Keçid linkləri

Təcili xəbərlər
2019, 15 Oktyabr, çərşənbə axşamı, Bakı vaxtı 13:56

Taleh Bağırovun xanımına qarşı cinayət işinə xitam verilib


L.İsmayılzadə

«Müsəlman Birliyi» Hərəkatının sədri, həbsdə olan ilahiyyatçı Taleh Bağırovun xanımı Leyla İsmayılzadə haqqında cinayət işinə xitam verilib. Bu barədə AzadlıqRadiosuna L.İsmayılzadə özü bildirib.

«Sentyabrın 30-da müstəntiq mənimlə əlaqə saxlayıb, vəkilimlə birlikdə yenidən istintaq idarəsinə gəlməyimi istəmişdi. Bu gün (oktyabrın 2-də-red.) getdik. Bizə bildirildi ki, cinayət tərkibi olmadığına görə cinayət işinə xitam verilir. Telefonu da özümə qaytardılar», - L.İsmayılzadə bildirib.

O hesab edir ki, cinayət işinə xitam verilməsi onunla bağlı olaya ictimaiyyətin kəskin təpkisinin nəticəsidir: «Məni tək qoymayan hər kəsə təşəkkür edirəm».

Taleh Bağırovun xanımı istintaqda dindirilib

«Müsəlman Birliyi» Hərəkatının sədri, həbsdə olan ilahiyyatçı Taleh Bağırovun xanımı Leyla İsmayılzadəyə sentyabrın 27-də ittiham elan olunub. Ona CM-in 317-1.1 (cəzaçəkmə müəssisələrində və ya istintaq təcridxanalarında saxlanılan şəxslərə qadağan olunmuş əşyaların verilməsi və ya ِötürülməsi) maddələri ilə ittiham irəli sürülüb və Ədliyyə Nazirliyinin istintaq idarəsində təqsirləndirilən şəxs qismində dindirilib.

Bu barədə AzadlıqRadiosuna danışan L.İsmayılzadə deyib ki, o, ِözünü təqsirli bilməyib: «Əgər mən məqsədli şəkildə keçirsəydim, onu gizlədərdim, açıq şəkildə, yoxlanılan çantanın içinə - uşağın oyuncaqlarının arasına atmazdım. Özləri də mobil operatorlara sorğu göndərib görüblər ki, işlək deyildi».

L.İsmayılzadə barəsində başqa yerə getməməyə dair iltizam-qətimkan tədbiri seçilib. O bildirib ki, yaxın günlərdə özü və vəkilləri cinayət işinin materiallarıyla tanış olacaq, ardınca iş məhkəməyə göndəriləcək.

L.İsmayılzadənin ittiham olunduğu Cinayət Məcəlləsinin 317-1.1 maddəsində 1000 manatdan 2000 manata qədər cərimə və ya 2 ilədək islah işləri, yaxud da 2 ilə qədər azadlıqdan məhrumetmə cəzası nəzərdə tutulub.

Penitensiar Xidmət martın 21-də L.İsmayılzadə haqda məlumat yayıb. Məlumatda bildirilib ki, L.İsmayılzadə üç azyaşlı ِövladı ilə birlikdə həyat yoldaşının yanına gələndə mobil telefon və danışıq kartı gətirib: «Məhkum Bağırov Taleh Kamil oğlunun yanına üç azyaşlı ِövladları ilə birgə qısamüddətli görüşə gəlmiş arvadı, Bakı şəhər sakini İsmayılzadə Leyla Miryaqub qızı tərəfindən gətirilmiş sovqata və əşyalarına baxış keçirilən zaman uşaq çantasının içində oyuncaqların arasından 1 ədəd «Samsung» markalı mobil telefon və 1 ədəd danışıq kartı aşkar edilmişdir».

L.İsmayılzadə isə qayınatasına məxsus sözügedən telefonun işlək olmadığını, uşağın ondan oyuncaq kimi istifadə etdiyini və həbsxanaya məqsədli şəkildə gətirilmədiyini bildirib: «Gündüzlər o telefonda Abbas Youtube-da cizgi filminə baxır, axşamlar da babası saytlara. Başımız qarışıq olub, heç bilməmişik nə vaxt atıb oyuncaqların arasına. Elə birbaşa çantanı götürüb aparmışıq. Həbsxanada bütün çantaları, əşyaları yoxlamaya təqdim etmişdik. Çantaları yoxlayıb gətirdilər, Abbasın oyuncaq çantasını da. Artıq görüşdə idik, Abbas oyuncaqlarıyla oynayırdı, gəlib Talehi çağırdılar ki, uşağın oyuncaq çantasının içindən telefon tapılıb. Gətirib telefonu göstərəndə özümdən ixtiyarsız qayıtdım ki, biz bu telefonu iki gündür axtarırdıq. Ağlımıza gəlməzdi ki, oyuncaqların arasına atar».

L.İsmayılzadə hesab edir ki, həyat yoldaşına təzyiq məqsədilə bu olayı şişirdiblər.

Xatırlatma

2015-ci il noyabrın 26-da Baş Mütəşəkkil Cinayətkarlıqla Mübarizə İdarəsinin Bakının Nardaran qəsəbəsində keçirdiyi əməliyyatda ikisi polis olmaqla, altı nəfər həlak olub. Rəsmi ittihama görə, radikal silahlı dəstə polis əməkdaşlarına silahlı müqavimət göstərib.

Həmin vaxt Nardaranda və bundan bir qədər əvvəl Sabunçu Rayon Polis İdarəsinin qarşısında baş verən hadisələrə görə 70-dən çox (hüquq müdafiəçilərinin siyahısında bu rəqəm 80-dən çox göstərilir) adam həbs olunub. Onların bir qisminə silah saxlama ittihamı ilə ilyarımdan 6 il 6 ayadək həbs cəzası kəsilib. 40 nəfərdən çox adama isə daha ağır maddələrlə (dövlət çevrilişinə cəhd, terrorçuluq, dini nifaq salma və s.) ittihamlar verilib.

«Müsəlman Birliyi» Hərəkatının sədri T.Bağırov 20 il həbs cəzasına məhkum edilib.

Nardaran olayları ilə bağlı həbs edilənlərin əksəriyyəti məhkəmələrində tutularkən və ilkin dindirilmədə ağır işgəncələrə məruz qaldıqlarını bildiriblər. Onlar verilən ittihamları qəbul etməyiblər.

Ancaq Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin və digər hüquq-mühafizə orqanlarının əməkdaşları məhkəmə prosesində işgəncə şikayətlərini təkzib ediblər.

Günün bütün mövzuları

XS
SM
MD
LG