Gürcüstanın keçmiş prezidenti və Ukraynanın Odessa vilayətinin keçmiş qubernatoru Mikheil Saakashvili-nin partiyası iyulun 21-də keçiriləcək Ukrayna parlamenti seçkisində iştirak edəcəyini və millət vəkilliyinə 10 namizəd göstərəcəyini bildirib.
Saakashvili Yeni Qüvvələr Hərəkatının namizəd siyahısında birincidir.
Bu barədə məlumatı hərəkat iyunun 13-də keçirdiyi mətbuat konfransında bəyan edib.
Saakashvili deyib ki, siyahıdakılar “ədalətsizlik və korrupsiya” ilə mübarizədə səriştəsi olan insanlardır.
Keçmiş Gürcüstan lideri Ukraynaya mayın 29-da Ukraynanın yeni prezidenti Volodymyr Zelenskiy onun Ukrayna vətəndaşlığını bərpa etdikdən sonra qayıdıb.
Saakashvili 2004-2013-cü illərdə Gürcüstanın prezidenti olub. Bundan bir il sonra, 2014-cü ildə onun partiyası parlament seçkisində müxalifətə uduzub.
Mayın 28-də AzadlıqRadiosuna verdiyi müsahibədə Saakashvili Ukraynanın ictimai həyatında əhəmiyyətli rol oynamaq planlarından söz açmışdı.
Saakashvili-yə ilk dəfə Ukrayna vətəndaşlığı 2015-ci ildə verilmiş və Ukraynanın keçmiş prezidenti Petro Poroshenko onu Odessa vilayətinin qubernatoru təyin etmişdi.
Elə həmin il Gürcüstanın yeni hakimiyyət orqanları Saakashvili-ni ölkə vətəndaşlığından məhrum etmişdi. Buna əsas olaraq Gürcüstanın ikili vətəndaşlığı tanımadığı göstərilirdi.
Lakin 2016-cı ildə islahatların həyata keçirilməsinin sürətinə görə Poroshenko ilə qarşıduması yarandıqdan sonra Saakashvili qubernator vəzifəsindən azad olunmuşdu.
2017-ci ildə Saakashvili özünün siyasi partiyasını yaratdıqdan az sonra Petro Poroshenko onu Ukrayna vətəndaşlığından məhrum etmişdi.
