Ukraynanın Rusiyanın neft emalı zavodlarına zərbələri bərpa etməsi "rüsvayçılıqdır" və dünya bazarında enerji qiymətlərini yüksək həddə saxlayır. Bunu ABŞ prezidenti Donald Tramp oktyabrın 15-də "Newsmax" telekanalında yayımlanan müsahibəsində bildirib.
Ukrayna prezidenti Volodimir Zelenski Kiyevin Trampın enerji obyektləri ilə bağlı elan etdiyi atəşkəsdən imtina etdiyini açıqlayıb. Bu bəyanatın ardınca Ukrayna Rusiyanın neft emalı zavoduna zərbə endirib. Zelenski həmçinin Trampın Moskva ilə razılaşmalar əldə etməyə hazır olmasını da tənqid edib.
"Onun bütün etdikləri dünya bazarında neftin qiymətini artırır. Məncə, bu, rüsvayçılıqdır", – deyə Tramp vurğulayıb.
Ukrayna bundan əvvəl "Rosneft" şirkətinin Moskvanın cənub-şərqində yerləşən neft emalı zavodunu hədəf alıb.
"Zərbə endirilə biləcək çoxlu hədəf var. Amma dizel yanacağının istehsal olunduğu neft emalı zavodlarını vurmaq dünyaya yaxşı xidmət göstərmir. Bilirsiniz, dizel yanacağı bizə də, bütün dünyaya da lazımdır", – Tramp bildirib.
Rusiya Ukraynaya çoxsaylı raket və dron zərbələri endirərək, elektrik stansiyaları da daxil olmaqla enerji obyektlərini hədəfə alıb və yüz minlərlə insanı elektrik təchizatından məhrum qoyub. Zelenski isə "The Financial Times" qəzetinə müsahibəsində Ukraynanın səbrinin tükəndiyini bildirib.
Tramp "Newsmax"a müsahibəsində Zelenski ilə Rusiya prezidenti Vladimir Putinin bir-birinə nifrət etdiklərini bir daha vurğulayaraq, bunun münaqişənin başa çatdırılmasını çətinləşdirdiyini söyləyib.
"Zelenskinin böyük pərəstişkarı deyiləm. Fikrimcə, əslində onların hər ikisi müharibənin bitməsini istəyir. Amma mənə elə gəlir ki, Zelenski ilə dil tapmaq Putinlə müqayisədə daha çətindir", – Tramp əlavə edib.
Trampın Kiyevə Rusiyanın neft emalı zavodlarına zərbələri dayandırması üçün təzyiq göstərdiyi bir vaxtda, Ukraynanın döyüş meydanında rabitə və dron əməliyyatları üçün istifadə etdiyi peyk sisteminin fəaliyyəti məhdudlaşdırılıb. Oktyabrın 15-də Ukrayna "Starlink" xidmətlərinin işinin bərpa olunduğunu elan edib.
Məsələdən xəbərdar olan iki ABŞ və bir Qərb rəsmisinin sözlərinə görə, bu göstəriş birbaşa Ağ evdən gəlib. Ancaq onlar qərarı konkret kimin verdiyini və onun icrasına kimin cavabdeh olduğunu açıqlamayıblar.
Tramp: "Ukraynaya verilən silahların pulunu heç kim ödəməyib"
Tramp müsahibəsində onu da deyib ki, ABŞ öz silah-sursat ehtiyatlarını bərpa etdikdən sonra müttəfiqlərinə silah almağa icazə verəcək. O, bir daha keçmiş prezident Co Baydeni Ukraynaya çoxlu sayda "Patriot" və "Tomahawk" raketləri, eləcə də digər silahlar verməkdə ittiham edib. Trampın sözlərinə görə, bu silahların pulunu heç kim ödəməyib. ABŞ prezidenti xatırladıb ki, bundan sonra o, Avropa ölkələrinə Kiyevə göndərilən silahların pulunu ödəməli olduqlarını bildirib.
Söhbət NATO-nun PURL (Ukraynanın Prioritet Ehtiyacları Siyahısı) adlı mexanizmindən gedir. Bu mexanizm çərçivəsində müttəfiqlər ABŞ-dən silah alaraq Ukraynaya ötürürlər.
"The Washington Post" qəzeti may ayında 10 diplomat, rəsmi şəxs və konqresmen köməkçisinə istinadən yazmışdı ki, Avropa ölkələri bu mexanizmin işlək qalacağı sarıdan narahatdırlar. Buna səbəb İranla müharibə nəticəsində ABŞ-nin həyati əhəmiyyətli silah ehtiyatlarının azalmasıdır.
CNN telekanalı isə durumla tanış olan mənbəyə istinadən xəbər verib ki, Ukraynanın Rusiya ballistik raketlərini vurmağa qadir olan "Patriot" raketlərinin ehtiyatı, demək olar ki, tükənib.
ABŞ Kreml ilə dizel razılaşması əldə edəndən sonra Vaşinqtonla Kiyev arasında münasibətlər yenidən gərginləşib. Prezident Donald Tramp Ukraynaya yeni prezident lazım olduğunu bildirib.