Rusiya prezidenti Vladimir Putinin bir vaxtlar Almaniya Demokratik Respublikası adlandırılan Şərqi Almaniya məxfi xidmətinin xəfiyyəsi olduğunu göstərən vəsiqə Drezden şəhərinin arxivində aşkar edilib.
Putin 1980-ci illərdə Drezdendə DTK zabiti kimi xidmət edib.
Almaniyanın Bild qəzeti dekabrın 11-də mayor Vladimir Putinə verilmiş vəsiqənin fotosunu dərc edib. Vəsiqənin üstündəki möhürdən onun 1989-cu ilin sonlarınadək etibarlı olduğu görünür.
Bu vəsiqə keçmiş Almaniya Demokratik Respublikasının həm də Ştazi adı ilə tanınan Dövlət Təhlükəsizliyi Nazirliyinin “kadrlar və təhsilə” aid sənədlərinin arasından tapılıb.
Ştazi arxivlərinin Drezden filialına rəhbərlik edən Konrad Felber deyib ki, bu vəsiqə Putinə Ştazinin ofislərinə maneəsiz daxil olmaq imkanı verirdi.
Felber əlavə edib ki, bu həm də Putinin almanları DTK-nın adını çəkmədən casusluq işi üçün ələ almasını asanlaşdırırdı.
Felber bunu da deyib ki, vəsiqə Putinin birbaşa olaraq Ştaziyə işlədiyi demək deyil.
Moskvada Kremlin sözçüsü Dmitry Peskov deyib ki, Putinin Ştazi vəsiqəsinə malik olması mümkündür:
"DTK və Ştazi tərəfdaş xidmətlər idilər. Buna görə də onların arasında kimliklərin mübadiləsini istisna etmək qeyri-mümkündür”.
Putin 1980-ci illərdə DTK zabiti kimi özünün ilk xarici missiyasına – bura, sosialist Şərqi Almaniyasının Drezden şəhərinə göndərilmişdi.
O burada özünün keçmiş arvadı Lyudmila Putina ilə beş il yaşamış və ikinci qızı 1986-cı ildə burada doğulmuşdu.