Kadırov Ukraynaya yeni döyüşçülər göndərir
Çeçenistan rəhbəri Ramzan Kadırov Ukraynaya daha bir könüllü dəstənin göndərilməsindən danışıb. Onun sözlərinə görə, həmin hərbçilər Qudermesdəki Rusiya Xüsusi Təyinatlı Qüvvələri Universitetində hazırlıq kursunu bitiriblər. Amma hadisələri təhlil edən ekspertlər Çeçenistandan olan döyüşçülərin Ukraynada effektiv döyüşməsinə şübhə ilə yanaşırlar.
Buçada öldürülən mülki şəxslərin ilkin sayı - 412 nəfər
Buça şəhərinin meri Anatoli Fedoruk şəhərin rus qoşunları tərəfindən işğalı zamanı öldürülmüş mülki əhalinin eksqumasiyasının başa çatdığını bildirib. Onun sözlərinə görə, indiyədək 412 ölüm faktı təsdiqlənib. Amma o, bunun son rəqəm olmadığını deyib . Qurbanlar haqqında məlumatların toplanması hələ də davam edir. Fedoruk onu da bildirib ki, Buçada Müqəddəs Endryu kilsəsi yaxınlığındakı kütləvi məzarlıqdan 30-u qadın və 2-si uşaq olmaqla 117 insan cəsədi çıxarılıb. Merin sözlərinə görə, həmin kütləvi məzarlıqda yerli xəstəxanada vəfat edən xəstələrin və bir neçə ukrayna hərbçisinin də cəsədləri tapılıb. Bildirilir ki, fevralın 24-dən sonra Rusiya hərbçiləri yerli qəbristanlıqda dəfn mərasimlərinin keçirlməsinə imkan verməyiblər.
Rusiyanın 4 sualtı qayığından Uraynaya raket atılır
Rusiyanın ən azı dörd sualtı qayığı Qara dənizdən Ukrayna ərazisinə raket zərbələri endirir. Bu barədə UNİAN Odessa hərbi administrasiyasının operativ qərargahına istinadla məlumat yayıb.
"Söhbət Rusiyanın "Project 877 Halibut" sualtı qayıqlarından gedir. Raketlər 50 metrə qədər dərinlikdən buraxılır ki, bu da radarlar və peyklərin onları effektiv aşkarlamasına imkan vermir", - UNİAN administrasiyanın mətbuat katibindən sitat gətirir.
Odessa raket atəşinə tutulub
Ukrayna Silahlı Qüvvələrinin “Cənub” əməliyyat komandanlığı Odessanın raket atəşinə tutulduğunu təsdiqləyir. Məlumata görə, raketlər "infrastruktur obyektlərini" vurub. Odessanın atəşə tutulması zamanı mərmi yaşayış binasına da düşüb. UNİAN agentliyinin məlumatına görə, şəhərdə dörd partlayış səsi eşidilib. Məlumatda bildirilir ki, bir neçə mənzilə ciddi ziyan dəyib. Hələlik insan təlafatı barədə məlumat verilmir.