Haiti hakimiyyəti avqustun 14-də ölkədə baş verən 7.2 bal gücündə zəlzələdən 1300-ə yaxın insanın həlak olduğunu açıqlayıb. Qonşu ölkələrdən yardım və xilasetmə-axtarış qrupları gəlməkdədir.
Mülki Mühafizə Agentliyi avqustun 15-də bildirib ki, zəlzələdə 1297 nəfər həlak olub. Xəsarət alanların sayı 5 min 700-dən çoxdur.
Xəstəxanalar yaralılarla dolub daşır. Hakim orqanlar ən çox ziyan dəymiş ərazilərə həkim briqadaları yollayırlar. Avqustun 16-da isə tropik “Grace” qasırğası gözlənilir.
Buna da bax: Əfqanıstan prezidentinin ölkəni tərk etdiyi bildirilir
Xəstəxanalar və məktəblər daxil olmaqla 700-dən çox bina dağılıb, azı 3 min 778 ev dağılıb. Yollara, infrastruktura ciddi ziyan dəyib.
200 minədək sakini olan mərkəzi Jeremi, 90 minədək insanın yaşadığı Les Keyz şəhərlərinə böyük ziyan dəydiyi xəbər verilir.
Yardım
Qonşu Dominikan Respublikası və Meksika Haitiyə quru sərhədi və hava ilə ərzaq, dərman çatdırır. Kolumbiya axtarış-xilasetmə heyəti göndərib.
Birləşmiş Ştatlar ləvazimat, 65 nəfərlik axtarış-xilasetmə komandası yollayıb.
Papa Fransisk beynəlxalq ictimaiyyəti dərhal dəstək verməyə çağırıb.
“Qoy hər kəsin göstərdiyi həmrəylik faciənin ağrısını yüngülləşdirsin”, – o, Müqəddəs Pyoter Meydanında bazar günü ibadəti zamanı deyib.
Haitidə eyni zamanda siyasi böhran yaşanır. Prezident Jovenel Moise iyulun 7-də sui-qəsdlə öldürülüb. Üstəlik, koronavirus pandemiyası, kəskin iqtisadi geriləmə və silahlı qruplaşmaların zorakılığı vəziyyəti daha da ağırlaşdırır.