Keçid linkləri

Təcili xəbərlər
2020, 02 Dekabr, çərşənbə, Bakı vaxtı 23:23

'Oğlumun başına gələcəklərə görə Azərbaycan hakimiyyəti məsuliyyət daşıyır'


Rəhimə Hüseynova

Nardaran məhbusu Abbas Hüseynovun anası Rəhimə Hüseynova Penitensiar Xidmətin rəisi Ceyhun Həsənova müraciət edərək, oğluna qarşı işgəncələrin dayandırılmasını istəyib. Bu barədə AzadlıqRadiosuna Rəhimə Hüseynova özü bildirib.

Ana deyir ki, oğlunun aprelin 30-da onunla telefon söhbətində işgəncəyə məruz qalması haqda söylədiklərindən sonra Penitensiar Xidmətin əməliyyat-rejim idarəsinin rəisi Mirsaleh Seyidovla görüşmək üçün bu quruma gedib. Amma onun işdə olmadığını deyiblər. Rəhbər vəzifəli şəxslərdən kimsə ilə görüşə bilməsə də, Penitensiar Xidmətin rəisi Ceyhun Həsənova yazdığı məktubu təqdim edib.

***Buna da bax-Əli Kərimliyə təbrikə görə işgəncə?

«Mənim oğlum günahsızdır, şərlənərək həbs olunub. Heç olmasa, onun Qobustan həbsxanasında salamat yaşamasını təmin edin. Oğlum hər dəfə ağır işgəncələrə məruz qalanda səhhəti korlanır. Sabah oğlumun başına gələ biləcək arzuolunmaz hadisəyə görə Azərbaycan hakimiyyəti məsuliyyət daşıyır», – R.Hüseynova məktubunda belə yazıb.

«Söz verdi ki, Abbasla görüşəcək»

Ananın sözlərinə görə, mayın 1-də Ombudsman Aparatının və Beynəlxalq Qırmızı Xaç Komitəsinin Bakıdakı nümayəndəliyində də olub, şikayətini çatdırıb: «Beynəlxalq Qırmızı Xaç Cəmiyyətindən Yevgeni Korotkeviç söz verdi ki, yaxın günlərdə Qobustana gedəcəklər və mütləq Abbasın özü ilə də görüşəcəklər».

***Buna da bax-Arzu Abdullayeva: 'Əfsuslar olsun ki, işgəncə olub'

A.Hüseynov aprelin 30-da ailə üzvləri ilə telefon danışığında deyib ki, Qobustan həbsxanasında rəis müavini də daxil, 4-5 nəfər döyüb, üç gün əlləri qandallı vəziyyətdə cərimə kamerasında «kars»da saxlanılıb.

Penitensiar Xidmətin ictimaiyyətlə əlaqələr şöbəsinin rəisi Mehman Sadıqov isə AzadlıqRadiosuna açıqlamasında A.Hüseynovun döyülməsi barədə deyilənləri təkzib edib.

A.Hüseynov daha öncə də içəridə ona işgəncə verildiyini bildirmiş, vəkili Yalçın İmanov bu məlumatı ictimailəşdirdikdən sonra Vəkillər Kollegiyasından uzaqlaşdırılmışdı.

Xatırlatma

A.Hüseynov 2015-ci il noyabrın 26-da DİN-in Baş Mütəşəkkil Cinayətkarlıqla Mübarizə İdarəsinin Bakının Nardaran qəsəbəsində keçirdiyi əməliyyat zamanı həbs olunub və 20 il azadlıqdan məhrum edilib. Həmin əməliyyatda ikisi polis olmaqla, altı nəfər həlak olub.

Nardaranda və Sabunçu Rayon Polis İdarəsinin qarşısında baş verən hadisələrə görə 70-dən çox (hüquq müdafiəçilərinin siyahısında bu rəqəm 80-dən çox göstərilir) adam həbs olunub. Onların bir qisminə silah saxlama ittihamı ilə ilyarımdan 6 il 6 ayadək həbs cəzası kəsilib. 40 nəfərdən çox adama isə daha ağır maddələrlə (dövlət çevrilişinə cəhd, terrorçuluq, dini nifaq salma və s.) ittihamlar verilib.

Həbs olunanların işi üç qrupa ayrılıb. A.Hüseynov birinci qrupda «Müsəlman Birliyi» Hərəkatının sədri Taleh Bağırov və daha 16 nəfərlə birlikdə mühakimə olunub. Onlara 10 ildən 20 ilə qədər həbs cəzası verilib.

Nardaran olayları ilə bağlı həbs edilənlərin əksəriyyəti məhkəmələrində tutularkən və ilkin dindirilmədə ağır işgəncələrə məruz qaldıqlarını bildiriblər. Onlar verilən ittihamları qəbul etməyiblər.

Ancaq Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin və digər hüquq-mühafizə orqanlarının əməkdaşları məhkəmə prosesində işgəncə şikayətlərini təkzib ediblər.

XS
SM
MD
LG