Keçid linkləri

Təcili xəbərlər
2020, 23 Oktyabr, Cümə, Bakı vaxtı 09:34

Rusiya ABŞ-ın Avropada yeni raketlər yerləşdirməyəcəyinə inanmır


Rusiya xarici işlər nazirinin müavini Sergei Ryabkov

Rusiya xarici işlər nazirinin müavini Sergei Ryabkov xəbərdarlıq edib ki, ABŞ-ın Soyuq Müharibə illərində imzalanmış nüvə silahı müqaviləsindən çıxması Avropada sabitliyə ciddi ziyan vura bilər.

Ryabkov noyabrın 26-da deyib ki, Rusiya Vaşinqtonun təkziblərinə baxmayaraq ABŞ-ın bu müqavilədən çıxdıqdan sonra Avropada yeni raketlər yerləşdirəcəyini gözləyir.

1987-ci ildə imzalanmış və qısa adı INF olan müqavilə ABŞ və Rusiyaya 500 kilometrdən 5000 kilometrədək uçan raketlərin istehsalını, saxlanmasını və yerləşdirilməsini qadağan edir.

Hər iki tərəf bir birini bu müqavilənin pozulmasında ittiham edir. Donald Trump ötən ay ölkəsinin sözü gedən müqavilədən çıxmaq niyyətini açıqlayıb.

Trump-ın və onun rusiyalı həmkarı Vladimir Putinin bu məsələni noyabrın 30 və dekabrın 1-də Argentinada keçiriləcək G20 sammitində müzakirə edəcəyi gözlənilir.

Ryabkov mətbuat konfransında deyib ki, Rusiya bu məsələ ətrafında danışıqlara açıqdır.

NATO-nun baş katibi Jens Stoltenberg deyib ki, o Avropada yeni ABŞ raketlərinin yerləşdiriləcəyini güman etmir. Bu arada ABŞ-ın milli təhlükəsizlik müşaviri John Boltonsa deyib ki, Vaşiqnton belə raketlərin yerləşdirilməsi barədə qərar qəbul etməkdən hələ çox uzaqdır.

Ryabkovsa deyib ki, Birləşmiş Ştatlar iki-üç il ərzində Avropada yeni ortamənzilli raketlərin yerləşdirilməsi iqtidarında olacaq və bu, təhlükəli silahlanma yarışına start verəcək:

"Amerika raketləri yerləşdiirlərsə, bu ABŞ-a Rusiya ərazisinin dərinliklərini hədəfləmək üçün əlavə qabiliyyət verəcək”.

Diplomat deyib ki, ABŞ belə raketləri yerləşdirsə, Rusiyanın cavabı “effektli” olacaq.

Bundan əvvəl Putin bəyan etmişdi ki, Moskva yeni ortamənzilli raketləri öz ərazisində yerləşdirməyə razılıq vermiş Avropa ölkələrini hədəfləmək məcburiyyətində qalacaq.

XS
SM
MD
LG