Kiyev “Azovstal”dan bütün qadın və uşaqların təxliyə olunduğunu bildirir
Ukrayna rəhbərliyi Mariupoldakı “Azovstal” zavodunun ərazisindən bütün qadın, uşaq və qocaların təxliyəsi barədə məlumat verib. Bu barədə Ukrayna baş nazirinin müavini İrina Vereşçuk öz Telegram kanalında yazıb. "Prezidentin tapşırığı yerinə yetirilib: Azovdan olan bütün qadınlar, uşaqlar və qocalar təxliyə edilib. Mariupol humanitar əməliyyatının bu hissəsi başa çatıb", - Vereşçuk yazıb.
Mayın 7-də daha sonra Rusiya Müdafiə Nazirliyi blokadaya alınmış “Azovstal” zavodundan mülki əhalinin təxliyyəsinin başa çatdığını elan edib.
Ukrayna Prezidenti Vladimir Zelenski axşam müraciətində evakuasiya missiyasının birinci mərhələsini həyata keçirməyə kömək edən Beynəlxalq Qırmızı Xaç və BMT-yə təşəkkür edib. "Biz 300-dən çox insanı - qadınları, uşaqları xilas edə bildik. Faktiki olaraq biz mülki şəxsləri Azovstaldan çıxardıq" -Ukrayna prezidenti bildirib.
Bir gün əvvəl Ukrayna prezidentinin dəftərxanası Mariupoldan və Azovstal ərazisindən 500-ə yaxın insanın təxliyəsi barədə məlumat yayıb. Daha sonra İrina Vereşçuk metallurgiya zavodunun ərazisində gizlənən daha 50 nəfərin çıxarılması barədə məlumat verib-AzadlıqRadiosunun Ukrayna xidməti bildirir.
Sumi rayonunun yer-hava raketləri ilə atəşə tutulduğu bildirilir
Rayon administrasiyanın rəhbəri Dmitri Jivitskinin sözlərinə görə, Rusiya aviasiyası Sumi vilayətinə yer-hava tipli raketlər atıb. Onun sözlərinə görə, Miropol və Xotin icmalarının ərazisi zərər çəkib. Atışma nəticəsində Ukrayna sərhəd xidmətinin bir hərbçisi yaralanıb.
Müharibə şəraitində rəsmi qurum nümayəndələrinin açıqladığı bu kimi məlumatları yoxlamaq çətindir.
Mayın 7-də Odessa vilayətinə dörd qanadlı raket atılıb. Məlumata görə, xəsarət alan olmayıb. Bildirilir ki, məlumat “Cənub” əməliyyat komandanlığında da təsdiqlənib.
ABŞ-dan Ukraynaya 150 milyon dollarlıq yeni hərbi yardım
Amerika Birləşmiş Ştatlarının (ABŞ) prezidenti Co Bayden Ukraynaya yeni hərbi yardım paketini təsdiqləyib. Bu sənədə görə, Ukraynaya artilleriya sursatları, radarlar və digər texnikalar göndəriləcək. Pentaqonun məlumatına görə, hərbi yardımın məbləği 150 milyon dollar təşkil edəcək.
Bayden, Konqresi tələb olunan maliyyəni dərhal təmin etməyə çağırıb. Rusiyanın Ukraynaya müharibəyə başlamasından bəri ABŞ-ın Kiyevə hərbi yardımının ümumi məbləği təxminən 3,8 milyard dollar təşkil edib.