Avtomobil bazarında böhran yaşansa da, Azərbaycanda alman avtomobillərinin yeni dileri – «Abşeron Avtomobil Mərkəzi» MMC yaranıb.
Salon yaxın günlərdə açılacaq
«Mercedes-Benz» avtomobillərinin Azərbaycanda rəsmi idxalçısı olan «AvtoKapital Azərbaycan» MMC-dən AzadlıqRadiosu-na deyiblər ki, yeni diler minik və kommersiya avtomobillərini satacaq. Bakı-Şamaxı şosesinin 8-ci kilometrində qurulan geniş avtomobil salonunda satışla yanaşı, təminatlı servis xidməti də göstəriləcək. Yaxın günlərdə açılacaq salona satış üçün çox sayda «Mercedes» modelləri də gətirilib.
Buna da bax: Bakıda avtomobil satışı dayanıb
Azərbaycanda sayca üçüncü salondur
İndiyədək ölkədə «Mercedes» avtomobilərinin iki dileri vardı. «Mercedes» minik avtomobillərini Bakıda satışı ilə 2001-ci ildən bəri «Autostar Kaukasus GmbH Baku» şirkəti, yük avtomobillərinin satışı ilə isə 2013-cü ildən bu yana «UEİ Transport» MMC məşğuldur.
«Abşeron Avtomobil Mərkəzi» MMC təxminən iki ay öncə - sentyabrın 5-də yaradılıb. Şirkətə Orxan Hacıyev rəhbərlik edir.
Buna da bax: Maşın alverçilərinin bazarı bağlanıb
Hər 100 maşından 17-si «Mercedes»dir
Dövlət Statistika Komitəsinin məlumatına görə, bu ilin əvvəlinə Azərbaycanda 192 min 685 ədəd «Mercedes» minik maşını vardı. Başqa sözlə, ölkədə hər 100 minik avtomobilindən 17-si «Mercedes» modelləridir. Ötən il ölkəyə 3 min 321 ədəd «Mercedes» minik avtomobili gətirilib. Bunların az bir hissəsi «ikinci əl» maşınlarıdır.
«AvtoKapital Azərbaycan» MMC 2012-ci ilin dekabrından «Daimler AG» şirkətinin Azərbaycandakı rəsmi nümayəndəliyi statusu ilə fəaliyyət göstərir. Bu şirkət «UkrAvto» korporasiyasının bir hissəsidir.