Ağ Ev bildirir ki, ABŞ və Rusiya prezidentləri Donald Trump və Vladimir Putin telefon söhbətində Suriya, İran, Şimali Koreya və Ukrayna məsələlərini müzakirə ediblər.
Trump-la Putin arasında noyabrın 21-də yer almış telefon söhbətindən bir gün əvvəl Rusiya prezidenti suriyalı həmkarı Bashar al-Assad-la Soçi şəhərində görüşmüşdü.
Noyabrın 22-də Soçidə Rusiya, İran və Türkiyə nümayəndələrinin sammiti keçirilməlidir.
Ağ Evin yaydığı bəyanatda deyilir ki, Trump-la Putin arasında söhbət bir saatadək çəkib.
Bundan əvvəl iki prezident bu ayın əvvəllərində Vyetnamda keçirilən APEC sammitinin kuluarlarında bir neçə dəfə qeyri-rəsmi söhbət etmişdilər.
Trump və Putinin noyabrın 11-də elan edilmiş birgə bəyanatında iki tərəf Suriya münaqişəsinə siyasi həll tapılmasının zəruriliyini qeyd etmiş və bildirmişdilər ki, onlar İslam Dövləti ekstremist təşkilatına qarşı mübarizəni davam etdirəcəklər.
O vaxt Trump bu bəyanatı “fövqəladə mühüm” adlandırmışdı.
Ağ Evin məlumatında deyilir ki, noyabrın 21-də baş vermiş telefon söhbətində prezidentlər 11 noyabr bəyanatına sadiq qaldıqlarını təsdiq ediblər.
Bu da xəbər verilir ki, iki prezident telefon söhbətində Suriya münaqişəsinin həllinə dair BMT-nin egidası altında aparılan Cenevrə prosesinə dəstək ifadə ediblər.
Onlar qaçqın düşmüş suriyalıların evlərinə qayıtmasının, vahid Suriyada stabillik yaradılmasınınmühümlüyünü qeyd ediblər.
BMT-nin təşkilatçılığı ilə keçirilən Suriya danışıqları noyabrın 28-də Cenevrədə davam etdirilməlidir.
Bundan əvvəl, noyabrın 23-də Suriya müxalifətinin nümayəndələri Səudiyyə Ərəbistanında görüşərək vahid təmsilçilik barədə razılığa gəlməlidirlər.
Kremlin yaydığı bəyanatda deyilir ki, Assad noyabrın 21-də Soçiyə, Rusiya, Türkiyə və İran tərəfindən tərtib olunmuş sülh təşəbbüsünə razılıq verməsi üçün dəvət olunmuşdu.
Putin Trump-la telefon danışığında Assad-la görüşü barədə də məlumat verib. O bildirib ki, Dəməşq altı ildir davam edən münaqişəyə dinc həll yolu tapılmasına rəğbətli münasinət bəsləyir.
Qərb ölkələri, Suriyada 2011-ci ildə münaqişə başlanandan bəri Assad-ın istefasına çağırırdılar və onun öz postunu tərk etməməsi bundan əvvəlki bütün sülh danışqılarına əngəl olub.
