Keçid linkləri

2024, 19 Mart, çərşənbə axşamı, Bakı vaxtı 06:30

Qərb Ukraynaya ‘misli görünməmiş’ hərbi yardım vəd edir


ABŞ istehsalı Bradley PDM-ləri Latviyaya 2017-ci ildə gətirilib (Arxiv fotosu)
ABŞ istehsalı Bradley PDM-ləri Latviyaya 2017-ci ildə gətirilib (Arxiv fotosu)

Qərb ölkələrinin bir qrupu yanvarın 20-də Almaniyanın Ramştayn hərbi bazasında NATO müttəfiqlərinin Ukraynaya həsr olunacaq görüşünün ərəfəsində Kiyevə “misli görünməmiş” hərbi yardım vədi ilə çıxış edib.

Baltika ölkələri, Britaniya, Polşa, Danimarka, Çexiya, Niderland və Slovakiyanın nümayəndələri öz cəbbəxanalarından Ukraynaya ağır tanklar, PDM-lər, ağır artilleriya qurğuları verməyə hazır olduqlarına dair müraciət imzalayıblar.

Britaniya Ukraynaya Challenger 2 ağır tankları, özüyeriyən AS90 artilleriya qurğuları, dronlar, PDM-lər, artilleriya mərmiləri, GMLRS və Brimstone raketləri, Starstreak hava hücumundan müdafiə sistemləri, habelə hərbi texnikanın təmiri üçün səyyar emalatxanalar verməyə hazır olduğunu bildirib.

Polşa Ukraynaya C-60 zenit silahları, KRAB haubitsaları və sursat verəcəyini deyib.

Litva Ukraynaya L-70 zenit qurğuları, iki Mi-8 helikopteri, habelə Ukrayna hərbiyyəsinin ehtiyacları üçün 40 milyon avro verilməsini planlaşdırır.

Latviya isə bildirir ki, Ukraynaya səyyar Stinger raket kompleksləri, iki ədəd Mi-17 helikopteri, dronlar, pulemyortlar və M109 topları üçün ehtiyat hissələri verəcək.

Estoniyanın yardım paketinə FH-70 haubitsaları, 155 mm çaplı artilleriya sursatı, avtomobillər və tank əleyhinə Carl-Gustav M2 kompleksləri daxildir.

ABŞ-dan 2.6 milyard dollarlıq texnika

Çexiya və Slovakiya bildirirlər ki, Ukraynaya ağır tankların verilməsi üçün müttəfiqlərlə danışıqları davam etdirəcəklər.

Fransa Ukrayna üçün 19 ədəd Caesar haubitsaları hazırlayıb.

Bu arada İsveç bildirib ki, Ukraynaya CV90 PDM-ləri, Archer artilleriya sistemləri və tank əleyhinə NLAW kompleksləri verməyə hazırdır.

Bundan əvvəl məlum olmuşdu ki, ABŞ Ukrayna üçün böyük hərbi yardım paketi hazırlayıb.

Bəzi məlumatlara görə bu hərbi yardımın dəyəri təxminən 2.6 milyard dollar olmalıdır.

Bu paketə ilk dəfə olaraq 100 ədəd Stryker döyüş maşınları və 50-dən az olmayaraq Bradley PDM-ləri daxil olacaq.

Fransa bundan əvvəl Ukraynaya AMX-10 RC zirehli maşınlarını verəcəyini bildirmişdi. Bu maşınları habelə “təkərli tank” və ya “yüngül tank” da adlandırırlar.

Bəs əsl ağır tanklar?

Almaniya bildirib ki, Ukraynaya Marder PDM-ləri və Patriot zenit-raket qurğuları verəcək.

Xəbərlərdə deyilir ki, Niderland Ukraynaya Almaniya istehsalı Leopard 2 tanklarının veriləcəyi təqdirdə bu prosesi maliyyələşdirməyə hazırdır.

Niderlandın müdafiə naziri Kaysa Ollonqren xatırladıb ki, bundan əvvəl Çexiyadan Ukraynaya verilmiş T-72 tanklarının da pulunu onun ölkəsi ödəyib.

Britaniya Ukraynaya son model tanklar göndərir
Gözlə

No media source currently available

0:00 0:01:53 0:00

Ollonqren əlavə edib ki, Polşa və Finlandiya da öz cəbbəxanalarında olan Leopard 2 tanklarını Ukraynaya verməyə hazırdırlar.

Amma Leopard tanklarının Ukraynaya verilməsi üçün onun istehsalçısı olan Almaniyanın razılığı lazımdır.

Almaniya kansleri Olaf Şolts deyib ki, Berlin belə bir addımı əgər ABŞ Ukraynaya özünün Abrams tanklarını verərsə ata bilər.

ABŞ isə bu məsələdə qəti bir söz deməyib. ABŞ hərbiyyəsi bundan əvvəl bildirmişdi ki, Abrams çox məsrəfli, mürəkkəb və ağır tanklardır və bunların verilməsi üçün Ukraynadan böyük bir hərbi heyətin təlimləndirilməsinə ehtiyac var.

ABŞ-da bir qrup konqresmen Ukraynaya ağır tankların verilməsi üçün Ağ Evə məktub yazıb.

AzadlıqRadiosunu Rusiya hökuməti "arzuolunmaz təşkilat" elan edib.

Əgər siz Rusiyadasınızsa, bu ölkənin pasportunu daşıyırsınızsa, yaxud orada daimi yaşayan, amma vətəndaşlığı olmayan şəxssinizsə, nəzərə alın- məzmunumuzu paylaşdığınıza, bəyəndiyinizə, şərh yazdığınıza, bizimlə əlaqə saxladığınıza görə cərimə və ya həbslə üzləşə bilərsiniz.

Ətraflı məlumat üçün bura klikləyin.

Abunə

XS
SM
MD
LG