlərindən birinə müraciət edə bilərlər. Müraciətlərə üçüncü ölkələrdəki Ukrayna diplomatları baxacaqlar. Məsələ burasındadır ki, fevralın 24-də Rusiyanın bu ölkəyə hərbi təcavüzü başlayandan sonra Ukrayna onunla diplomatik əlaqələri kəsib, ukraynalı diplomatların hamısı ölkəni tərk edib.

Amma hətta vizanın olması Rusiya vətəndaşının Ukraynaya buraxılmasına 100 faiz zəmanət vermir. Son qərarı nəzarət-buraxılış məntəqələrində sərhədçilər verəcək.

Ukrayna Prezidenti Vladimir Zelenski iyunun ortalarında rusiyalılar üçün viza qaydalarını bəyan edərkən deyirdi ki, hakimiyyət bu addımı milli təhlükəsizliyə görünməmiş təhdidlərə müqavimət çərçivəsində atıb.

Rusiya Xarici İşlər Nazirliyindən isə bildirilib ki, ölkənin milli maraqlarından çıxış edərək və humanitar tərəfi nəzərə alınmaqla mümkün cavab tədbirləri görülə bilər.

Rusiya ilə Ukrayna arasında vizasız rejim Krımın ilhaqı və Donbasda hərbi münaqişənin (2014) başlanmasından sonra da qüvvədə idi. Rusiyalılar yarım ildə bir dəfə 90 günədək Ukraynada qala bilərdilər. Onlar ölkəyə yalnız xarici pasportla və sərhəddə ciddi yoxlamadan sonra girə bilərdilər. 2014-cü ildən sonra Ukraynaya gələn Rusiya vətəndaşlarının sayı kəskin azalıb.

Dövlət Sərhəd Xidmətinin məlumatına görə, 2021-ci ildə Ukrayna sərhədini yarım milyon rusiyalı keçib, 7 mininə müxtəlif səbəblərə görə imtina cavabı verilib. Müharibə vaxtı gələn rusiyalıların sayı bilinmir. Hazırda Rusiya və Belarusla bütün sərhəd məntəqələri bağlıdır. Rusiyalılar Ukraynaya ancaq digər ölkələrdən – Polşa, Slovakiya, Rumıniya, Macarıstan və Moldovadan gələ bilirlər.

Rusiya qoşunları İlan adasından çıxarılır

İlan adası

Rusiya ordusu qarnizonunun qüvvələrini işğal olunmuş İlan adasından çıxarıb və ehtimal edilir ki, adanı tam tərk ediblər.

Bu məlumatı Ukraynanın "Cənub" operativ komandanlığının Facebook səhifəsində yayıblar.

Məlumatda bildirilir ki, Ukrayna tərəfindən atəşdən sonra rusiyalılar iki sürətli katerlərlə tələsik qarnizonun qüvvələrini evakuasiya ediblər.

Ukrayna komandanlığının habelə məlumatına görə, hazırda adada yanğındır, partlayış səsləri eşidilir.

Az sonra Rusiya Müdafiə Nazirliyi (MN) hərbçilərinin adanı tərk etdiklərini təsdiqləyib. Nazirlikdən bildirilib ki, İlan adasında tapşırıqların icrasını bitiriblər və xoşməramlı addım kimi oradakı qarnizonu çıxarıblar.

"Bununla da dünya ictimaiyyətinə göstərildi ki, Rusiya Federasiyası Ukrayna ərazisindən kənd təsərrüfatı məhsullarının daşınması üzrə humanitar dəhlizin təşkili üçün Birləşmiş Millətlər Təşkilatının səylərinə maneçilik törətmir", - açıqlamada bildirilir.

İlan adası fevralın 24-dən-müharibənin ilk günündən Rusiya qoşunlarının nəzarətində idi. May ayında Rusiya MN adaya enməyə çalışan Ukrayna desantının qarşısını aldığını bildirmişdi.

Ukrayna da, öz növbəsində, ada yaxınlığında bir neçə Rusiya gəmisinin vurulduğunu açıqlamışdı.

Qara dənizinin şimal-qərbindəki İlan adası Odessa vilayətinin sahilinə və Odessa limanına girişə nəzarət uğrunda mübarizədə mühüm önəmə malikdir.

Rusiya bu il fevralın 24-də Ukraynaya hücum edib.

Avropa benzin və dizel avtomobillərindən imtina edəcək

Dizel avtomobillər

Avropa İttifaqı (Aİ) ölkələri bugünlərdə Lüksemburq görüşündə iqlimin müdafiəsi ilə bağlı yeni tədbirlər planı qəbul ediblər.

Plana görə, 2030-ci ildən başlayaraq Avropada daxili yanma mühərrikli yeni avtomobillər satılmayacaq. Həmçinin, istixana qazı tullantılarına münasibətdə siyasətin sərtləşdirilməsi ilə enerji qiymətlərinin artması ilə əlaqədar əhalinin aztəminatlı hissəsi və kiçik biznesə kömək üçün ayrıca fond yaradılacaq.

Aİ-nin 27 ölkəsinin ekologiya və ətraf mühit nazirlərinin qatıldığı görüşdə qurumun karbon bazarının islahatına yönəlmiş direktiv layihələr təqdim olunub. 2035-ci ildən sonra avtomobil daxili yanma mühərriklərinin qadağan olunması, iqlim yardım fondunun yaradılması ilə yanaşı, karbon-oksid tullantılarına məhdudiyyətlər aviasiya və gəmiçilik sahələrində də tətbiq ediləcək.

Nazirlər razılaşıblar ki, Aİ kollektiv surətdə atmosferdən 310 milyon ton ekvivalentində CO2 çıxarmalıdır, o cümlədən meşələrin artırılması vasitəsilə.

Habelə, "Tullantı vergisi" həm nəqliyyat, həm də isitmə üçün yanacağın qiymətinə daxil ediləcək. Kasıb əhali və kiçik müəssisələrə qiymət artımını kompensasiya etmək üçün 59 milyard avro büdcəsi olan Sosial İqlim Fondu təsis olunur. Görüş iştirakçıları ekoloji monitorinq və müəssisələrin ekoloji məsuliyyəti tədbirləri, həmçinin sənaye üçün istixana qazı tullantıları üzrə kvotaları razılaşdırıblar.

2030-cu ilədək Aİ atmosferə karbon qazı buraxılmasını 55 faiz azaltmağı, 2050-ci ilədək isə Avropanı tam karbon-neytral zonaya çevirməyi planlaşdırır.

Aİ-nin iqlim siyasəti üzrə vitse-prezidenti Frans Timmermans deyib ki, iqlim böhranı və onun nəticələri aşkardır, odur ki Avropanın ekologiya məsələlərinə yanaşmasında dəyişiklikdə ləngimək olmaz.

Lüksemburq görüşündə təklif olunan tədbirləri iyulun 14-də Avropa Parlamenti təsdiqləməlidir.

ABŞ Rusiyaya kömək edən Özbəkistan şirkətinə sanksiya qoydu

Məlumatda deyilir ki, Özbəkistanın Promcomplektlogistic şirkəti Radioavtaomatika şirkətinə Rusiyaya qarşı ABŞ sanksiyalarından yaylınmaqda fəal dəstək verib

Birləşmiş Ştatlar Özbəkistandakı Promcomplektlogistic şirkətini sanksiya siyahısına daxil edib.

Bu barədə məlumat ABŞ Dövlət Departamentinin saytında verilib.

Xəbər verilir ki, Rusiya Ukraynaya təcavüzə başlayandan sonra, martın 22-də ABŞ Rusiyanın müdafiə sənayesi üçün malların alınması ilə məşğul olan Radioavtomatika şirkətini sanksiyalar siyahısına salıb.

Məlumatda deyilir ki, Özbəkistanın Promcomplektlogistic şirkəti Radioavtaomatika şirkətinə Rusiyaya qarşı ABŞ sanksiyalarından yaylınmaqda fəal dəstək verib:

"Promcomplektlogistic özəl şirkətinin sanksiyalar siyahısına salınması bütün dünya boyunca kommersiya qurumlarına xəbərdarlıq olmalıdır: əgər siz sanksiyalar altında olan hüquqi və fiziki şəxslərlə biznes edirsinizsə özünüzü də sanksiyalarla üzləşmək riskinə atırsınız”.

ABŞ Dövlət Departamentinin qərarı ilə Promcomplektlogistic şirkətinin ABŞ-dakı bütün aktivləri dondurulub və Amerika şirkətlərinə bu firma ilə hər hansı biznes əlaqələri qadağan edilib.

2018-ci ildə təsis edilmiş Promcomplektlogistic yerüstü nəqliyyata xidmət sahəsində ixtisaslaşıb.

AzadlıqRadiosunun Özbək xidməti bildirir ki, bu şirkət Rusiya şirkətlərinə mikrosxemlər satmaqla məşğul olub.

Daşkənddə qeydiyyatdan keçirilmiş şirkətin yeganə sahibi Oleq Qrabilindir.

Onun Rusiyada da bir neçə şirkətləri var.

Britaniya baş naziri Putini 'toksik maskulizmin nümunəsi' adlandırıb

Vladimir Putin Sibirdə istirahətdə. 2009

Böyük Britaniyanın Baş naziri Boris Conson deyib ki, Rusiya Prezidenti Vladimir Putin qadın olsaydı, Ukraynada "ağılsız, maço" müharibəni başlamazdı.

"Sizə toksik maskulizmin ideal nümunəsi lazımdırsa – bu, onun Ukraynada etdiyidir", - Conson Bavariya Alplarında "Böyük yeddilik" (G7) samitinin bitməsindən sonra Almaniya kütləvi informasiya vasitələrinə müsahibəsində bildirib. (Maskulizm feminizmin əksidir). Conson həmçinin, qadınları daha çox rəhbər vəzifələr tutmağa çağırıb.

G7 sammitində birinci görüş zamanı Conson zarafatyana soruşub ki, "bəlkə, məşhur fotodakı "Putindən daha vuran-yıxan oğlan" olduğumuzu göstərmək üçün pencəklərimizi çıxaraq?".

Böyük Britaniyanın Mühafizəkarlar Partiyasının lideri Boris Conson bundan öncə də feminist ritorikasında çıxış etmişdi. Bununla belə, onu dəfələrlə seksist zarafatlara görə də tənqid ediblər. 2018-ci ildə Beynəlxalq Qadınlar Günü Boris Conson qaçış üçün "Qadının yeri parlamentdir" yazılı futbolka geyinmişdi

İşğal olunan Xersonda referenduma hazırlıq görülür

Xerson şəhəri

Ukraynanın işğal edilən Xerson vilayətinin Rusiya qoşunlarının köməyi ilə təyin olunan hakimiyyəti bu regionun təcavüzkar ölkəyə birləşdirilməsi haqqında referendumun keçirilməsinə hazırlığın başlandığını bildirib.

"Biz referenduma hazırlaşırıq və onu keçirəcəyik. Xerson vilayəti qərarını verəcək və Rusiya Federasiyasına birləşəcək, tamhüquqlu subyekti olacaq", - rusiyayönümlü müvəqqəti administrasiyanın başçısının müavini Kirill Stremousov belə deyib.

Telelgram-da o yazır ki, regionun sakinləri "ənənəvi ailə dəyərlərinə, bizim ümumi tariximizə qayıtmaq istəyirlər. Avropa pozğunluğuna və Sevginin ilahi gücünün inkarına yox".

Səsvermənin dəqiq keçirilmə tarixi, hələlik, açıqlanmır. Bundan əvvəl Stremousov onun payızda baş tuta biləcəyini söyləmişdi.

Fevralın 21-də Moskva qondarma "Donetsk Xalq Respublikası" və "Luqansk Xalq Respublikası"nın müstəqilliyini tanıyıb. Fevralın 24-də Rusiyanın Ukrayna ərazisinə tammiqyaslı hərbi müdaxiləsi başlayıb. Rusiya ordusu və separatçıların bölmələri Ukraynanın şərq və cənubunda bir sıra ərazilərini tutub.

Donbasın bir hissəsi və Krım 2014-cü ilin yazından Ukrayna hakimiyyətinin nəzarətində deyil. Krım nəticələrini beynəlxalq ictimaiyyətin tanınmadığı referendum nəticəsində Rusiyanın hissəsi elan olunub. Moskva ilhaqı "tarixi ədalətin bərpası" adlandırıb.

ABŞ prezidentinin ailəsinə Rusiyaya giriş qadağan olunub

Cill Bayden

Rusiya Amerika Birləşmiş Ştatlarına (ABŞ) qarşı özünün sanksiyalar siyahısına daha 25 adamı daxil edib.

Siyahıda ABŞ prezidenti Co Baydenin ailə üzvləri də yer alır.

"Rusiyanın siyasi və ictimai xadimlərinə qarşı ABŞ-ın daim genişlənən sanksiyalarına cavab olaraq, senatorların rusofob kursunun formalaşmasına cavabdeh şəxslər,... həmçinin, prezident Co Baydenin ailə üzvləri də yer almaqla 25 Amerika vətəndaşı "stop-list"ə daxil edilir", - Rusiya Xarici İşlər Nazirliyinin (XİN) açıqlamasında bildirilir.

"Qara siyahı"ya o cümlədən ABŞ prezidentinin xanımı ilə qızı – Cill Eşli Bayden salınıb.

Siyahıda Konqres üzvləri, senatorlar, keçmiş hökumət rəsmiləri, universitet müəllimləri, təhqiqatçılar, 30 il öncə "Tarixin sonu" adlı məqalə ilə tanınan filosof və politoloq Frensis Fukuyama da var.

Moskvanın barələrində sanksiyalar tətbiq etdiyi ABŞ vətəndaşlarının ümumi sayı 1048 nəfərə çatıb.

Ukraynaya təcavüzdən (bu il fevralın 24-də) sonra ABŞ, Böyük Britaniya və Avropa İttifaqı (Aİ) üzvləri daxil, Qərb ölkələri Rusiyaya qarşı altı sanksiya paketi tətbiq edib. Rusiyanın fiziki şəxslərinə qarşı sanksiya siyahılarına Kremlə bağlı oliqarxlar, şəxsən prezident Vladimir Putin, onun qızları, Rusiya Xarici İşlər naziri Sergey Lavrov və onu ailə üzvləri də salınıb.

Litva Rusiyanın kiberhücumuna məruz qalıb

Haker

İyunun 27-də Litvanın dövlət və özəl strukturları kiberhücumdan əziyyət çəkib.

Bu barədə Litvanın Milli kibertəhlükəsizlik mərkəzi məlumat verir.

Dövlət vergi müfəttişliyinin, Miqrasiya departamentinin, habelə nəqliyyat şirkətləri və bir sıra kütləvi informasiya vasitələrinin (KİV) saytları çalışmayıb.

Milli kibertəhlükəsizlik mərkəzinin direktoru Yonas Skardinskasın sözlərinə görə, hücumlar Rusiyadan həyata keçirilib. Kremyönümlü "Killnet" qruplaşması da artıq məsuliyyəti üzərinə götürüb. Özlərinin Telegram-kanalında onlar video yayaraq Litvadan "Kalininqradın blokadası"nı götürməyi tələb ediblər, hakerlərin vurğulamasına görə, əks alda hücumlar davam edəcək.

Yonas Skardinskas ehtimal edir ki, yaxın günlərdə ölkənin nəqliyyat, energetika və maliyyə sektorunun saytlarına hücumlar gerçəkləşə bilər.

Hakerlər öz bəyanatlarında Litvanın sanksiyaya düşmüş yükləri daşıyan qatarları öz ərazisindən Kalininqrad vilayətinə buraxmamasını "Kalininqradın blokası" adlandırırlar. Buraya daş kömür, metal, sement, odun və yüksəktexnoloji məhsulların daşınması daxildir.

Litvanın LTG dəmiryol konserninin nümayəndəsi Mantas Dubauskas deyib ki, təmsil olunduğu şirkət Avropa İttifaqının Rusiya və Belarusa qarşı sanksiyalarını icra edir, qadağalar iyunun ortalarına tam qüvvəyə minməli idi.

Rəsmi Moskva Litvanın qərarına sərt şəkildə qarşı çıxaraq bildirib ki, söhbət ixracdan yox, Rusiyanın bir ərazisindən digərinə yüklərin tranzitindən gedir. O, sərt tədbirlər görəcəklərinə söz verib.

Rusiya 100 ildə ilk dəfə...

Maliyyə naziri Anton Siluanov və prezident Vladimir Putin

İyunun 27-nə keçən gecə Rusiya xarici valyutada olan suveren borcuna görə defolta yol verib. Bu barədə "Bloomberg" xəbər verib. Agentliyin yazdığına görə, bu, Rusiya ilə bağlı 1918-ci ildən bəri birinci dəfə baş verib. Amma Moskva defolt iddialarını rədd edir.

İyunun 26-da dövlət səhmləri üzrə 100 milyon dollar vaxtı keçmiş ödəmələrə görə güzəşt müddəti başa çatıb. Güzəşt müddətin bitməsi defolt deməkdir, - agentlik bildirir.

"Bloomberg" hesab edir ki, "bu, ölkənin sürətlə iqtisadi, maliyyə və siyasi izqoya çevrilməsinin kədərli əlamətidir". Agentlik izah edir ki, Mərkəzi Bakın valyuta ehtiyatları dondurulub, iri banklar isə dünya maliyyə sistemindən təcrid olunub. Amma vurğulanır ki, defolt, əsasən, rəmzi xarakter daşıyır və rusiyalılar üçün az şey deməkdir.

Rusiya deyir ki, rublu var

Rusiyanın Maliyyə naziri Anton Siluanov isə indiki halda defolt termininin işlədilməsini "fars" adlandırıb.

Rusiya deyir ki, istənilən hesabı örtmək üçün onda vəsaitlər var. Ötən həftə Moskva bildirib ki, ödənilməmiş dövlət borcunu rublla qaytaracaq, çünki xarici valyuta ilə bağlı hazırkı durumu Qərb süni şəkildə yaradıb.

Bundan öncə ABŞ Maliyyə Nazirliyi Rusiyaya suveren borcunu xarici valyutalarla qaytarmağa imkan verən lisenziyanı mayın 25-dən sonra uzatmaqdan imtina edib. Buna cavab olaraq Rusiya Maliyyə Nazirliyi xarici borcunu rublla ödəyəcəyini bəyan edib. Nazirlik avrobondlar üzrə ödəmələrlə bağlı Milli Hesab Depozitarisinə 12 milyard rubldan çox vəsait köçürdüyünü açıqlayıb. Qurumdan bildirildiyinə görə, bununla da öhdəliklər tam həcmdə icra olunub.

Martın 5-də Rusiya prezidenti valyuta ödəmələrinin rubla keçidinin mümkünlüyünə dair sərəncam imzalayıb. İyunun 2-də Vladimir Putin avrobondlar üzrə rubbla ödəmələrin mexanizmi haqqında daha bir sərəncam vermişdi.

Rusiya Federasiyasının xarici borcunun 40 milyard dollardan çox hissəsi Amerika və Avropa valyutaları ilə göstərilib.

Davamı

XS
SM
MD
LG