Oktyabrın 24-də səhər Maltada kiçik sərnişin təyyarəsi qəzaya uğrayıb, 5 nəfər ölüb.
Şahidlərin sözlərinə görə, təyyarə havaya qalxdıqdan az sonra sağ qanadı üstə yerə çırpılıb.
Hadisə yerinə dərhal həkimlər, xilasedicilər və polislər göndərilib.
İlk olaraq məlumat yayılıb ki, ölənlər arasında Avropa Birliyinin sərhədlərin təhlükəsizliyi üzrə agentliyi - Frontex-in əməkdaşları da var.
Amma Frontex Tvitter hesabında belə məlumatları təkzib edib.
Avropa Birliyinin xarici siyasət məsələləri üzrə rəsmisi Federika Moqerini də bu uçuşun Avropa Birliyinin fəaliyyəti ilə heç bir bağlılığı olmadığını bəyan edib.
“Malta Times” saytı ölənlərin fransalılar olduğunu yazır.
Bu təyyarə qəzası İkinci Dünya müharibəsindən sonra cırtdan ölkə Maltada baş verən ən ciddi qəza hesab olunur. Qəzaya düşən kiçik mühərrikli təyyarə 10 nəfər daşıya bilir.
