Ukrayna prezidenti Volodimir Zelenski iyulun 22-də general-mayor İqor Skibyukun Ukrayna Silahlı Qüvvələrinin Baş Qərargah rəisi təyin olunduğunu açıqlayıb. O, bu vəzifədə Andrey Qnatovu əvəz edəcək.
"Yeni baş komandanla çiyin-çiyinə Ukraynanı müdafiə etmiş çox təcrübəli zabitdir", – Zelenski X sosial şəbəkəsində yazıb.
Zelenski orduda kadr dəyişikliklərini davam etdirir.
Zelenski baş komandan Sırskini istefaya göndərdi
İyulun 21-i axşam saatlarında Ukrayna prezidenti Volodimir Zelenski general Mixaylo Drapatının ordunun yeni baş komandanı təyin olunduğunu elan edib. Oleksandr Sırski isə vəzifəsindən uzaqlaşdırılıb.
Bu kadr dəyişikliyi ölkədə genişmiqyaslı etiraz aksiyalarının keçirildiyi bir vaxta təsadüf edib. Nümayişçilər müdafiə naziri Mixaylo Fedorovun vəzifəsinə qaytarılmasını və onunla ciddi ixtilafları olan Sırskinin istefasını tələb edirdilər.
Sabiq nazir ordu idarəçiliyi, təchizat prinsipləri və rəhbərlik üslubundakı köklü yanaşma fərqliliyinə görə baş komandanla aralarında münaqişə yaşandığını açıq şəkildə bəyan etmişdi. Bu ixtilafın mövcudluğunu Zelenski də təsdiqləmişdi.
Zelenski çərşənbə axşamı Fedorovla növbəti görüşündə ona dövlətin texnoloji inkişafı ilə bağlı yeni hökumət vəzifəsi təklif edib.
Xmara Ukraynanın müvəqqəti müdafiə naziri oldu
Ukraynanın Nazirlər Kabineti iyulun 20-də Yevgeni Xmaranı müdafiə nazirinin səlahiyyətlərini icra edən şəxs vəzifəsinə təsdiqləyib.
Prezident Volodimir Zelenski iyulun 16-da Xmaranı bu vəzifəyə təyin etsə də, Nazirlər Kabineti onun namizədliyini təsdiqləməli idi.
Y.Xmara bundan əvvəl Ukrayna Təhlükəsizlik Xidmətinin (SBU) "Alfa" xüsusi təyinatlı bölməsinə rəhbərlik edib. Bu qurum Müdafiə Qüvvələrinin dronlardan istifadəyə görə ən uğurlu strukturlarından sayılır. Rusiyanın neft emalı zavodlarına uzaqmənzilli zərbələrin, ötən il reallaşdırılmış "Hörümçək toru" əməliyyatının arxasında “Alfa” dayanır.
Xmaranın müdafiə naziri təyin olunması üçün Ali Radanın qərarı tələb olunur.
Ötən həftə müdafiə naziri Mixaylo Fedorovun vəzifədən uzaqlaşdırılması ölkədə kütləvi etirazlara səbəb olub. Ukraynanın müxtəlif şəhərlərində insanlar artıq beşinci gündür etiraz aksiyalarına çıxır, Fedorovun bu posta qaytarılmasını tələb edirlər.
Fedorov vəzifədən uzaqlaşdırıldıqdan sonra Ukrayna Silahlı Qüvvələrinin baş komandanı Oleksandr Sırskini sərt tənqid edib. Onların xüsusilə dronlardan daha geniş istifadə ilə bağlı hərbi strategiyaya fərqli baxışlardan dolayı münaqişədə olduğu bildirilir. Keçmiş müdafiə nazirinin sözlərinə görə, məhz Sırski onun vəzifədən kənarlaşdırılmasında israr edib.
Sırski isə iyulun 20-də dərc etdiyi məqalədə Fedorovla münaqişədə olduğunu düşünmədiyini bildirib, ondan üzr istəyib. O, ünvanına səslənən tənqidləri rədd edib, Fedorovun təşəbbüslərinə qarşı çıxmadığını deyib. Onu da əlavə edib ki, "yalnız hazırda trenddə olanları deyil, hər şeyi almaq lazımdır". O həmçinin vurğulayıb ki, Müdafiə Nazirliyi ilə deyil, Rusiya ilə müharibə aparır.
Prezident Zelenski son günlər müxtəlif hərbi bölmələrin komandirləri ilə görüşüb. Bir sıra media orqanlarına danışan mənbələr Sırskinin istefaya göndərilə biləcəyini istisna etməyiblər. Ukrayna Silahlı Qüvvələrinin Baş Qərargahı isə iyulun 20-də bəyanat yayaraq baş komandanın vəzifəsində qaldığını açıqlayıb.
16 iyul
"Cəmiyyətin dediklərini eşidirəm"
Zelenski iyulun 16-da Kiyevdə Böyük Britaniyanın vəzifəsindən getmək üzrə olan baş naziri Kir Starmerlə brifinqdə ilk dəfə müdafiə nazirinin dəyişdirilməsi qərarından danışıb.
Bundan əvvəl "Ukrainska Pravda" nəşri mənbələrə istinadla xəbər vermişdi ki, Zelenski iyulun 15-i axşam "Xalqın Xidmətçisi" fraksiyasının deputatları ilə görüşdə Mixaylo Fedorovun Ukrayna Silahlı Qüvvələrinin baş komandanı Oleksandr Sırski ilə sistemli münaqişəsi olduğunu bildirib.
UNIAN agentliyi yazır ki, Zelenskinin Starmerlə brifinqdə dediklərindən müdafiə nazirinin dəyişdirilməsinin səbəblərindən birinin ordu rəhbərliyi ilə Müdafiə Nazirliyi arasında qarşıdurma olduğu görünür. Agentlik Zelenskinin "müxtəlif səviyyələrdə mürəkkəb dialoq" barədə sözlərini sitat gətirir.
"Əminəm ki, Mixaylo komandamda qalacaq və bunun necə olacağını bir qədər sonra müzakirə edəcəyik", – Zelenski vurğulayıb.
Ukrayna prezidenti iyulun 16-da səhərdən Fedorovun istefasına etiraz aksiyalarına da münasibət bildirib.
"İnsanlar küçəyə çıxmaq istədilər və bu, düzgündür. Cəmiyyətin dediklərini başa düşürəm, eşidirəm və buna reaksiya verirəm", – Zelenski söyləyib.
Fedorov və Sırskinin şərhləri
Fedorov iyulun 16-da keçirdiyi mətbuat konfransında baş komandan Sırskini sərt tənqid edib.
"Təklif etdiyimiz təşəbbüslərin qarşısının alındığını gördük. Bu gün danışdığımız problemləri nəzərə alsaq, Sırski şəxsən üz-üzə müzakirəyə hazır deyil. O, şəxsi görüşlər keçirib intriqalar qurmağa, hansısa media kampaniyasını kiminsə sifariş etdiyini düşünməyə hazırdır. Nəticədə faktiki ultimatum irəli sürdü. Rusiyanı qeyri-ənənəvi üsullarla necə məğlub etməyi düşünmək əvəzinə, ölkəni necə parçalamağı düşündü. Əsas problem də budur", – AzadlıqRadiosunun Ukrayna xidməti Fedorovdan sitat gətirib.
Fedorov bildirib ki, o, Sırskinin və Baş Qərargah rəisi Andriy Qnatovun dəyişdirilməsini təklif edib.
Sırski də duruma münasibət bildirib. O, "Telegram" kanalında Fedorova müdafiə naziri kimi fəaliyyətinə görə təşəkkür edib.
"Ona Ukrayna komandasının üzvü olaraq qalmağı arzulayıram. Birlikdə qələbəyə doğru!", – Sırski yazıb.
O, eyni paylaşımda 2022-ci ildə Kiyevin müdafiə əməliyyatı ilə fəxr etdiyini bildirib. Baş komandan qeyd edib ki, həmin əməliyyat sayəsində paytaxtı qorumaq mümkün olub. Sırski müharibəyə və effektiv strategiyaya fokuslanmaq gərəkdiyini vurğulayıb.
Fedorov informasiya texnologiyaları sahəsində sahibkar kimi tanınıb. O, Zelenskinin seçki qərargahında rəqəmsal istiqamətə rəhbərlik edib, rəqəmsal transformasiya və innovasiyalara cavabdeh baş nazir müavini olub. 2026-cı ilin yanvarında müdafiə naziri təyin edilib.
35 yaşlı Fedorov Ukrayna ordusunun texnoloji modernləşdirilməsi, pilotsuz sistemlərin inkişafının əsas tərəfdarlarından sayılır.
Hazırda Ukraynada yeni hökumətin formalaşdırılması prosesi gedir. Zelenski iyulun 12-də baş nazir Yuliya Sviridenkonun və onun Nazirlər Kabinetinin istefasını elan edib.
İyulun 16-da Ukrayna parlamenti Sergiy Koretskini yeni baş nazir təyin edib.