Keçid linkləri

Təcili xəbərlər
2020, 02 Dekabr, çərşənbə, Bakı vaxtı 14:50

Canlı Rusiya-Türkiyə birgə müşahidə mərkəzi necə işləyəcək


Suriyada Rusiya-Türkiyə birgə hərbi patrulu.

Bu il sentyabrın 27-də Azərbaycan və Ermənistan silahlı qüvvələrinin təmas xəttində ağır döyüşlər başlamışdı. Azərbaycan bildirir ki, noyabrın 9-u günün sonuna, döyüşlərin dayandırılmasına qədər 280 civarında kəndi, dörd qəsəbəni (Hadrut, Mincivan, Ağbənd, Bartaz), Şuşa və daha dörd şəhəri (Cəbrayıl, Füzuli, Zəngilan, Qubadlı) işğaldan azad edib.

Noyabrın 10-da Azərbaycan, Ermənistan və Rusiya rəhbərlərinin adından atəşkəs bəyanatı yayılıb. Sənədə görə, Azərbaycan işğaldan azad etdiyi ərazilərdə qalır. Dekabrın 1-dək, üstəlik, Kəlbəcər, Ağdam və Laçın rayonlarının Azərbaycana qaytarılması nəzərdə tutulurdu. Laçın dəhlizində və qoşunların təmas xəttində isə Rusiya sülhməramlıları yerləşdirilib.

Bundan əvvəl, noyabrın 20-də Azərbaycan ordusu razılaşmaya uyğun, Ağdam rayon mərkəzinə daxil olmuşdu. Noyabrın 25-də isə Kəlbəcər rayonu işğaldan azad edilmişdi.

Rusiya-Türkiyə birgə müşahidə mərkəzi necə işləyəcək

Dekabrın 1-də Türkiyənin Müdafiə Nazirliyi Rusiya ilə Qarabağda atəşkəsə Birgə Müşahidə Mərkəzi barədə protokol imzalandığını açıqladı. Rusiya Müdafiə Nazirliyinin rəsmiləri də informasiyanı təsdiqləyərək bəzi detalları açıqlayıblar.

Nazirliyin rəsmisi İqor Konaşenkovun sözlərinə görə, imzalanmış sənəddə mərkəzdə Rusiya və Türkiyə tərəfdən eyni sayda əməkdaşların olması nəzərdə tutulub.

"Təşkilat strukturunda Rusiya və Türkiyə personalının sayı bərabər olacaq", – o deyib.

Rusiya, Azərbaycan və Ermənistan liderlərinin noyabrın 10-da açıqladığı razılaşmaya əsasən, Dağlıq Qarabağda döyüşlər dayandırılıb, tərəflər tutduqları mövqelərdə qalıblar və təmas xəttinə Rusiya sülhməramlıları yerləşdirilib. Üçtərəfli bəyanatda Türkiyə hərbçilərinin regiona gələcəyi barədə müddəa yer almasa da, prezident İlham Əliyev xalqa müraciətində bu barədə danışmışdı.

Sonradan verilən açıqlamalarda Türkiyə hərbçilərinin ermənilərin nəzarətində qalan ərazilərdən kənar qalacağı bəlli oldu. Rusiya rəsmiləri dəfələrlə qeyd ediblər ki, Qarabağda Türkiyə hərbçiləri yerləşdirilməyəcək. Rusiya prezidenti Vladimir Putin ötən ay deyirdi ki, "erməni tərəfini təmas xəttində türk əsgərinin olması ilə qıcıqlandırmaq nəyə lazımdır? Mənə belə gəlir ki, bunu prezident Ərdoğan da yaxşı başa düşürdü. Buna görə də biz razılaşdıq ki, Türkiyə Azərbaycanın tərəfində atəşkəsə nəzarət edəcək. Biz bu işi Türkiyə ilə birgə görəcəyik".

Lavrov əsir və cəsədlərin mübadiləsi haqda

Rusiya Dağlıq Qarabağ münaqişəsi tərəflərinin hərbi əsirlərin və cəsədlərin mübadiləsi prosesini məqsədli yubatmasını müşahidə etmir. Bunu Rusiyanın Xarici İşlər naziri Sergey Lavrov dekabrın 1-də KTMT-nin Xarici İşlər Nazirləri Şurasının iclasının yekunlarına dair mətbuat konfransında deyib.

Lavrov prosesin irəli getməsini əngəlləyən obyektiv çətinliklərin olduğunu qeyd edib.

"Prosesi yubadan məqsədli addımlardan danışmaq çətindir, biz bunu görmürük. Ancaq tezliklə həll olunacağına ümid etdiyim obyektiv çətinliklərin mövcudluğu faktdır", – o vurğulayıb.

Lavrov qeyd edib ki, relyefi, hərbi əməliyyatların necə başladığını nəzərə alaraq, atəşkəsdən dərhal sonra bu məsələlərlə məşğul olmaq çətin idi, üstəlik, itkin hesab edilənlərin dəqiq siyahıları da yox idi.

"Ümid edək, beynəlxalq strukturun mütəxəssislərini cəlb etməklə məsələ sürətlə irəliləyəcək. Bizim sülhməramlılar da imkan daxilində buna kömək edəcəklər", – rusiyalı nazir deyib.

Bakıda Laçın şənliyi
Gözlə

No media source currently available

0:00 0:02:33 0:00

Azərbaycan "hamının hamıya" dəyişdirilməsinin tərəfdarıdır

İtkin düşmüş hesab olunan Azərbaycan hərbi qulluqçularının taleyi ilə bağlı Beynəlxalq Qırmızı Xaç Komitəsi və Rusiya Federasiyası sülhməramlı qüvvələrinin komandanlığı ilə təmaslar davam etdirilir.

Bu məlumatı bu gün, dekabrın 1-də Azərbaycan Əsir və itkin düşmüş, girov götürülmüş vətəndaşlarla əlaqədar Dövlət Komissiyası yayıb.

Məlumatda qeyd olunur ki, vətəndaşların müraciət etmələri üçün qurumun rəsmi internet səhifəsi, (+99412) 405-71-61 telefon əlaqə və (+99412) 8161 qaynar xətt nömrələri fəaliyyət göstərir.

Məlumatda o da bildirilir ki, Azərbaycan Respublikası "hamının hamıya" prinsipi ilə bütün əsir və girovların qarşılıqlı şəkildə dəyişdirilməsinin tərəfdarıdır.

Amma qurum son aylar itkin düşmüş hesab olunan Azərbaycan hərbi qulluqçuların sayı ilə bağlı hər hansı açıqlama verməyib.

Davamı

XS
SM
MD
LG