"Şou yaradırlar ki, qiymətlər düşüb"
Adının çəkilməsini istəməyən Ağcabədi sakininin sözlərinə görə, rəsmi təbliğatda qiymətlərin ucuzlaşması haqqında deyilənlər yalandır:
“Nə un, nə yağ ucuzlaşıb, hər şeyin qiyməti bahadır. “Azərçay”ın yarım kilosunu 4 manata alırdıq, indi 11 manat 80 qəpik olub. Arta-arta da gedir. Televiziyada deyilənlər doğru deyil. Mən özüm qiymətləri öyrənmək üçün 6 km yol gəzmişəm. Un yenə bahadır. Dostum oğluna 56 manata iki tay un aldırıb, tayı 28 manata düşüb. Amma deyirlər ki, 21 manatdır. Şou yaradırlar ki, qiymət düşüb. 1 tay un 10 manat bahalanıb. 70-ə yaxın yaşım var, mən hələ unun birdən-birə 10 manat bahalanmasını görməmişdim”.
Yanvarin 12-də və 13-də etiraz səslərinin eşidildiyi Ağcabədidə indi sakitlikdir. Rayon sakinlərinin AzadlıqRadiosuna verdiyi məlumata görə, yanvarın 14-də burda hər hansı aksiya keçirilməyib.
Böhranın daha bir əlaməti- kompüter satışı azalıb
2015-ci ildə fərdi kompüterlərin qlobal satışında kəskin azalma olub
“IDC” analitik şirkətinin məlumatına əsasən, ötən il PC-lərin – fərdi kompüterlərin satışı 2014-cü illə müqayisədə 10.6 faiz azalaraq 276 milyon 200 minə düşüb. 2014-cü ildə 308 milyon PC satılmışdı.
2008-ci ildən bəri ilk dəfə 300 milyon ədəddən aşağı satış qeydə alınıb.
Böhrana görə həbslərin statistikası
Həbsxanada olan jurnalist Xədicə İsmayıl ölkədə iqtisadi böhrana görə etirazlar və həbsləri narahatlıqla izlədiyini deyir. Jurnalist yanvarın 14-də saxlandığı 4 saylı cəzaçəkmə müəssisəsində vəkili Yalçın İmanovla görüşündə deyib ki, böhrana görə həbslərin statistikasını aparmağa başlayıb:
“Xədicə qeyd edir ki, hələlik həbslərin statistikası belədir: bahalığa etiraz edənlər – 55 nəfər, qiyməti artırmaqda ittiham olunanlar 3 nəfər, iqtisadi böhranın əsl səbəbkarları – 0 nəfər” – deyə vəkil bildirir.
Bakıda mağazalar, restoranlar bağlanır...
“Qonşu mağazanı dünən bağlayıb getdi. Neyləsin, çatdıra bilmirdi. Bu gedişlə, deyəsən, mən də bağlayacağam”.
Məhəllə mağazasının sahibi Güllü Əliyeva qonşusunun dükanı bağlamasından heyfslənir:
“Manat ucuzlaşandan çatdıra bilmirdi. Yeri də icarəyə götürmüşdü. Gördü borcu xərcini ödəmir, bağladı. Elə məndə də icarədir. İndi həm icarə haqqı vermək, həm də mal gətirib satmaq hər adamın işi deyil”.
Manatın yarıbayarı ucuzlaşmasından əvvəl də şəhərin mərkəzindəki bahalı mağazalar bir-bir bağlanırdı. İkinci devalvasiyadan sonra belə mağazaların sayı artıb. İndi isə həm kiçik ərzaq mağazaları, həm də iri iaşə obyektləri qapısını qıfıllayır. Restoranlar, kafelər, maşın salonları da bağlanan obyektlər sırasındadır.
Bir neçə müddətdir Bakı bulvarında imkanlı təbəqənin baş çəkdiyi Pasifico restoranı bağlanıb. İndi burda əvvəlki hay-küy, əyləncə səsləri qeybə çəkilib. Restoranln telefonları da cavab vermir.
Şəhərin mərkəzində yerləşən başqa bir restoran - Finnegans da bağlanıb. Restoranın saytında yazılıb ki, 17 ildən sonra bu addımı atmağa məcbur qalıblar.