Fransanın keçmiş baş naziri Francois Fillon dövlət vəsaitini mənimsəməkdə təqsirli bilinib.
Saxta iş yerləri ilə bağlı qalmaqal 2017-ci ildə onun prezidentliyə namizədlik şanslarını alt-üst etmiş və Yelisey sarayının qapılarını Emmanuel Macron-a açmışdı.
The Independent yazır ki, Fransa məhkəməsi Fillon-un arvadı Penelope-u da dövlət vəsaitinin mənimsənilməsinə iştirakda təqsirli bilib.
65 yaşlı Fillon və onun əslən uelsli olan arvadı Penelope Fillon təqsirli olmadıqlarını bildirirlər.
Rüsvay olmuş siyasətçiyə 5 il iş kəsilib. Bunun üç ili 375 min avro cərimə ilə əvəz olunub.
Ona habelə yaxın 10-ildə hər hansı seçkili vəzifəyə namizədliyini vermək qadağan edilib.
Penelope-a üç il şərti cəza verilib və o da eyni məbləğdə cərimələnib.
Paris İslah Məhkəməsinin hakimləri bildiriblər ki, siyasətçi öz arvadına yüz minlərlə avro gəlir gətirən saxta iş yerləri yaradıb və ona parlament köməkçisi kimi maaş verib.
Hakimlər bildiriblər ki, xanım Fillon-a ödənilən maaş onun reallıqda gördüyü işə müvafiq olmayıb.
Bu qanun pozuntuları barədə xəbərlər faş olanda Fillon Fransa prezidenti seçkisində lider namizəd idi.
O namizədliyini geri götürməsi üçün partiyasının təzyiqlərinə boyun əyməmiş, amma nəticə etibarilə seçkini birinci dövrədə uduzmuşdu.
