Ölkənin dövlət mediasında yayılmış bəzi xəbərlərə görə, İran özünün iki nüvəzənginləşdirmə qurğusunda sentrifuqların sökülməsi əməliyyatını dayandırıb.
Xəbər verilir ki, Natanz və Fordou məntəqələrində sentrifuqların çıxarılmasının dayandırılması, İranın sərt xətt-hərəkət tərəfdarlarının, prezident Hassan Rouhani-yə Qərblə yaxınlaşma prosesində tələskənliyə yol verilməsi ilə bağlı şikayətləri ilə əlaqədardır.
İyul ayında İran və dünya güclərini təmsil edən P5+1 qrupu arasında əldə olunmuş nüvə razılaşmasına görə, Tehran sazişin icrasına sentrifuqların sökülməsi ilə başlamalı idi.
Lakin İran mühafizəkarları ölkənin ali rəhbəri ayətullah Ali Khamenei-ə istinadən deyirlər ki, sentrifuqların sökülməsindən əvvəl Beynəlxalq Atom Energetikası Agentliyinin (BATENA) İranın nüvə proqramına dair təhqiqatı başa çatmalıdır. Bu təhqiqat İranın nüvə proqramının atom silahı hazırlamaq niyyətli olub-olmamasını aşkar etməlidir.
BATENA öz təhqiqatının nəticələrini dekabrın ortalarında elan edəcək. Digər tərəfdən İrana qarşı Qərbin və ABŞ-ın sanksiyaları yalnız Tehran sentrifuqları sökdükdən sonra qaldırıla bilər.
Rouhanı: ABŞ üzr istəməlidir
Bu arada prezident Rouhani İtaliyanın “Corriere della Sera” qəzetinə açıqlmasında Tehranla Vaşinqton arasındakı münasibətlər məsələsinə toxunub.
Rouhani bu müsahibəni İtaliya paytaxtına səfəri ərəfəsində verib. Bu, İran prezidentinin Avropa paytaxtına ilk səfəri olacaq.
Qərblə nüvə sazişi məsələsinə toxunan Hassan Rouhani deyib ki, əgər bu razılaşma yaxşı tətbiq edilərsə, iki ölkə arasında daha az gərginlik yaşanmasına yol açar.
O bildirib ki, hər şey “Amerikanın davranışından”, İranla münasibətlərdə “keçmiş səhvlərini etiraf etməsindən” asılı olacaq.
Hassan Rouhaninin fikrincə, ABŞ son 37 ildə baş vermiş səhvlərə görə İran xalqından üzr istəməlidir.
İran prezidenti həmçinin deyib ki, iki ölkə arasında səfirlik səviyyəsində diplomatik əlaqələr “bir gün bərpa olunacaq”, lakin bu məsələdə də hər şey Amerikanın siyasətlərindən asılıdır.
İtaliya səfəri zamanı İran prezidenti Hassan Rouhani-nin həmçinin Roma papası ilə görüşü də gözlənilir.
