Birləşmiş Ştatlar hakimiyyətini saxlamağa çalışan prezident Nicolas Maduroya təzyiqləri artırmaq məqsədilə Venesuelanın dövlət neft şirkətinə qarşı yeni iqtisadi sanksiyalar qoyub.
Vaşiqntonun yanvarın 28-də bu sanksiyaları bəyan etdiyi əsnada Maduronu Venesuelanın legitim prezidenti kimi tanımadığını elan edən ölkələrin sayı artmaqdadır.
Venesuela dünyanın ən böyük neft hasilatçılarından biridir və onun Petroleos de Venezuela SA şirkəti Maduronun prezidentliyini gücləndirən xarici valyutanın əsas mənbəyi olub. Məhz Maduronun hakimiyyəti illərində ölkə iqtisadi xaosa yuvarlanıb.
Yeni sanksiyalar ABŞ-ın Venesueladan neft idxalına qadağan qoymur. ABŞ Venesuela neftinin ən böyük bazarıdır. Lakin sanksiyalar ABŞ şirkətlərinə qısa adı PDVSA olan Venesuela dövlət neft şirkəti ilə maliyyə tranşlarını həyata keçirməyi qadağan edir.
Bu isə o deməkdir ki, Venesuela neftindən gələn gəlirlərin hamısı bloklanmış hesablarda yığılır.
ABŞ maliyyə naziri Steven Mnuchin televiziya ilə çıxışnda Venesuela hökumətinə hər hansı maliyyə köçürmələrini “qeyri-leqal, mənəviyyatsız cinayət aktı” adlandırıb.
Yeni sanksiyalar habelə PDVSA şirkətinin ABŞ filialı Citgo üçün mürəkkəblik yaradır.
Təhlilçilər bildirirlər ki, ABŞ PDVSA şirkətinə nəzarəti müxalifət lideri Juan Guaido-nun müttəfiqlərinə verməyə çalışa bilər. Vaşinqton Guaido-nu Venesuelanın müvəqqəti prezidenti kimi tanıyıb.
Bu baş versə, Maduro Rusiyanın Rosneft şirkətinə kreditlər üzrə ödənişləri dayandıra bilər.
Bu isə öz növbəsində Rosneft şirkətini Citgo-nun 49, 9 faizinin sahibliyini ona verəcək müqavilə maddəsini hərəkətə gətirməyə sövq edəcək.
