Martın 2-də Rumıniyanın şərqində yoxa çıxmış qırıcını axtaran vertolyot qəza edib, yeddi rumıniyalı əsgər həlak olub. Məlumatı ölkənin müdafiə nazirliyi açıqlayıb.
IAR 330-Puma vertolyotunun aerodromun 10 kilometrliyində yerləşən Gura Dobrogeydə qəza etdiyi bildirilir.
Vertolyot yerli vaxtla axşam 8-də havaya qalxandan üç dəqiqə sonra radardan itmiş MiG 21 LanceR qırıcısını axtarırdı.
Vertolyotun və əsgərlərin qalıqları tapılıb. Müdafiə naziri Vasili Dinku yeddi heyət üzvünün həlak olduğunu bildirir.
Nazirliyin sözçüsü Konstantin Spanu qırıcının tapıldığını deyib. Amma Rumıniya mediasının danışdırdığı şahidlər təyyarənin radardan itdiyi ərazidə partlayış olduğunu söyləyiblər.
Spanu deyib ki, vertolyotun pilotu hava şəraitinin pis olması haqda məlumat verib, ona geri dönmək əmr edilib.
“Mümkün səbəbləri müzakirə etmək üçün tezdir. Yəqin ki, hava yaxşı olmayıb, amma indi buna şərh verə bilmərik”, – o, Digi24 televiziyasına deyib və iki təhqiqat komissiyasının yaradıldığını bildirib.
Qəzaların Rusiyanın Ukraynaya təcavüzü ilə hər hansı bağlılığı haqda informasiya yoxdur.
Rumıniya Prezidenti Klaus Yohannis yeddi əsgərin ölümünə görə başsağlığı verib.
