Keçid linkləri

Təcili xəbərlər
2019, 15 Oktyabr, çərşənbə axşamı, Bakı vaxtı 07:36

Canlı 'Elina işi'. Yeniyetmənin ölümü necə araşdırılır (Xronologiya)


Bakıda 162 saylı məktəbdə oxuyan Elina Hacıyevanın bu il aprelin 4-də özünü üçüncü mərtəbədən atdığı, yaralı vəziyyətdə xəstəxanaya çatdırılsa da, sonradan (aprelin 6-da) vəfat etdiyi bildirilmişdi.

Hadisə ilə bağlı Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanıb. Şagirdin intihar etdiyi bildirilir və buna səbəb kimi məktəbdə ona pis münasibət bəsləndiyi qeyd olunur. E.Hacıyevanın təhsil aldığı 162 saylı məktəbin direktoru Sevinc Abbasovanın, direktor müavini Lalə Məhərrəmovanın, sinif rəhbəri Çimnaz Mehdiyevanın və həmin təhsil müəssisəsinin psixoloqu Könül Ağayevanın işdən çıxarıldığı açıqlanıb.

«Məktəbin direktoru Sevinc Abbasova Cinayət Məcəlləsinin 143 (təhlükədə qoyma) və 314.2-ci (səhlənkarlıq-ehtiyatsızlıqdan zərərçəkmiş şəxsin ölümünə səbəb olduqda) maddələri ilə təqsirləndirilən şəxs qismində cəlb olunmuş və məhkəmənin qərarı ilə barəsində ev dustaqlığı qətimkan tədbiri seçilib»,-Baş Prokurorluğun açıqlamasında belə yazılmışdı.

İttiham sübuta yetirilərsə, məktəb direktoruna 5 ilədək həbs cəzası verilə bilər.

Məhkəmənin hazırlıq iclasında bəlli olub ki, istintaqın gedişində 125-ci maddəyə (özünü öldürmə həddinə çatdırma) artıq xitam verilib.

13:12 11.10.2019

Elinanın ölümünə səbəb olan diaqnoz 26 saat sonra qoyulubmuş...

162 saylı orta məktəbin 8-ci sinif şagirdi Elina Hacıyevanın intihar cəhdindən sonra ölümüylə bağlı məhkəmə araşdırmaları yekunlaşdı. Oktyabrın 11-də Səbail rayon Məhkəməsində məktəblinin ölümünə görə cinayət məsuliyyətinə cəlb olunmuş keçmiş direktor Sevinc Abbasovanın işi üzrə istintaqın tamamlandığı elan edilib. Oktyabrın 16-da prokuror çıxış edib ona cəza istəyəcək.

Məhkəmə istintaqı yekunlaşmamışdan öncə Elina Hacıyevanın anasının vəkilləri ev dustaqlığında olan keçmiş direktorun həbsi barədə vəsatət qaldırıblar. Deyiblər ki, S.Abbasova şahidlərə təzyiq göstərib, əllərində bunu təsdiqləyən sübutlar var.

«Mən ona necə təsir göstərmişəm ki...»

Vəkil Sevinc Əliyeva keçmiş direktorun məktəbin psixoloqu olmuş Könül Ağayeva (o da Elinanın ölümündən sonra işdən çıxarılıb-red.) ilə Whatsapp yazışmasını, psixoloqun yerli mediaya müsahibəsi olan diski, məktəbin sabiq müdir müavini Məlahət Hüseynova barəsində məhkəmə qərarlarını sübut kimi hakimə təqdim edib. Sözügedən məhkəmə qərarlarında şahid ifadələri var ki, işdən çıxarılan M.Hüseynova haqqında həqiqətə uyğun olmayan şikayətlərə, aktlara imza atmağa onları S.Abbasova məcbur edib. Diskdəki müsahibədə isə psixoloq bildirir ki, məhkəmədə dindirilməmişdən əvvəl S.Abbasova onunla əlaqə saxlayıb, onun mənafeyinə uyğun ifadə verməsini istəyib.

Təqsirləndirilən S.Abbasova isə kimsəyə təzyiq göstərmədiyini deyib: «Mən ona necə təsir göstərmişəm ki, məhkəmədə mənim əleyhimə kifayət qədər ağır ifadə verdi? Əgər təsir vardısa, burada dindiriləndə niyə demirdi?».

Vəsatət təmin olunmayıb.

Məhkəmədə həm təqsirləndirilən direktorun vəkili, həm də zərərçəkmiş tərəf Elinanın ölümüylə bağlı rəy vermiş ekspertlərin dindirilməsi, təkrar ekspertiza keçirilməsi barədə də vəsatətlər qaldırıblar. Bildiriblər ki, ekspert rəyi ilə məhkəmədə dindirilən həkimlərin dedikləri arasında kəskin ziddiyyətlər var.

«İş materiallarından görünür ki, Elinanın ölümünə səbəb olan diaqnozu ona hadisədən 26 saat sonra qoyublar. Buna görə heç kim məsuliyyət daşımır», - deyən zərərçəkmişin vəkili Azər Nağıyev həkimlərin də məsuliyyətinə diqqət çəkib.

Amma məhkəmə təkrar ekspertiza və ekspertlərin dindirilməsi barədə vəsatətləri də təmin etməyib.

10:04 3.10.2019
S.Abbasova
S.Abbasova

Keçmiş direktor Elinaya təcili yardımı gec çağırmasından danışır

162 saylı orta məktəbin keçmiş direktoru Sevinc Abbasova deyir ki, rəhbərlik etdiyi təhsil ocağında 8-ci sinif şagirdi Elina Hacıyevanın intihar cəhdinə görə əvvəl öِzünü qismən təqsirli bilirdi. Amma istintaqın sonunda cinayət işinin materiallarıyla tanış olandan sonra, ümumiyyətlə, özünü təqsirli bilmir.

«İstintaqın sonunda cinayət işinin materiallarıyla tanış olana qədər özümü qismən təqsirli bilirdim. Fikirləşirdim ki, necə ola bilər, necə olub, məktəbdə onu incidiblər, ona qarşı «bullinq» deyirlər, nə deyirlər (bullying - kollektiv üzvlərindən birinin, özəlliklə məktəbli və ya tələbəyə qarşı aqressiv təqib-red.), ondan olub, amma mənim xəbərim olmayıb? İş materiallarıyla tanış olanda gördüm ki, ona qarşı bu cür davrananların biri elə öz xalası qızı olub... Təcili yardımın gec çağrılması isə məndən asılı olmayan səbəblərdən baş verib - affekt vəziyyətdə olmuşam. Sırf sağlamlığıma görə gecikib, özümə gələn kimi çağırmışam. Mənə təsəlli verən də odur ki, məktəbdə ölməyib. Mənim onu gizlətmək, öldürmək niyyətim olmayıb», – S.Abbasova oktyabrın 2-də məhkəmədə təqsirləndirilən şəxs qismində verdiyi ifadədə bildirib. Davamı

16:40 27.9.2019

"Elina işi": Tibbi bacısı deyir ki, direktor onu təcili yardım çağırmağa qoymayıb

162 saylı orta məktəbin 8-ci sinif şagirdi Elina Hacıyevanın intihar cəhdinə görə cinayət məsuliyyətinə cəlb olunmuş məktəb direktoru Sevinc Abbasovanın mühakiməsi sentyabrın 27-də davam etdirilib.

Məhkəmədə iki şahid dindirilib - məktəbin tibb bacısı Ləman Nuriyeva və Elinanın dostu olmuş Ramin Rəhimov.

L.Nuriyeva ifadəsində deyib ki, hadisə günü dərhal təcili tibbi yardım çağrılmasını istəyib, amma onun dediklərinə əhəmiyyət verilməyib. Əksinə, direktor ondan kabinetindən çıxmağı tələb edib: «Həmin gün poliklinikaya gedirdim. Mənə zəng vurub yoldan qaytardılar, dedilər ki, belə hadisə baş verib. Mən direktorun otağına daxil olanda Elina divanda uzanmışdı. Açıq yara görmədim, təzyiqini ölçdüm, 70-60 idi. Dedim ki, təcili tibbi yardım çağırmaq lazımdır. Hamı susdu, əhəmiyyət verən olmadı. 15-20 dəqiqədən sonda təzyiq 60-50-yə düşmüşdü, 40-a doğru gedirdi, bədəni soyumağa başlamışdı. Bunun daxili qanaxma ilə bağlı olmasından şübhələndim. Yenə təcili tibbi yardım çağrılmasının lazım olduğunu dedim. Lakin direktor Sevinc Abbasova mənə dedi ki, «çıx otaqdan, get, öz kabinetinə, çölə də çıxma, təcili tibbi yardımı özüm çağıracağam».

Tibb bacısının sözlərinə görə, onu sonradan direktorun otağına çağıranda orada polisləri və Xalidə Bayramovanı görüb. Yenə Elinanın təzyiqini ölçüb, təxminən 10 dəqiqədən sonra təcili yardım gəlib.

L.Nuriyeva həmin vaxt Elina ilə aralarındakı söhbətdən də danışıb: «Elina dedi ki, heç nə hiss eləmir, huşu başında idi. Mənə dedilər ki, Elina dərman içib. Özü də dedi ki, «...» içmişəm, amma qədərini bilmirdi».

Şahid sualları cavablandıranda bir daha açıq şəkildə deyib ki, direktor ona təcili yardım çağırmağa icazə verməmişdi.

Digər şahid Ramin Rəhimov deyir ki, Elina ilə iki ay idi tanış idilər. Elina ona məktəbdəki münasibətdən şikayətlənib: «Elina deyirdi ki, onu məktəbdə incidirlər. Direktor və müavininə bu barədə məlumat verib, amma heç bir tədbir görülməyib».

Məhkəmə prosesi oktyabrın 2-də davam edəcək.

20:28 25.9.2019
Orta məktəbdə müəllimlərin şagirdlərlə rəftarında sizi nə qane etmir?
Gözlə

No media source currently available

0:00 0:01:35 0:00


Məktəb yoldaşları nə deyir

Elinanın məktəb yoldaşı Aysel Murtuzayeva deyir ki, o, əsəbiləşəndə boğazını, əlini kəsirdi. Deməsinə görə, bir dəfə biologiya dərsində də boğazını kəsibmiş, həmin vaxt müəllimin başı jurnal yazmağa qarışdığına görə bunu görməyib:

"Deyirdi ki, özümü kəsəndə xoşuma gəlir. Bilirdim ki, mütəmadi dərman içir. Deyirdi ki, boy və əsəblərə görədi, amma təfərrüatlarını danışmırdı".

Ayselin sözlərinə görə, başqa sinfin şagirdləri onu geyiminə görə incidirdilər.

Başqa bir şagird Xədicə Mədətova da sinif yoldaşlarının Elinanın xətrinə dəydiyini söyləyib. Onun sözlərinə görə, Elina heç kimin ondan xoşu gəlmədiyini deyir, əvvəl təhsil aldığı məktəbə qayıtmaq istəyirdi.

"Məlumat verilməliydi"

Bakı Təhsil İdarəsinin daxili nəzarət sektorunun əməkdaşı Sərxan Rzayev də məhkəmədə dindirilib.

O deyib ki, hadisədən sonra məktəbin direktoru Sevinc Abbasova ona zəng eləyib, şagirdlərdən birinin yıxıldığını deyib:

"Dedi ki, görünən xəsarət yoxdur, tibb bacısı yardım göstərir. Sonra məlum oldu ki, yıxılmayıb, özünü üçüncü mərtəbədən atıb, dərman içib. Ona dedim ki, Təcili Yardıma xəbər verilsin. Mən özüm də Təhsil Nazirliyinə xəbər verdim. Sonra direktor mənə məlumat verdi ki, xəstəxanaya aparılıb, dərman zəhərlənməsi və çanaq sümüyü sınması diaqnozu qoyulub".

Elinanın bundan öncə də intihara cəhd etməsi barədə onlara heç bir məlumat verilmədiyini deyən şahid vurğulayıb ki, əslində isə verilməliydi:

"Təkcə bizə yox, həm də icra hakimiyyətinin yetkinlik yaşına çatmayanlarla iş komissiyasına..."

Ardınca məhkəmədə Kliniki Tibbi Mərkəzin həkimləri - Kompüter-Tomoqrafiya bölməsinin işçisi Məhəmməd Əmrahov, toksikoloq Faiq Süleymanov, reanimasiya şöbəsinin həkimi Vaqif Rəhimov, reanimotoloq Fazil Alıyev, uşaq cərrahiyyə şöbəsinin müdiri İlqar Haqverdiyev, həmçinin Təcili Tibbi Yardım stansiyasının həkimi Vaqif Mursaqulov şahid kimi dindirilib.

"Dedi ki, məni nə evdə istəyən var, nə məktəbdə"

"Çağırış gəldi, dedilər ki, məktəbdə uşağın vəziyyəti pisdi. Biz gedəndə divanda uzanmışdı. Dedi ki, axşam və səhər çoxlu ketatfen içib. Soruşdum ki, niyə belə elədin? Dedi ki, məni nə evdə istəyən var, nə də məktəbdə. Bildirdi ki, bundan əvvəl də intihara cəhd edib, ikinci dəfə on beş gündür intihar barədə düşünür. Dərman içdiyini dediyinə görə toksikologiyaya aparılmasını istədim", - Təcili Tibbi Yardım stansiyasının həkimi Vaqif Mursaqulov belə deyib.

Toksikoloq Faiq Süleymanov bildirib ki, Elina xəstəxanada ona axşam 30, səhər də 30 həb içdiyini desə də, inanmayıb. Çünki bu halda o, dərin yuxuda olmalıydı:

"Amma onda yüngül zəhərlənmə var idi. Mən müalicəni yazıb çıxdım. Qalan müalicə reanimasiyada aparılmalıydı".

Digər həkimlərin sözlərinə görə, xəstəxanada Elinanın daxili orqanlarının ilkin müayinəsi zamanı ağciyərdə ödəm (maye yığıntısı) aşkarlanıb.

Vaqif Rəhimov deyir ki, ağciyər ödəmi diaqnozu qoyulan xəstələrin təxminən 46 faizini xilas etmək mümkün olmur.

Ancaq reanimotoloq Fazil Alıyev deyir ki, həmin gecə onun növbəsində reanimasiyada saxlanılarkən Elinanın vəziyyəti stabil olub:

"Təzyiqi düşmüşdü 70-40-a. Daxili qanaxmadan şübhələnib UZİ-yə göndərdim. Heç nə göstərmədi, qarın boşluğu təmiz idi. Mənim növbəmdə prokurorluğa ifadə verib. Ertəsi gün səhər saat 9-da başqa həkimə təhvil vermişəm. Reanimasiya xəstəsi üçün vəziyyəti stabil idi. Əkrəm həkim səhər baxış keçirəndə dedi ki, bu dinamika ilə getsə, bir gün sonra palataya köçürülə bilər".

Məhkəmə prosesi sentyabrın 27-də davam edəcək.

Davamı

Günün bütün mövzuları

XS
SM
MD
LG