ABŞ ədliyyə naziri bildirib ki, o xüsusi prokuror Robert Mueller-in hesabatının ictimaiyyət üçün nəzərdə tutulmuş versiyasını bir neçə həftə ərzində təqdim etməyi planlaşdırır.
Bu hesabata görə prezident Donald Trump-ın 2016-cı il seçki kampaniyası Rusiya ilə heç bir sövdələşməyə daxil olmayıb.
ABŞ dövlət strukturunda həm də Ədliyyə Nazirliyinin başçısı hesab edilən baş prokuror William Barr martın 24-də ABŞ Konqresinə Mueller hesabatının 4 səhifəlik xülasəsini təqdim etmişdi.
Lakin Barr bildirir ki, ona bu hesabatın nə qədərinin ictimaiyyətə açıqlana biləcəyini müəyyənləşdirmək üçün bir qədər vaxt lazımdır.
Ədliyyə Nazirliyinin adı çəkilməyən rəsmisi martın 26-da jurnlaistlərə deyib ki, Barr hesabatın ictimaiyyət üçün versiyasını “aylar yox, həftələr” ərzində açıqlamağa hazırlaşır.
Amma Konqres demokratları Barra hesabatı tam şəkildə təqdim etmək üçün aprelin 2-dək vaxt veriblər. Bu isə Ədliyyə Nazirliyinə hesabatın nəzərdən keçirilməsi üçün yalnız bir həftə vaxt tanıyır.
Mueller-in məxfi hesabatının bəzi hissələri gizli böyük jürinin dinləmələrindən qaynaqlanır. Federal qaydalar məhz belə informasiyanın ictimaiyyətə açıqlanmasını qadağan edir.
Bundan başqa hesabatda Mueller-in başqa ABŞ prokurorluqlarına davam edən cinayət araşdırmaları üçün təqdim etdiyi informasiyalar da var.
Barrın təqdim etdiyi xülasəyə görə Mueller-in 22 aylıq təhqiqatı Trump-ı və onun yaxın adamlarını seçkilərin nəticələrini dəyişmək məqsədilə Rusiya ilə sövdələşməyə girmək ittihamından azad edir.
Barr bildirib ki, hesabatın Trump-ın ədaləti əngəlləmək istəməsinə aid hissəsində daha az əminlik var.
Baş prokurorun xülasəsində deyilir ki, hesabat bu məsələdə Trump-ın cinayət törətdiyini aşkar etməsə də, onu təmizə də çıxarmır.
