Qazaxıstanın peyk və internet operatoru – TVCOM bildirir ki, yanvarın əvvəlindən Rusiyanın Birinci kanalı (ORT) də daxil bir neçə Rusiya telekanalını özünün yayım cədvəlindən çıxarıb.
Operatorun məlumatına görə informasiya gündəlikli kanalların azaldılması çərçivəsində “PKVS Qazaxıstan” telekanallar qrupunun peyk və internet yayımları cədvəlindən çıxarılmasına dair qərar qəbul edilib.
Beləliklə də Rusiyanın “Birinci kanal SNG”, “Poyexali”, “Vremya: dalekoye və blizkoye”, “Dom kino”, “Telekafe”, “Dom kino – Premium”, "Muzıka pervoqo”, “Pobeda”, “Karusel”, “Bober” və “O!” telekanallarının Qazaxıstan boyunca yayımı dayandırılmış olub.
Məlumatda bu da qeyd olunur ki, rəhbərliyin qərarı ilə Qazaxıstan efirində informasiya yüklü xarici kanalların payı azldılacaq.
TVCOM izah edir ki, onun abunəçiləri “mediasavadlılığın yüksək həddinə çatıblar və xəbər informasiyalarını əsas etibarilə sosial şəbəkələrdən alırlar”.
Bundan əvvəlki bloklamalar
AzadlıqRadiosunun Qazax xidməti – Azattıq xatrırladır ki, TVCOM Qazaxıstanın milli teleradio yayımları operatoru “Kazteleradio” şirkətinin partnyorudur.
Azattıq yazır ki, noyabr ayında Qazaxıstanda Rusiya telekanallarına baxmaq imkanı verən Sputnik24 portalı bloklanıb.
Bu bloklamanın rəsmi səbəbi olaraq Qazaxıstan ərazisində milli lisenziyası olmayan kanalların yayımlanması göstərilmişdi.
Ötən ilin avqustunda Qazaxıstanda habelə İnformasiya və İctimai İnkişaf Nazirliyinin qərarı ilə Rusiyanın “Tsarqrad” telekanalı bloklanıb. Nazirlik bildirirdi ki, bu kanalın materiallarında ekstremizmin təbliğatı aparılır.
2022-ci ilin sonlarında Demoscope ictimai rəyi öyrənmə bürosu tərəfindən aparılmış sorğu qazaxıstanlıların təxminən beşdə birinin Rusiya telekanallarına baxdığını göstərmişdi.
