Azərbaycan xəbərləri
MN: Kəlbəcərdə üç Azərbaycan əsgəri yaralanıb
Nazirlik hərbçilərin Ermənistan tərəfinin açdığı atəş nəticəsində yaralandığını, qarşı tərəf isə Azərbaycan hərbçilərinin döyüş mövqelərindən birinin arxa cəbhəsinə daxil olmağa cəhd etdiyini bildirir
Azərbaycanın Müdafiə Nazirliyi sentyabrın 23-də Ermənistan ərazisindən Kəlbəcərdəki mövqelərinin atəşə tutulduğunu və üç hərbçinin yaralandığını bildirir.
Sentyabrın 24-də yayılan məlumatda qeyd olunur ki, Azərbaycan ordusunun Kəlbəcərin İstisu və Zəylik yaşayış məntəqələrindəki mövqelərinin atəşə tutulması axşam saat 19:30-dan gecə 23:40-a qədər davam edib.
"Atəş nəticəsində Azərbaycan Ordusunun hərbi qulluqçuları Əmənullayev Rəşad Ağacan oğlu, Rəhimzadə Ruhid Oktay oğlu və Cavadov Rəvan Şəmsəddin oğlu yaralanıb.
Yaralı hərbi qulluqçularımıza dərhal ilkin tibbi yardım göstərilib. Onların həyatı üçün heç bir təhlükə yoxdur"-Nazirlik bildirir.
Məlumatda Azərbaycan ordusunun cavab tədbirləri gördüyü bildirilir və hadisəyə görə məsuliyyətin Ermənistanın hərbi-siyasi rəhbərliyinin üzərinə düşdüyü vurğulanır.
Ermənistan Müdafiə Nazirliyi isə atəşkəs pozuntusuna görə Azərbaycanı ittiham edir.
Nazirliyin sentyabrın 24-də yaydığı məlumatda qeyd olunur ki, sentyabrın 23-ü saat 19:30 radələrində Azərbaycan ordusunun bölmələrindən biri Ermənistan silahlı qüvvələrinin döyüş mövqelərindən birinin arxa cəbhəsinə daxil olmağa cəhd edib.
Qeyd olunur ki, Ermənistan silahlı qüvvələrinin cavab tədbirləri nəticəsində Azərbaycan hərbçiləri öz ilkin mövqelərinə geri atılıb.
"Sentyabrın 24-ü saat 10:00-a olan məlumata görə, vəziyyət nisbətən sabitdir”, - Ermənistan Müdafiə Nazirliyinin bəyanatında deyilir.
Sentyabrın 12-si gecə və 13-ü səhər saatlarında Azərbaycan -Ermənistan sərhəd bölgəsində silahlı toqquşma olub. Azərbaycan Müdafiə Nazirliyininin yaydığı ilkin məlumata görə, Ermənistan silahlı qüvvələri Azərbaycan dövlət sərhədinin Daşkəsən, Kəlbəcər, Laçın, Zəngilan istiqamətlərində genişmiqyaslı təxribatlar törədib və nəticədə Azərbaycan Silahlı Qüvvələrin 50 hərbi qulluqçusu həlak olub.
Amma sonrakı rəsmi açıqlamalarda həlak olan hərbçilərinin sayınin 77-yə çatdığı bildirilib və həmin hərçilərin siyahısı dərc edilib.
Öz növbəsində Ermənistan rəsmiləri də baş verənlərə görə, Azərbaycanı günahlandırıblar və atəşkəsin ilk olaraq Azərbaycan tərəfdən pozulduğunu bəyan ediblər. Hətta iddia olunub ki, bu döyüşlər nəticəsində Azərbaycan ordusu Ermənistan ərazisinə daxil olub.
Ermənistanın baş naziri sərhəd toqquşmasında 105 hərbçi itirdiklərini bildirib. Amma indiyə qədər bununla bağlı hər hansı siyahı açıqlanmayıb. Sentyabrın 14-də Azərbaycan birtərfəli qaydada qarşı tərəfə 100-ə qədər hərbçinin cəsədini verməyə hazır olduğunu bildirb. Rəsmi məlumatla görə, indiyə qədər Azərbaycan Ermənistana 133 hərbçinin cəsədini qaytarıb.
Sentyabrın 21-də Laçın rayonunda səfərdə olan Azərbaycan prezidenti İlham Əliyev Azərbaycan ordusunun sərhədləri pozması ilə bağlı Ermənistan rəsmilərinin səsləndirdiyi fikirlərə belə reaksiya verib.
"...bizim sərhədimizin delimitasiyası keçirilmədən heç kim deyə bilməz sərhəd haradan keçir. Mən yenə də deyirəm, biz müzakirələrə hazırıq və delimitasiya komissiyalarının - Azərbaycan-Ermənistan komissiyalarının işinə məsuliyyətlə yanaşırıq. Bütün xəritələri toplamışıq. Bir daha demək istəyirəm ki, bütün xəritələr, o cümlədən XIX əsrə, XX əsrə, ondan əvvəlki dövrə aid olan xəritələr bizdədir və o xəritələr açıq-aydın göstərir, kim hansı torpaqda yerləşibdir. Ona görə delimitasiya aparılmadan bizi heç kim ittiham edə bilməz"-İlham Əliyev bildirib.
Xatırlatma
Azərbaycan 2020-ci ildə 44 günlük savaş nəticəsində Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağdakı təmas xəttində Rusiya sülhməramlıları yerləşdirilib.
Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qalıb. Amma, hələlik, tərəflər arasında sülh sazişi imzalanmayıb.
Azərbaycan və Ermənistan liderləri bu il Şarl Mişelin vasitəçiliyi ilə üç görüş keçiriblər. 31 avqust görüşündə iki ölkənin xarici işlər nazirlərinə sülh sazişinin mətni üzərində işləmək tapşırılıb.
Bütün xəbərləri izləyin
Özbəkistan Azərbaycanla birgə yanacaq istehsalını müzakirə edir
Daşkənd və Bakı Özbəkistan bazarı üçün avtomobil və aviasiya yanacağının birgə istehsalını müzakirə edirlər. Neft və neft məhsullarının uzunmüddətli tədarükü də danışıqlar mövzusudur. Xəbəri AzadlıqRadiosunun Orta Asiya üzrə rusdilli bölməsi olan “Azattyq Asia” yayıb.
Özbəkistanın energetika naziri Şerzod Xocayev bildirib ki, bir variant yanacağın həm Özbəkistanın, həm də Azərbaycanın neft emalı müəssisələrində istehsalıdır. Daşkənd Azərbaycana bu cür əməkdaşlıqla bağlı bir neçə variant təklif edib.
Energetika Nazirliyinin məlumatına görə, tərəflər neft və neft məhsullarının uzunmüddətli tədarükünü, karbohidrogen xammalının birgə emalını, texnologiya mübadiləsini və dayanıqlı logistika zəncirlərinin yaradılmasını da nəzərdən keçirirlər.
Sentyabrın ilk ongünlüyündə Xocayevin rəhbərlik etdiyi nümayəndə heyətinin Azərbaycana səfəri planlaşdırılır. Azərbaycan Energetika Nazirliyi və SOCAR-la danışıqlar aparılacaq. Danışıqlarda Azərbaycan prezidenti İlham Əliyevin bu yaxınlarda Daşkəndə səfəri, Özbəkistan prezidenti Şavkat Mirziyoyevlə əldə edilmiş razılaşmaların icrası müzakirə olunacaq.
Özbəkistan neft məhsullarının idxalından çox asılıdır. Əsas tədarükçülərdən biri Rusiyadır. Ukrayna dronlarının Rusiyadakı neft emalı zavodlarına zərbələri bu ölkədə də yanacaq çatışmazlığı yaradıb. Moskvanın yanacaq ixracına qadağa qoyması fonunda Özbəkistan, Orta Asiyada Rusiya tədarükündən asılı digər ölkələri alternativ mənbələr axtarışını gücləndiriblər.
Bundan əvvəl Gürcüstan və İraqdan aviasiya kerosininin tədarükünə başlanması barədə məlumat verilmişdi. “Özbəkneftqaz” Çin şirkətləri ilə Jet A-1 markalı aviasiya yanacağının uzunmüddətli tədarükünü də müzakirə edib.
Qardaşı Elmir Sadıqovun həbsdə səhhətinin pisləşdiyini deyir
Bloqer Tural Sadıqlının qanunsuz silah-sursat saxlama ittihamı ilə 2 il 6 ay həbs edilən əmisi Elmir Sadıqovun həm cərimə kamerasında saxlandığı, həm də səhhətində ciddi problemlər yarandığı bildirilir.
Bu barədə onun qardaşı Əlövsət Sadıqlı məlumat yayıb.
Onun vurğulamasına görə, qardaşının qara ciyərində problem yaranıb, bədənin aşağı nahiyələri də şişib:
“Avqustun 25-də öyrəndim ki, 16 saylı cəzaçəkmə müəssisəsində təyin edilmiş karser (cərimə kamerası) cəzasının müddəti köçürüldüyü Bakı İstintaq Təcridxanasında bitir. Ərzaq və dərman tədarükü edib, avqustun 26-da təcridxanaya – qardaşım Elmir Sadıqovla görüşə getdim, amma nə apardıqlarımı götürdülər, nə də görüş verdilər. Dedilər ki, yenidən “karser” cəzası verilib”.
Əlövsət Sadıqlının dediyinə görə, təcridxananın rəisi ilə görüşmək istəsə də bu cəhdi baş tutmayıb, nəticədə sovqatı belə çatdıra bilməyib.
Hələlik, bu açıqlamaya Bakı İstintaq Təcridxanasından və başqa cavabdeh qurumdan münasibət almaq mümkün olmayıb. Amma Penitensiar Xidmətdən bundan öncə oxşar şikayətlərlə bağlı bildirilib ki, məhkumlarla yalnız qanun çərçivəsində davranırlar.
Elmir Sadıqov ötən ilin aprelində həbs edilib. Onun avtomobilində qumbara tapıldığı bildirilib. Həmin il oktyabrın 1-də Sabunçu rayon Məhkəməsində ona 2 il yarım həbs cəzası verilib.
E.Sadıqovun yaxınları isə onun xaricdə olan qardaşı oğlu, bloqer Tural Sadıqlının tənqidi çıxışlarına görə şərləndiyini hesab edirlər. Amma rəsmilər ölkədə siyasi məhbusların olması fikrini qəbul etmirlər.
İyulun sonunda vəkil Nazim Musayev 16 saylı Cəzaçəkmə Müəssisəsində təzyiqlə üzləşdiyini, müəssisə əməkdaşlarının onu zorla bir otaqda saxladığını, sənədlərinin əlindən alındığını açıqlamışdı. Onun sözlərinə görə, bütün bunlar iyulun 28-də hüquqlarını müdafiə etdiyi Elmir Sadıqov ilə görüşdən sonra yaşanıb. Vəkil müvəkkilinin son bir ay ərzində davamlı cərimə kamerasında (kars) saxlanması ilə bağlı məlumatları araşdırmaqdan ötrü cəzaçəkmə müəssisəsinə getdiyini deyirdi.
Bəhruz Səmədov darısqallıqdan və lazımı müalicə almamasından şikayətlənir
Həbsdə olan politoloq Bəhruz Səmədov saxlanma şəraiti və səhhətindən şikayət etməyə davam edir.
Bu barədə avqustun 26-da onun yaxınları Səmədova istinadən məlumat yayıb.
Yaxınlarının vurğulamasına görə politoloq belə bir şikayətinin yayılmasını istəyib:
"Məni cəmi 6 addımlıq otaqda saxlayırlar. Bir insan 1 il ərzində televizorsuz nə qədər belə dar otaqda yaşaya bilər? Bunların məqsədi məni psixoloji, həm də fiziki məhv etməkdir", - B.Səmədov bildirib.
O, xatırladıb ki, bir müddət əvvəl həbsxanada onu gözündəki problemlə bağlı oftalmoloq müayinə edib, lakin sadəcə göz damcısı verməklə kifayətlənib. Onun sözlərinə görə, oftalmoloq da onun bu cür şəraitdə saxlanılmasının görmə qabiliyyəti üçün pis olduğunu deyib.
B.Səmədov dəri xəstəliyindən də əziyyət çəkdiyini diqqətə çatdırıb.
O, əvvəllər də saxlanma şəraitinin pisliyindən və tibbi xidmətlərə çıxış imkanının məhdudluğundan şikayət edib. O, yetərincə Günəş şüası qəbul etmədiyinə görə dərisində ekzema xəstəliyinin gücləndiyini bildirib.
Hələlik, bu açıqlamaya Penitensiar Xidmət və başqa aidiyyatı qurumlardan münasibət almaq mümkün olmayıb.Lakin Penitensiar Xidmətdən bundan öncə oxşar şikayətlərlə bağlı iddia ediblər ki, cəzaçəkmə müəssisələrində məhbuslara qanunverciliyin tələblərinə cavab verən şərait yaradılıb və onlar bütün lazımı xidmətlərdən yararlana bilirlər.
13.082026
Bəhruz Səmədov həbsini sülh gündəliyinə zidd sayır
Həbsdə olan politoloq Bəhruz Səmədov görmə qabiliyyətinin zəiflədiyini bildirərək beynəlxalq ictimaiyyəti onun azadlığa buraxılması üçün daha fəal olmağa çağırıb.
Səmədovun Umbakı Penitensiar Kompleksindən göndərdiyi müraciəti yaxınları sosial şəbəkələrdə yayıblar. O, müraciətində həbsdə saxlanılmasını sülh gündəliyinə zidd hesab etdiyini bildirib: "Vaşinqton razılaşmasından artıq bir il keçməsinə baxmayaraq, onun bəndlərinin kobud şəkildə pozulması fonunda və sülh gündəliyinə tam zidd olaraq, mən hələ də hər cür məhrumiyyətlər altında həbsdə saxlanılıram. Gözlərimlə əlaqədar hələ də yanıma həkim gəlməyib. Kor olmaq dərəcəsindəyəm…".
Bu müraciətə rəsmi qurumlardan münasibət almaq mümkün olmayıb.
10 iyul
Yaxınları: Bəhruz Səmədovun gözləri xeyli zəifləyib
Həbsdə olan politoloq Bəhruz Səmədovun gözlərinin zəiflədiyi bildirilir.
Bu barədə Səmədovla görüşən vəkilinə istinadən onun yaxınları məlumat yayıb.
Onların vurğulamasına görə, qapalı yerdə saxlanılması politoloqun səhhətinə pis təsir edir və bu səbəbdən gözləri xeyli zəifləyib.
Bu açıqlamaya Penitensiar Xidmətdən münasibət almaq mümkün olmayıb.
Son vaxtlar həbsdə olan bir çox ictimai fəal və jurnalistin səhhətinin pisləşməsinə dair tez-tez açıqlamalar eşidilir. Onlar iddia edirlər ki, Penitensiar Xidmətin müəssisələrində lazımi müayinə və müalicə imkanları yoxdur.
Hərçənd cavabdeh rəsmi qurumlar bu cür dəyərləndirmələrlə razılaşmırlar.
Çexiyanın Karlov Universitetinin doktorantı olan B.Səmədov Dövlət Təhlükəsizliyi Xidmətinin (DTX) əməkdaşları tərəfindən 2024-cü il avqustun 21-də saxlanılıb. O, 2025-ci il iyunun 23-də Bakı Ağır Cinayətlər Məhkəməsinin hökmü ilə dövlətə xəyanət ittihamı əsasında 15 il müddətinə azadlıqdan məhrum edilib. İstintaqın versiyasına görə, o, Ermənistanın xüsusi xidmət orqanları ilə əməkdaşlıq edib.
B.Səmədov isə özünə qarşı irəli sürülən ittihamları tamamilə rədd edərək, dövlətlər arasında müharibəyə və bunun nəticəsində dinc insanların həlak olmasına qarşı olduğunu vurğulayıb.
Qarabağ münaqişəsi səbəbindən Azərbaycan və Ermənistan arasında 30 ildən çox davam edən gərginlikdən sonra tərəflər ötən il Vaşinqtonda sülh sazişini paraflayıblar. Həmin sənəddə tərəflərin qarşılıqlı şəkildə bir-birinin ərazi bütövlüyü və suverenliyini tanıdıqları əks olunub. Artıq tərəflər arasında yükdaşımalar da bərpa edilib.
Gələn həftədən çaylardan, göllərdən istifadə ödənişli olacaq - Məbləğlər
Sentyabrın 1-dən su obyektlərindən xüsusi məqsədlər üçün istifadə ilə bağlı ödənişlərin tətbiqinə başlanılacaq.
Ölkə başçısı ötən ilin dekabrında “Su obyektlərindən xüsusi məqsədlər üçün istifadəyə icazənin verilməsi Qaydası”nın təsdiq edilməsi haqqında fərman imzalamışdı.
Həmin fərmanın icrası ilə də bağlı Baş nazir Əli Əsədov bu il aprelin 14-də qərar verib.
Qərar hüquqi şəxslərin, sahibkarlıq fəaliyyəti ilə məşğul olan fiziki şəxslərin texniki qurğu, avadanlıq tətbiq etməklə su obyektlərindən suyun götürülməsi, tullantı sularının təmizlənərək su obyektlərinə axıdılması və su akvatoriyasından istifadə olunması ilə əlaqədardır.
Su obyektindən və götürülmə məqsədindən asılı olaraq məbləğlər müxtəlifdir.
Məsələn, sənaye məqsədilə Xəzər dənizindən götürülən 100 kubmetr suya görə 0.4, çaylardan, göllərdən (eyni həcimdə) 4, yeraltı sulardan (yenə eyni həcimdə) suya görə 40 manat müəyyənləşdirilib. Xəzər dənizinə axıdılan 100 kubmetr tullantı suyu üçün 1, çay və göllərə axıdılan 100 kubmetr tullantı suyu üçün 4 manat nəzərdə tutulur.
Su obyektlərindən xüsusi məqsədlər üçün istifadəyə icazənin alınması ilə bağlı Azərbaycan Dövlət Su Ehtiyatları Agentliyinə ərizə ilə müraciət edilməlidir.
Çay və göllərdən suyun istifadəsinin pullu olması heç də cəmiyyətdə birmənalı qarşılanmayıb. Bunun fərdi təsərrüfatla məşğul olan bir sıra insanların fəaliyyətinə mənfi təsir göstərəcəyi güman edilir.
Amma rəsmilər də su ehtiyatlarından daha səmərəli istifadəni vacib sayırlar.
Bu ildən Azərbaycanda özəl sektor gəlir vergisinə cəlb edilib, bir sıra sahələr üzrə cərimə və rüsumlar da artıb. Ekspertlər ilin əvvəlində bunu ölkənin əsas gəlir mənbəsi olan neft istehsalının azalması ilə izah edirdilər. Hərçənd, bu il Yaxın Şərqdə gərginliyin artması neftin kəskin bahalaşmasına səbəb olub.
Səhiyyə Nazirliyi qarayara ilə bağlı: Avqustun 15-dən yeni yoluxma qeydə alınmayıb
Azərbaycan Səhiyyə Nazirliyi bu gün, avqustun 21-də bildirib ki, Samux rayonunda qarayara ilə bağlı epidemioloji vəziyyət stabildir.
Qurum vurğulayıb ki, avqustun 15-dən yeni yoluxma qeydə alınmayıb və xəstəliyin əhali arasında yayılması müşahidə olunmur.
Qurum bundan əvvəl avqustun 13-də, açıqlamışdı ki, xəstəliyə şübhəli ilk şəxsdən götürülmüş materialının laborator müayinəsi nəticəsində "qarayara xəstəliyi" diaqnozu qoyulub. Xəstə heyvanla tmasda olmuş əlavə 9 nəfərdən laborator müayinə üçün nümunələr toplanıb və Şəmkir Regional Xüsusi Təhlükəli İnfeksiyalara Nəzarət Mərkəzinə göndərilib.
“Hazırda xəstəlik aşkarlanmış şəxslər tibb müəssisəsində müvafiq müalicə alır, xəstəliklə təmasda olmuş digər şəxslər üzrə isə zəruri tibbi müşahidə və tədbirlər həyata keçirilib. Təmasda olan şəxslər arasında yeni yoluxma halı müəyyən edilməyib.”, Səhiyyə Nazirliyi avqustun 21-də əlavə edib.
Vurğulandığına görə, Səhiyyə Nazirliyi epidemioloji vəziyyətə nəzarəti davam etdirir.
Hələlik, rəsmi açıqlamaya qarayara xəstəliyi diyaqnozunun qoyulduğu şəxslərin yaxınlarından və başqa alternativ mənbələrdən münasibətini almaq mümkün olmayıb.
13.08.2026
Samuxda qarayara aşkarlanıb
Azərbaycanın Samux rayonunda qarayara xəstəliyi qeydə alınıb. Bu barədə avqustun 13-də Səhiyyə Nazirliyi, Azərbaycan Qida Təhlükəsizliyi Agentliyi (AQTA) və Tibbi Ərazi Bölmələrini İdarəetmə Birliyi (TƏBİB) birgə məlumat yayıb.
Məlumatda qeyd edilir ki, ilkin epidemioloji araşdırmalara əsasən, xəstəliyə şübhəli bilinən şəxslərin iribuynuzlu heyvanlarla təmasda olduğu müəyyən edilib.
Açıqlamaya görə, xəstəliyə şübhəli ilk şəxsdən götürülmüş müayinə materialının laborator müayinəsi nəticəsində "qarayara xəstəliyi" diaqnozu qoyulub.
Qeyd olunub ki, hazırda təmasda olan şəxslər müəyyənləşdirilib, tibbi müşahidəyə cəlb edilib və hər hansı dəri yarası olan şəxslərdən laborator müayinələrin aparılması üçün nümunələr toplanıb: "Xəstə heyvanla təmasda olan doqquz nəfər şəxs aşkarlanaraq Abbas Səhhət adına Gəncə Şəhər Birləşmiş Xəstəxanasının yoluxucu xəstəliklər şöbəsində izolyasiya edilib. Xəstəliklə təmasda olan şəxslər əsasən Samux rayon sakinləridir. Həmin şəxslərdən laborator müayinə üçün nümunələr toplanıb və Şəmkir Regional Xüsusi Təhlükəli İnfeksiyalara Nəzarət Mərkəzinə göndərilib".
Məsələyə həmin şəxslərin yaxınlarından açıqlama almaq mümkün olmayıb.
Qarayara, əsasən, xəstə və ya tələf olmuş heyvanlarla, eləcə də onların yoluxmuş toxumaları və məhsulları ilə təmas nəticəsində insana keçən zoonoz xəstəlikdir.
Xəstəliyin insandan-insana ötürülməsinin nadir hallarda baş verdiyi bildirilir.
"Vətəndaşlara xəstə, tələf olmuş heyvanlarla və şübhəli heyvan mənşəli məhsullarla təmasdan çəkinmək, xəstəliyə şübhə yaradan əlamətlər müşahidə etdikdə isə vaxtında tibb müəssisəsinə müraciət etmək tövsiyə olunur", - rəsmi açıqlamada vurğulanır.
Xatırlatma
Qarayara və ya Sibir yarası— kəskin zoonoz yoluxucu seroz-hemorragik və nekrotik iltihabın inkişafı ilə xarakterizə olunan xəstəlikdir. O, lokallaşmış (dəridə) və yayılmış (septik) formalarda kəskin nəzərə çarpan intoksikasiya sindromu ilə cərəyan edir. Bəzən bu xəstəliyi "bədxassəli çiban" da adlandırırlar.
Bu xəstəlik insanlara qədimdən bəllidir.
2025-ci il üzrə Azərbaycanda nə qədər adamın qarayara xəstəliyinə tutulduğu açıqlanmayıb. 2024-cü ildə bu rəqəmin 22, ondan bir il əvvəl isə 14 olduğu açıqlanmışdı.
Müdafiə Nazirliyinin keçmiş komissiya rəisi azadlığa buraxılıb. Prokurorluq protest verəcək
Müdafiə Nazirliyinin Mərkəzi hərbi həkim komissiyasının sabiq rəisi Rasim Həsənovun cinayət işi üzrə məhkəmə prosesi yekunlaşıb.
Ölkənin yerli saytlarının xəbərinə görə, Bakı Hərbi Məhkəməsində hakim Anar Rzayevin sədrliyi ilə keçirilən prosesdə hökm oxunub.
Hökmə əsasən, Rasim Həsənovun ittiham olunduğu maddələr dələduzluq maddəsinə tövsif olunub. Ona 5 min manat cərimə cəzası tətbiq olunub və məhkəmə zalından azadlığa buraxılıb.
Baş Prokurorluq isə bu hökmdən apelyasiya protestinin veriləcəyini bildirib.
Qurumun yaydığı məlumata görə, məhkəmədə prokuror Rasim Həsənovun 3 il müddətinə dövlət və yerli özünüidarəetmə orqanlarında rəhbər və maddi-məsul vəzifə tutma hüququndan məhrum edilməklə 10 il müddətinə azadlıqdan məhrum edilməsini təklif edib.
“Hökm dövlət ittihamçısına təqdim edildikdən sonra apellyasiya verilməsi məsələsi həll ediləcək”, – qurum bildirir.
Hələlik, Baş prokurorlugun açıqlamasına Rasim Həsənov və onun vəkilindən münasibət almaq mümkün olmayıb.
02.04.2026
Müdafiə Nazirliyinin həkim komissiyasının keçmiş rəisi hakim önünə çıxarılır
Azərbaycan Müdafiə Nazirliyinin Mərkəzi hərbi həkim komissiyasının keçmiş rəisi ilə bağlı cinayət işi məhkəməyə göndərilib. Bu barədə bu gün, aprelin 2-də Baş Prokurorluq məlumat yayıb.
Məlumata görə, Rasim Həsənovun komissiyasının rəisi vəzifəsində işlədiyi dövrdə vətəndaşlardan müxtəlif məbləğlərdə rüşvət alması ittihamı üzrə Korrupsiyaya qarşı Mübarizə Baş İdarəsində başlanmış cinayət işinin istintaqı yekunlaşdırılıb.
"Rasim Həsənovun 2021-2025-ci illərdə... hərbi qulluqçuların şəhadətləndirilərək tərxis olunmaları üçün ayrı-ayrı şəxslərdən müxtəlif məbləğlərdə pul vəsaitini rüşvət qismində təkrarən almasına və vəzifə saxtakarlığı törətməsinə əsaslı şübhələr müəyyən edilib", - məlumatda vurğulanır.
R.Həsənov Cinayət Məcəlləsinin 311.3.2, 311.3.3 (təkrarən külli miqdarda rüşvət alma), 313 (vəzifə saxtakarlığı) və 341.2.3-cü (ağır nəticələrə səbəb olan vəzifə səlahiyyətlərindən sui-istifadə etmə) maddələri ilə ittiham edilir. Həmin ittihamlarla ona 12 ilədək həbs cəzası verilə bilər.
Cinayət işi baxılması üçün aidiyyəti üzrə Bakı Hərbi Məhkəməsinə göndərilib.
R.Həsənov barəsində ötən il həbs-qətimkan tədbiri seçilib.
İttihama R.Həsənov və onun yaxınlarından münasibət almaq mümkün olmayıb.
Xatırlatma
Azərbaycanda müxtəlif dövlət qurumlarında vəzifəli şəxslərin tez-tez rüşvət və korrupsiya ittihamları ilə məsuliyyətə cəlb edilmələri ilə bağlı rəsmi açıqlamalar yayılır. Amma bəzi ekspertlər hesab edir ki, ölkədə korrupsiya ilə köklü mübarizədən çox onun imitasiyası yaradılır. Onlar qeyd edirlər ki, belə işlərdə verilən cəzalar da, əsasən, ya ittihama adekvat olmur, ya da sonradan yüngülləşdirilir.
Lakin rəsmi şəxslər də tez-tez vurğulayırlar ki, ölkədə korrupsiya ilə real mübarizədə hakim iradə mövcuddur.
Azərbaycan CNN-i məhkəməyə verib
Azərbaycan ABŞ-nin CNN telekanalını böhtana görə məhkəməyə verib. Azərbaycan bildirir ki, telekanal ölkənin İsrailə öz ərazisindən hərbi əməliyyatlar aparmağa icazə verməsi haqda yalan məlumat yaymaqla Azərbaycanı İranın hədəfinə çevirib.
İddia CNN-in iyunun 5-də dərc etdiyi məqalə ilə bağlıdır. Məqalədə deyilirdi ki, İsrail kəşfiyyat aparmaq və hücumlar həyata keçirmək üçün Azərbaycana xüsusi təyinatlı qüvvələr yerləşdirib. CNN iddia edib ki, bu əməliyyatlar arasında martın 4-də İran İslam İnqilabı Keşikçiləri Korpusunun (SEPAH) kəşfiyyat rəhbərinin öldürüldüyü hücum da olub.
İddia ərizəsində deyilir ki, məqaləni əvvəllər də Azərbaycana qarşı qərəz nümayiş etdirmiş jurnalist yazıb və CNN bundan “tam xəbərdar olub”. Azərbaycan tərəfi hesab edir ki, bu hal yalan məlumatların qəsdən yayıldığını göstərir.
Azərbaycan bu məlumatlara etiraz edəndə CNN əvvəlcə “məsələni araşdıracağına söz verib, daha sonra isə tamamilə susub”, iddia ərizəsində vurğulanır.
CNN-in sözçüsü “Bloomberg Law”ya elektron məktubda bildirib ki, telekanal yayımladığı məlumatın arxasında dayanır.
“Bloomberg Law” yazır ki, Delaver dairəsi üzrə ABŞ Federal Məhkəməsində baxılan bu mübahisə Delaverdə qaldırılmış siyasi çalarları olan böhtan işlərinin ən yenisidir. Delaver bir çox iri media təşkilatının hüquqi qeydiyyat ünvanıdır və səs-küylü böhtan iddiaları burada qaldırılır.
Bu göstəriciyə görə Azərbaycanda həyat səviyyəsi aşağıdır
Azərbaycan vətəndaşlarının çəkdiyi xərcin yarıdan çoxu yemək-içməklərinə gedib.
Dövlət Statistika Komitəsinin (DSK) bu gün, avqustun 13-də yaydığı məlumata görə, 2026-cı ilin yanvar-iyul aylarında pərakəndə ticarət şəbəkəsində istehlakçılara 38 milyard 358.5 milyon manatlıq mal satılıb. Onun 20 milyard 843.9 milyon manatı ərzaq məhsulları, içkilər və tütün məmulatları, 17 milyard 514.6 milyon manatı isə qeyri-ərzaq mallarıdır.
2025-ci ilin yanvar-iyul ayları ilə müqayisədə pərakəndə ticarət dövriyyəsi real ifadədə 3.8 faiz, o cümlədən ərzaq məhsulları, içkilər və tütün məmulatları 1.4, qeyri-ərzaq malları üzrə 6.6 faiz artıb.
Müstəqil iqtisadçılar deyir ki, bu göstəricilərə görə, Azərbaycan həyat səviyyəsi aşağı olan ölkələrlə müqayisə edilə bilər. Onlar vurğulayırlar ki, xərclərin təxminən yarısının ərzağa sərf olunması əhalinin həyat səviyyəsinin aşağı olmasının, kasıb və ya inkişaf etməkdə olan ölkələrə xas göstəricinin əsas əlamətidir
Xərclərdə ən çox artım kompüterlər, telekommunikasiya avadanlıqları və çap məhsullarının alışındadır. 32.1 faiz artımın olduğu bu sahəyə 548.3 milyon manat xərc çəkilib. Əczaçılıq məhsulları və tibbi ləvazimatlar xərclərində də ciddi artım var (23.8 faiz ). Ümumilikdə isə, bu sahədə xərclər 1 milyard manatı keçib.
Amma rəsmilər ölkədə həyat səviyyəsinin aşağı olması ilə bağlı dəyərləndirmələri qəbul etmirlər. Hərçənd müstəqil iqtisadçılar da buna cavab olaraq vurğulayırlar ki, Azərbaycan maaş və pensiyaların məbləğinə görə nəinki inkişaf etmiş, hətta bir çox region ölkələrindən də geridə qalır. Onlar, üstəlik, əlavə edirlər ki, Azərbaycanda bir çox mal və məhsulların, xüsusilə də dərmanların qiyməti qonşu ölkələrlə müqayisədə yüksəkdir.
Azərbaycanda vergi cinayətləri 50 faizdən çox artıb
2025-ci ildə Azərbaycanda vergi hüquqpozmaları ilə bağlı 2 min 131 cinayət işi icraatda olub.
Bu barədə Dövlət Vergi Xidmətinin avqustun 11-də açıqladığı illik hesabatda bildirilir. Bu göstərici 2024-cü illə müqayisədə 53.9 faiz artıb.
Hesabat dövründə başa çatmış cinayət işləri üzrə vurulmuş ziyan 202.7 milyon manat təşkil edib. Həmin cinayət işləri üzrə dövlət büdcəsinə 156 milyon manat ödənilib.
Ötən il başlanmış cinayət işlərinin əksəriyyəti vergi, işsizlikdən sığorta, icbari tibbi sığorta və ya məcburi dövlət sosial sığorta haqlarının ödənilməsindən yayınma halları ilə bağlı olub.
İl ərzində yeddi şəxs barəsində həbs-qətimkan tədbiri seçilib.
Vergi borcu da artır
Bu il iyulun 1-nə Azərbaycanda vergi borcları 4 milyard 50.4 milyon manat təşkil edib.
Bu barədə Maliyyə Nazirliyinin bugünlərdə yayılan illik hesabatında bildirilir. Sənədə əsasən, bu, yanvarın 1-i ilə müqayisədə 741.6 milyon manat və yaxud 22.4 faiz çoxdur.
Son bir ildə isə ölkədə vergi borcları 556.7 milyon manat və yaxud 15.9 faiz artıb.
Müstəqil iqtisadçılar bütün bunları iqtisadi durğunluq və hökumətin yanlış vergi siyasəti ilə izah edirlər. Bu ildən bir sıra sahələrdə vergi və rüsumlar artırılıb. Eləcə də qeyri-dövlət sektorunda çalışanlar gəlir vergisinə cəlb edilib.
Ayxan İsrafilov da azadlığa çıxıb
"İşçi Masası" Həmkarlar İttifaqları Konfederasiyası İdarə Heyətinin üzvü Ayxan İsrafilov üçillik həbs cəzasını başa vuraraq azadlığa çıxıb.
A.İsrafilov 2023-cü ilin avqustunda saxlanmışdı. O, Cinayət Məcəlləsinin (CM) 234.1-1-ci (narkotik vasitələri saxlama və yayma) maddəsi ilə 2024-cü il aprelin 2-də Bakı Ağır Cinayətlər Məhkəməsində 3 il müddətinə azadlıqdan məhrum edilmişdi. O, ittihamı rədd edirdi.
Bir həftə öncə - avqustun 4-də təşkilatın digər üzvü, işçi hüquqları fəalı Elvin Mustafayev də 3 illik həbs cəzasını başa vuraraq azadlığa buraxılıb. O da özünə qarşı irəli sürülən narkotik ittihamını qurama hesab sayırdı.
"İşçi Masası" 2022-ci ildə işçi hüquqlarının müdafiəsi məqsədilə yaradılmış müstəqil təşkilatdır. Təşkilat, əsasən, kuryerlərin və digər xidmət sektoru işçilərinin hüquqlarının müdafiəsi ilə məşğul olub. Onun bir neçə üzvü müxtəlif vaxtlarda cinayət məsuliyyətinə cəlb edilib.
Hazırda "İşçi Masası"nın sədri Afiyəddin Məmmədov və digər üzvü Möhyəddin Orucov hələ də həbsdədir.
A.Məmmədova CM-in 126.2.4-cü (xuliqanlıq niyyəti ilə qəsdən bədənə ağır xəsarət yetirmə) və 221.3-cü (silah qismində əşyadan istifadə etməklə xuliqanlıq) maddələri ilə ittiham verilib. Həmin ittihamlarla ona 8 il həbs cəzası kəsilib. Onun həbs müddətinin başa çatmasına təxminən 5 il qalır.
M.Orucovun cəza müddəti isə bu il başa çatmalıdır. 2023-cü il dekabrın 13-də saxlanılan fəala qarşı Cinayət Məcəlləsinin 234.4.3-cü (Qanunsuz olaraq narkotik vasitələri... hazırlama, istehsal etmə, əldə etmə,...) maddəsi ilə ittiham irəli sürülüb. Ötən il fevralın 25-də Bakı Ağır Cinayətlər Məhkəməsində M.Orucova 3 il hökm oxunmuşdu.
Onlar da ittihamları qurama, siyasi sayırlar. Hərçənd, rəsmilər ölkədə siyasi həbslərin olması ilə bağlı dəyərləndirmələri qəti təkzib edirlər.
Azərbaycanda buğda istehsalı azalıb
Azərbaycanda buğda istehsalı azalmaqda davam edir. Bu barədə bu gün, avqustun 11-də Dövlət Statistika Komitəsinin (DSK) yaydığı məlumatda bildirilib.
2026-cı il avqustun 3-nə olan məlumata görə, payızlıq-yazlıq dənli və dənli-paxlalı (qarğıdalısız) bitkilər üzrə biçilməsi nəzərdə tutulmuş 994.9 min hektar sahənin 925.1 min hektarı, yəni 93 faizi biçilib. Sahələrdən 3 milyon 131.9 min ton məhsul toplanıb, hər hektardan orta məhsuldarlıq 33.9 sentner olub. Yığılmış məhsulun 1 milyon 534.8 min tonu (49 faizi) buğdanın, 1 milyon 561.2 min tonu (49.9 faizi) arpanın payına düşüb.
Ötən ilin eyni dövrü (5 avqust 2025-ci il) ilə müqayisədə ümumi məhsul yığımı 6.2 faiz, o cümlədən arpa istehsalı 15.9 faiz çox, buğda istehsalı isə 2.1 faiz azdır.
"Buğda üzrə yığımın nisbətən az olması bu tarixə biçilmiş sahənin (420.7 min hektar) ötən illə müqayisədə azalması (2025-ci ildə 466,9 min hektar) ilə izah olunur. Hər hektardan məhsuldarlıq isə 33.6 sentnerdən 36.5 sentnerə yüksəlib", - DSK izah edib.
DSK-nın əvvəlki məlumatlarına nəzər yetirilsə, bəlli olar ki, son illər ölkədə buğda istehsalında davamlı azalma var. Məsələn, ötən il bu azalmanın 4.5 faiz olduğu bildirilir.
Ekspertlər bunu ölkədə taxılçılığın durumunun pisləşməsi, xüsusilə də inhisarçılığın yaranması ilə izah edirlər. Amma rəsmilər vurğulayır ki, kənd təsərrüfatına Azərbaycanda subsidiyalarla dövlətin ciddi dəstəyi var.
Azərbaycan özünü tam ərzaq buğdası ilə təmin edə bilmir.
Zamin Salayev azadlığa çıxıb
Azərbaycan Xalq Cəbhəsi Partiyası (AXCP) fəalı Zamin (Əlizamin) Salayev 3 il 6 aydan sonra azadlığa çıxıb. Bu barədə siyasi fəallar sosial şəbəkədə paylaşım ediblər.
Salayev 2023-cü il mayın 22-də Qaradağ rayon Məhkəməsinin hökmü ilə 4 il müddətinə azadlıqdan məhrum edilmişdi. O, həmin il fevralın 7-də saxlanılıb və Cinayət Məcəlləsinin 221.3-cü (silah və ya silah qismində əşya tətbiq etməklə xuliqanlıq) maddəsi ilə ittiham olunub. AXCP fəalı ittihamı qəbul etmirdi.
Xatırlatma
AXCP-nin Salyan şöbəsinin sədri Salayev bundan əvvəl — 2020-ci ilin aprelində Salyan rayon Məhkəməsinin hökmü ilə 2 il 3 ay müddətinə həbs cəzası almışdı. Salayev həbsindən bir müddət əvvəl sosial şəbəkələrdə Salyan rayon Polis Şöbəsinin əməkdaşı Həmzə Əzizovla mübahisəsinin videosunu paylaşmışdı. Həmin videoda AXCP üzvü polis əməkdaşını rayonda yaşayan bir qadına təcavüzdə ittiham edirdi. Video yayımlandıqdan sonra polis əməkdaşı Salyan rayon Məhkəməsində xüsusi ittiham qaydasında iddia qaldıraraq onun həbsini tələb etmişdi.
Videoda adı çəkilən qadın isə Əzizova bıçaqla xəsarət yetirdiyinə görə 7 il həbs cəzasına məhkum edilib. O, polisin zorakı hərəkətlərindən müdafiə olunmaq üçün bu addımı atdığını bildirsə də, polis əməkdaşı onun dediklərinin həqiqəti əks etdirmədiyini söyləyib.
Salayev 2022-ci il yanvarın 19-da — Amnistiya Aktı ilə əlaqədar cəza müddətinin başa çatmasına bir neçə ay qalmış azadlığa buraxılmışdı.
Daha bir AXCP fəalının saxlandığı bildirilir
AXCP daha bir fəalının saxlandığını bildirib. Partiyanın Tovuz rayon şöbəsinin fəalı Elmar Piriyevin 10 sutka müddətinə inzibati qaydada həbs edildiyi açıqlanıb.
Bundan əvvəl E.Piriyevin iyulun 27-də Tovuz rayon polis şöbəsinə çağrıldığı və yaxınlarının onunla əlaqə saxlaya bilmədiyi xəbəri yayılmışdı.
E.Piriyevin Tovuz rayonunda əvvəllər də siyasi fəaliyyətinə görə inzibati qaydada həbs olunduğu bildirilir.
+++
23 iyul
Azərbaycan Xalq Cəbhəsi Partiyası (AXCP) daha bir üzvünün saxlandığını bildirir.
Partiyanın yaydığı məlumata görə, Xətai rayon Şöbəsinin üzvü Kənan İsmayılı polis əməkdaşları saxlayaraq Nizami rayon Məhkəməsinə aparıb.
"Məhkəmənin qərarı ilə Kənan İsmayıl polisə müqavimət göstərmə və polisin qanuni tələbinə tabe olmama ittihamı əsasında 30 sutka müddətinə inzibati həbs cəzasına məhkum edilib", – AXCP bildirir.
K.İsmayılın bu ittihamlara münasibəti hələlik açıqlanmayıb.
AzadlıqRadiosu ittihamlarla bağlı əlavə informasiya əldə edə bilməyib.
AXCP sədri də daxil, bu müxalif partiyanın hazırda 15-dən çox üzvü həbsdədir. Partiya onların hamısının siyasi sifarişlə həbs olunduğunu açıqlayıb.
Hüquq-müdafiə təşkilatlarının hazırladıqları siyahıya görə, indi Azərbaycanda 328 nəfər siyasi məhbus var.
Azərbaycan rəsmiləri isə ölkədə siyasi məhbus olması barədə deyilənlərlə razılaşmır və vurğulayırlar ki, adları siyasi məhbus siyahısında yer alan şəxslər törətdikləri cinayətə görə mühakimə ediliblər.
Mərkəzi Bank illik inflyasiya proqnozlarını yenə artırıb
Azərbaycanda 2026-cı ildə illik inflyasiyanın 6.1 faiz, 2027-ci ildə isə 5.8 faiz olacağı gözlənilir.
Bu barədə Azərbaycan Mərkəzi Bankı (AMB) məlumat yayıb.
Bundan əvvəl qurum illik inflyasiyanın, müvafiq olaraq, 5.9 faiz və 4.5 faiz səviyyəsində olacağını bəyan etmişdi.
"İllik inflyasiya hədəf daxilindədir və baza ssenarisi üzrə proqnoz trayektoriyasına uyğun hərəkət edir. 2026-cı ilin iyununda 12 aylıq inflyasiya 5.8 faiz təşkil edib. İllik qiymət artımı qida məhsulları, alkoqollu içkilər və tütün məmulatları üzrə 7.1 faiz, ödənişli xidmətlər üzrə 5.6 faiz, qeyri-qida məhsulları üzrə isə 3.8 faiz olub. İllik baza inflyasiya 5.5 faiz təşkil edib", – açıqlamada deyilir.
İllik inflyasiyanın 2027-ci ilin ikinci yarısından hədəf diapazonuna qayıdacağı gözlənilir.
AMB-yə görə, qlobal geosiyasi gərginlik fonunda enerji və ərzaq qiymətlərinin artması səbəbindən Azərbaycana inflyasiya idxalı riski yüksəkdir.
AMB sədri Taleh Kazımov bu həftə bildirib ki, Azərbaycanda inflyasiya əsasən idxal xarakterlidir və son dörd ildə inflyasiyaya artırıcı təsir göstərən əsas faktor məhz təklif amili olub: "Təklif amillərinə baxdıqda, burada iki əsas kanal var. Birincisi, idxal edilən mal və xidmətlərin qiymətidir, yəni ticarət tərəfdaşlarımızda olan inflyasiya daxili bazara ötürülür. İkincisi isə yerli istehsalçıların xərc amillərinin artmasıdır. Bura dövlət tərəfindən tənzimlənən xidmətlər — məsələn, elektrik enerjisi, təbii qaz, su və yanacaq qiymətləri daxildir".
Müstəqil iqtisadçılar isə ölkədə real inflyasiyanın ikirəqəmli səviyyəyə çatdığını iddia edirlər. Ekspertlər qiymət artımının yalnız xarici amillərlə əsaslandırılması ilə razılaşmır, daxili xərc və təklif faktorlarına diqqət çəkirlər.
Suriyadan 16 nəfər Azərbaycan vətəndaşı repatriasiya olunub
İyulun 18 və 19-da Suriyadan 16 nəfər Azərbaycan vətəndaşı ölkəyə repatriasiya olunub. Məlumatı Azərbaycan Xarici İşlər Nazirliyi yayıb.
Qurum bildirir ki, xarici ölkələrdə böhran vəziyyəti ilə üzləşmiş Azərbaycan vətəndaşlarının repatriasiyasına məsul dövlət qurumlarından ibarət İşçi Qrupun üzvləri Suriyaya ezam edilib, repatriantlara ilkin tibbi və psixoloji müayinə göstərilib.
Onlar Azərbaycana qayıdış şəhadətnamələri, habelə təyyarə biletləri ilə təmin edilib və ölkəyə gətiriliblər.
XİN bildirir ki, hökumət xarici ölkələrin ərazisində silahlı münaqişənin qurbanına çevrilmiş Azərbaycan vətəndaşlarının repatriasiyası üçün zəruri tədbirləri görməyə davam edəcək.
2025-ci il daxil olmaqla son illər İraq və Suriyadan 473-ü uşaq və 64-ü qadın olmaqla 537 nəfərin repatriasiyası həyata keçirilib. Bunu XİN 2025-ci il üzrə mətbuat üçün buraxılışında qeyd edir.
2011-ci ildə Suriyada vətəndaş müharibəsi başlayıb. 2024-cü ilin sonunda Bəşər Əsədin devrilməsi ilə həmin ölkədə vəziyyət nisbətən sabitləşib.