Keçid linkləri

2024, 19 Mart, çərşənbə axşamı, Bakı vaxtı 07:14

Saatlı sakinləri: 'İlham Əliyevə deyiləsi çox sözümüz vardı...'


İlham Əliyev Saatlı rayonuna səfərə çıxıb. 28mart2017
İlham Əliyev Saatlı rayonuna səfərə çıxıb. 28mart2017

“İşıqları kəsib, yolları bağlayıb, rayonda həyatı dondurublar ki, nə var-nə var, prezident gəlib. Xalqın ürəyi dolu idi, İlham Əliyevə deyiləsi çoxlu sözümüz vardı, ancaq prezidentə yaxın düşə bilmədik”.

Martın 28-də prezident İlham Əliyev Saatlı rayonuna səfərə çıxıb. Rayon sakinləri AzadlıqRadiosu-na danışırlar ki, əslində, prezidentin buraya gəlişini çoxdan istəyirlərmiş. O, martın 28-də rayona gəlsə də, onlar ölkə başçısına qalaq-qalaq problemlərindən danışmaq fürsətini qaçırıblar.

Buna da bax:​ İ.Əliyev: 'Dünyada ən yüksək inkişaf göstəriciləri bizdədir'

“Hamısı ürəyimizdə qaldı”

Zahid Əsgərov prezidentə qazın və işığın qiymətindən gileylənəcəkmiş: “Günlərlə işıqlarımızı kəsdilər ki, prezident gələcək deyə, yol kənarındakı dirəkləri, işıq xətlərini dəyişirlər. Mən özüm Mustafabəyli kəndindənəm. İşığı yenə gecədən kəsiblər. Camaatın ürəyi doludur, prezidentə qazın, işığın qiymətindən şikayətimiz vardı. Hamısı ürəyimizdə qaldı. Prezidentin ətrafına əvvəlcədən öyrədilmiş insanları buraxdılar. Adamlara evdən çölə boylanmağa imkan vermədilər. Guya prezidentin təhlükəsizliyinə görədir. Məsələn, mən prezidentə neyləyəcəkdim ki, uzaqbaşı, yaxınlaşıb deyəcəkdim, qazın, işığın qiymətini yerinə qaytar, batırıq”.

Buna da bax: Prezident: 'Biz nümunə göstəririk...'

“Necə yaşayaq?”

Adı açıqlanarsa, işini itirməkdən qorxan məhkəmə işçisi deyir:

“Aylıq məvacibim 260 manatdır. Bu ay 180 manat qazpulu qəbzi gəlir. Qaza limit qoyulandan sonra narazılıq birə-beş artıb. Necə yaşayaq? “Prezident gələcək” deyib, təndir obyektimizi də bağlayıblar. Başımızı çölə çıxarmağa qoymurlar. Gecədən də işıqlarımızı söndürüblər”.

Saatlı sakinlərini narahat edən əsas məsələlərdən biri də əkin sahələridir. Dediklərinə görə, bu sahələri zorla əllərindən alıb pambıq əkirlər: “Biri də deməyib ki...”

Buna da bax:​ Saatlıda pambıq müşavirəsi

“Prezident gəlib, pambıq sahələrinə aparıblar. Onun xoşuna gəlib, tərifləyib. Ancaq biri də deməyib ki, buralar camaatın örüş, taxıl sahələri olub”. Prezident Saatlıda pambıq müşavirəsi keçirib. O, pambıqçılığın inkişafına dövlətin töhfəsindən, vətəndaşların pambıqçılığa marağından danışıb. Saatlı Rayon İcra Hakimiyyətindən “Qaynar xətt”ə prezidentin rayona səfərinin uğurlu keçdiyi bildirilib. Ölkə başçısı rayonda pambıqçılığın inkişafına həsr olunmuş respublika müşavirəsi keçirib. Çox vacib olan bu müşavirə rayonun iqtisadi və social inkişafına öz təsirini göstərəcək: “Hamının işığı da yanır, qazı da, heç bir narahatçılıq yoxdur. Bəli, bəzi təhlükəsizlik tədbirləri alınıb, bu da dövlət səviyyəsində olan bir işdir. Ancaq heç kəs evə qapadılmayıb, hərə öz işində-gücündədir. Boş söhbətlərdir”, – qurumdan belə deyiblər.

XS
SM
MD
LG