Gürcüstanın hakim partiyası və müxalifət nümayəndələri arasında Tbilisidəki ABŞ səfirliyində keçirilən danışıqların növbəti raundu da nəticəsiz başa çatıb.
Dekabrın 9-da yer alan bu danışıqlarda oktyabr ayında keçirilmiş parlament seçkisi nəticələrinin doğurduğu fikir ayrılıqları müzakirə olunurdu.
Müxalifət hakim Gürcü Arzusu partiyasını və onun tərəfdarlarını səslərin satin alınmasında, habelə seçicilərin və müşahidəçilərin təhdid olunmasında, səslərin sayılmasında yol verilmiş saxtakarlıqda ittiham edir.
Səkkiz müxalifət partiyası parlamentin dekabrın 11-də keçiriləcək ilk sessiyasını boykot edəcəyini bildirib.
ABŞ və Avropa İttifaqının vasitəçiliyi ilə keçirilən danışıqların 4-cü raundunun çağırılması məhz bu boykot təhdidi ilə bağlı idi.
Buna da bax: Gürcüstan müxalifəti yeni etiraz aksiyalarını elan etdi
Hakim partiya geri çəkilmir
Hakim partiyadan parlamentin spikeri Arçil Talakvadze danışıqlardan sonra bir daha bəyan edib ki, onun partiyasına qələbə qazandırmış seçkinin nəticələri etibarlıdır:
"Pandemiyaya baxmayaraq bizim 2 milyon həmvətənimiz seçimlərini edib və bu seçimi şübhə altında qoymağa ehtiyac yoxdur”.
Müxalifət bu iddia ilə razılaşmır və 2021-ci ildə yeni seçkinin keçirilməsini tələb edir.
Mərkəzi Seçki Komissiyasının açıqladığı rəsmi nəticələrə görə milyarder Bidzina İvanişvili tərəfindən maliyyələşdirilən Gürcü Arzusu partiyası səslərin 48.22 faizini qazanıb. Vahid Milli Hərəkat Partiyasının müxalifət bloku səslərin 27.18, Avropa Gürcüstanı Partiyası isə 3.79 faizinə sahib olub.
Buna da bax: Tbilisidə polis etirazçıları su şırnağıyla dağıdıb
Daha 6 kiçik partiya
Daha 6 kiçik partiya parlamentə daxil olmaq imkanı verən 1 faizlik baryeri aşıb.
Avropa Gürcüstanı Partiyasının lideri Davit Bakradze dekabrın 9-da deyib ki, iqtidar və müxalifət arasında mümkün yeni seçkilər və müxalifətin siyasi məhbus hesab etdiyi şəxslərin azad olunması məsələlərində fikir ayrılığı davam edir.
O bildirib ki, bu vəziyyətdə kompromis əldə edilməsinin mümkünlüyünə inanır.
Müxalif Vətəndaş Partiyasının lideri Aleko Elisaşvili dekabrın 9-da deyib ki, seçki islahatının keçiriləcəyinə qarantiya verilərsə, o öz deputat mandatını qəbul edəcək.