Ermənistan Silahlı Qüvvələrinin Azərbaycanla dövlət sərhədində təxribat törətdiyi bildirilir.
Bu haqda Müdafiə Nazirliyi məlumat yayıb.
Məlumatda vurğulanır ki, bu gün, noyabrın 2-si saat 12:30 radələrində Tovuz rayonunun Qaralar kəndini Ermənistan silahlı qüvvələri iriçaplı silahlardan atəşə tutub.
Qaralar kəndinin qarşı tərəfdən - Ermənistanın Berd rayonu ərazisindəki adsız yüksəkliklərdəki mövqelərdən hədəfə alındığı bildirilir.
Buna da bax: Rusiya silah almaq üçün Ermənistana 100 milyon dollarlıq yeni kredit verir
Nazirlik qeyd edir ki, təxribatın miqyasının genişlənməməsi məqsədilə Azərbaycan Silahlı Qüvvələrinin həmin istiqamətdə yerləşən bölmələri təxirəsalınmaz tədbirlər görüb.
Noyabrın 2-si Azərbaycan müdafiə naziri Zakir Həsənov ATƏT-in fəaliyyətdə olan sədrinin şəxsi nümayəndəsi Anjey Kasprşik ilə də görüşüb.
Buna da bax: Cəbhədə nə baş verir? [video]
Görüşdə qoşunların təmas xəttindəki hazırkı vəziyyəti, keçirilən monitorinqlərin nəticələri və münaqişənin həllinə dair fikir mübadiləsi aparılıb.
Xatırlatma
Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi, ətraf 7 rayon və bəzi əlavə kəndləri işğal edilib. Atəşkəs razılaşmasından sonra da cəbhədə tez-tez atəş səsləri eşidilməkdədir. Tərəflər, bir qayda olaraq, buna görə bir-birlərini ittiham edirlər.
Dağlıq Qarabağ münaqişəsinin həlli ilə bağlı sülh danışıqları ATƏT-in Minsk qrupu həmsədrlərinin vasitəçiliyi ilə aparılır. ABŞ, Rusiya və Fransa həmsədr dövlətlərdir.