Yerevanda səs vermək üçün növbələr yaranıb
"Azatutyun" yazır ki, Yerevandan şimalda yerləşən Arınc qəsəbəsində 29/29 saylı seçki məntəqəsində növbələr yaranıb. 2 mindən çox seçicidən təxminən 600-ü artıq səs verib. Komissiya sədri Arıncda belə fəal seçici iştirakını xatırlamadığını söyləyib.
Müxalifət liderləri son həbslər barədə
"Ermənistan" blokunun lideri, ölkənin ikinci prezidenti olmuş Robert Köçəryan müxalifətçilərə qarşı cinayət işlərini və həbsləri rüsvayçılıq adlandırır.
Korrupsiyaya Qarşı Mübarizə Komitəsi seçki cinayətləri ilə bağlı ümumilikdə 209 nəfərə cinayət işi açıldığını bildirib. 194 nəfər saxlanılıb, onlardan 84 təqsirləndirilən şəxsə qarşı həbs və ev dustaqlığı qətimkan tədbiri seçilib.
Robert Köçəryan bu həbslərin qorxu aşılamaq məqsədi daşıdığını deyib.
Ermənistan parlamentinin spikeri Alen Simonyan isə müxalifət arasında həbslərin hökumətin qorxusunun əlaməti olub-olmadığı barədə sualı belə cavablandırıb:
“Qorxu hissi pul paylayanlara aiddir, seçicilərinin olmadığını bilirlər, pul paylamağa məcburdurlar, amma əminəm ki, artıq çox pis uduzacaqlarını anlayıblar”.
AzadlıqRadiosunun erməni xidmətinin xəbərinə görə, “Çiçəklənən Ermənistan” Partiyasının lideri Qaqik Tsarukyan bildirib ki, kollektiv müxalifətin qalib gəlmək üçün mütləq şansı var. O da tərəfdarları arasında həbslərin olduğunu bildirib.
"Güclü Ermənistan" partiyasının lideri Samvel Karapetyan iyunun 6-da 100-dən çox insanın həbs olunduğunu deyib, “amma qorxmağa dəyməz” deyə əlavə edib. O, rəhbəri olduğu partiyanın seçki rüşvətləri payladığı barədə hüquq-mühafizə orqanlarının dediklərini təkzib edib.
“Xalq nə qərar versə, o da olacaq”, – Karapetyan seçkidə baş nazir Nikol Paşinyan qalib gələcəyi halında planları haqda söyləyib.
Xarici əlaqələrə gəlincə, o, balanslı, yaxşı münasibətlərin vacibliyini vurğulayıb.
Rusiyada doğulmuş, milyarder Samvel Karapetyan hökuməti devirməyə çağırış etmək ittihamı ilə ev dustaqlığındadır, özü ittihamları siyasi motivli adlandırır. Onun partiyası Paşinyanı Rusiyaya qarşı təhlükəli düşmənçilik siyasəti yürütməkdə ittiham edir.
Ermənistanda parlament seçkiləri keçirilir
İyunun 7-də səhər 8-dən Ermənistanda seçki məntəqələri açılıb, ölkə yeni parlamenti seçir.
Daxili İşlər Nazirliyinin məlumatına görə, seçkilərdə 18 siyasi qüvvəyə səs vermək üçün 2,49 milyon vətəndaş qeydiyyatdan keçib. Ölkə üzrə 2 min 5 seçki məntəqəsi fəaliyyət göstərir. Baş nazir Nikol Paşinyanın rəhbərlik etdiyi “Vətəndaş Müqaviləsi” partiyası seçkiqabağı sorğularda rusiyapərəst qüvvələri qabaqlayır. Bu seçki Paşinyanın onilliklər boyunca Rusiyadan asılı olmuş Ermənistanı Qərbə yaxınlaşdırmaq səyləri üçün bir sınaq sayılır.
Səsvermə axşam saat 8-dək davam edəcək. Seçkiləri təxminən 400 beynəlxalq müşahidəçi izləyir. Mərkəzi Seçki Komissiyası ilkin nəticələrin seçki məntəqələri bağlandıqdan sonra 24 saat ərzində açıqlanacağını, yekun nəticələrin iyunun 14-də elan ediləcəyini bildirib.
Yerevanla Moskvanın münasibətləri seçkinin əsas mövzularından birinə çevrilib. Rusiya son həftələr Ermənistanın Qərbə daha da yaxınlaşmasına cavab olaraq bu ölkədən ixraca genişmiqyaslı qadağalar tətbiq edib.
Rəy sorğularına görə, “Vətəndaş Müqaviləsi” partiyası seçicilərin 24-32 faizinin dəstəyinə malikdir. Rusiyapərəst “Güclü Ermənistan” partiyası 6-11 faiz səslə ikinci yerdə qərarlaşıb.
Ermənistan MSK-sı Paşinyana müxalif bloku seçkilərdən kənarlaşdırmayıb
Ermənistan Mərkəzi Seçki Komissiyası (MSK) parlament seçkilərinə bir gün qalmış, iyunun 6-da müxalif “Güclü Ermənistan” blokunun seçkilərdən uzaqlaşdırılması ilə bağlı müraciəti rədd edib. Blokun rəqibləri onu Moskva ilə əlaqəli siyasi qüvvə kimi təqdim edirlər. Xəbəri AzadlıqRadiosunun erməni xidməti yayıb.
MSK-ya bu müraciəti bir gün əvvəl sağçı və avropayönlü “Respublika” partiyası etmişdi.
Partiya müraciətini “Güclü Ermənistan”dan bir sıra namizədlərə qarşı seçicilərin ələ alınması ittihamlarının irəli sürülməsi ilə əsaslandırıb. Müraciət baş nazir Nikol Paşinyanın qatıldığı teledebatlardan sonra təqdim olunub.
Paşinyan debatda “Güclü Ermənistan”a qarşı irəli sürülən ittihamlara toxunub, amma öz siyasi qüvvəsinin MSK-ya müraciət etməyəcəyini bildirib. Onun dediyinə görə, hakim partiyanın məğlubiyyət qorxusundan rəqiblərini seçkilərdən uzaqlaşdırmağa çalışdığına dair iddialara əsas vermək istəmir.
Amma Paşinyan əlavə edib ki, əgər Respublika Partiyası belə bir müraciət etmək istəyirsə, bunu edə bilər.
Şənbə günü “Güclü Ermənista”dan deputatlığa namizəd altı nəfər məhkəmə qərarı ilə çirkli pulların yuyulması və digər ittihamlarla həbs edilib.